«مۇھەببەتتە مېنىڭمۇ ھەققىم بار» رومانى نەشردىن چىقتى
تونۇلۇۋاتقان ياش يازغۇچى ساجىدە سۇلايمان 1967-يىلى مارالبېشى ناھىيەسىنىڭ سېرىقبۇيا بازىرىدا مەرىپەتپەرۋەر تىجارەتچى ئائىلىسىدە تۇغۇلغان. ئۇ ئاتا-ئانىسىنىڭ يېتەكچىلىكىدە كىچىكىدىن تارتىپ دىنىي ۋە پەننىي بىلىملەرنى ياخشى ئۆگىنىپ، ئۆزىنى ھەر جەھەتتىن تەربىيەلەشكە ئاساس سالغان. 1984– يىلى قەشقەر ۋىلايەتلىك تېخنىك ئىشچىلار مەكتىپىنى تاماملىغاندىن كېيىن، قەشقەر ۋىلايەتلىك پارتىيە مەكتەپكە تەقسىم قىلىنغان. 1988– يىلى خىزمەت ئېھتىياجى بىلەن ئاپتونوم رايۇنلۇق پارتىيە مەكتەپكە يۆتكىلىپ كەلگەندىن كېيىن، شۇ مەكتەپنىڭ ماتېرىيال ئارقىلىق ئوقۇش ئىنستىتۇتىدا مەخسۇس كۇرسنى تاماملىغان. ھازىرغا قەدەر ئاپتونۇم رايۇنلۇق پارتىيە مەكتەپتە ئىشلەپ كەلمەكتە.
ئاپتورنىڭ ئاتا-ئانىسىنىڭ تۇرمۇش ھاياتىدىكى ئاچچىق-چۈچۈك كەچۈرمىشلىرىنى، ئانىسىنىڭ كۈندە ھېكايە قىلىپ سۆزلەپ بېرىشلىرى ۋە بالىلىق ۋاقىتلىرىدا دادىسىنىڭ تىجارەت مۇناسىۋىتى (مەدەنىيەت ئىنقىلابىي مەزگىلىدە ئەركىن تىجارەتكە يول قويماسلىق سەۋەبلىك بىر مەزگىل ئىچكىرى ئۆلكىلەردە يۈرۈپ، يۇرتقا كېلەلمىگەنلىكى) بىلەن ئۆزلىرى بىلەن بىرگە تۇرالماسلىق سەۋەبلىرى ئۇنىڭ قەلبىدە باشقا بالىلارغا ئوخشىمايدىغان، چوڭلارغا خاس تەمكىنلىك، ئىشلارغا ياخشى-يامان كۆز قارىشى بىلەن قارايدىغان سەزگۈرلۈك خاراكتېرىنى يېتىلدۈرۈپ، ھەر كۈنى ئاڭلاپ تۇرغان «راست ئىشلار خاتىرىسى» ئۇنىڭ يۇمران قەلبىگە بىلىندۈرمەي ئەدەبىيات ئۇرۇقىنى چاچىدۇ. ئۇنىڭ تۈنجى ئىجادىيىتى «جۇڭگو مىللەتلىرى» ژۇرنىلىنىڭ 2005-يىل1- سانىدا ئېلان قىلىنغان «ئەر – ئايال ھەققىدە پاراڭ» ناملىق ماقالىسى بىلەن باشلانغان بولۇپ، ئۇ ئىلگىرى-ئاخىر بولۇپ «جۇڭگو مىللەتلىرى»، «تارىم»، «تەڭرىتاغ»، «شىنجاڭ ئاياللىرى»، «يېڭى قاشتېشى»، «قەشقەر»، «قىزىلسۇ ئەدەبىياتى»، «شىنجاڭ گېزىتى»، «قىزىلسۇ گېزىتى» قاتارلىق گېزىت-ژۇرناللاردا 30 پارچىدەك شېئىر، پوۋست، ھېكايە، ماقالىسى ئېلان قىلىنغان .
ئاپتور يېقىنقى ئۈچ يىلدىن بۇيان جەنۇبىي شىنجاڭنىڭ ھەرقايسى چەت، يىراق ناھىيە، يېزا-قىشلاقلارغىچە بېرىپ تۇرمۇش ئۆگەندى، جاپاكەش دېھقانلار، سەھرا ئاياللىرى ۋە بىرمۇنچە تارىخ، مەدەنىيەت بازىلىرىغا بىرىپ ماتېرىيال توپلىدى ھەم ئۆز جەمەتىنىڭ تارىخ – شەجەرىسى ئۈستىدە ئىزدەندى. تۇرمۇشقا چوڭقۇر چۆكۈپ، رېئاللىقنى ئەينەن خاتىرىلەپ، ئۇيغۇر جەمئىيىتىدىكى يېڭى تېمىلار ئۈستىدە ئىزدىنىپ، بىرقانچە رومان، پوۋست ، ھېكايىلىرىنى ۋۇجۇدقا چىقاردى. يېقىندا، شىنجاڭ خەلق نەشرىياتى تەرىپىدىن نەشر قىلىنغان «مۇھەببەتتە مېنىڭمۇ ھەققىم بار» ناملىق رومانى ئەنە شۇلارنىڭ دەلىلى. ئاپتور يېقىندا يەنە بىر قىسىم نەشرىيات ئورۇنلىرىغا ئىككى روماننى نەشرگە سۇندى ھەمدە بىر پوۋستلار توپلىمىنى نەشرگە سۇنۇش ئالدىدا تۇرىدۇ .
ئاپتور ھازىر ئاپتونوم رايونلۇق يازغۇچىلار جەمئىيىتىنىڭ ئەزاسى. بىز ئۇنىڭ بۇنىڭدىن كېيىن مەسئۇلىيەتچان، تىرىشچان، ئىزدىنىشچانلىق روھى بىلەن ئەدەبىياتقا چوڭقۇر مۇھەببەت باغلاپ، خاسلىققا ئىگە تېخىمۇ نادىر ئەسەرلەرنى روياپقا چىقىرىشىنى چىن دىلىمىزدىن ئۈمىد قىلىمىز .
يوللىغان ۋاقتى 2012-3-9 13:35:21
نەفىس
