دىيارىمىزدىكى يەنە بىر خاسىيەتلىك ئادەم

نىدائىي

	ياسىنجان رەھمىتۇللا    كورلىدىكى ۋە شىنجاڭدىكى خېلى كۆپ ساندىكى كىشىلەر كورلىدا تۇغۇلۇپ چوڭ بولغان، تاشنى قولى بىلەن چېقىش، مىخ يېيىش، كىشىلەرنى كىيىم كىيمىگەن ھالەتتە كۆرۈش ۋە بۇنىڭدىن باشقا نۇرغۇن ئۆزگىچە خىسلەت-كارامەتلىرى بىلەن ھەممىگە تونۇشلۇق بولغان ئىگە ئۆمەرجان ھىمىت ئەپەندىنى ئاڭلىغان ياكى ئۇنى خېلى ئوبدان بىلىدۇ. چۈنكى ئۆمەرجان ئەپەندىنىڭ كارامەتلىرى ۋە ساخاۋەتلىك ئىش-ئىزلىرى ئاپتونوم رايونىمىز ۋە دۆلىتىمىزدىكى ھەر قايسى تاراتقۇلاردىلا ئەمەس، بەلكى چەت ئەل سەھنىلىرىدە كۆرسەتكەن كارامەتلىرىمۇ چەت ئەل تاراتقۇلىرى تەرىپىدىن بەس–بەستە خەۋەر قىلىندى. بىلىشىمچە، ئامېرىكىنىڭ سابىق زۇڭتۇڭى كىلىنتون شىنجاڭغا كەلگەندە ئالاھىتەن ئۇنى قوبۇل قىلغان. تېخى يېقىندىلا ئۇ، يەنى 2011–يىلى 10-ئاينىڭ 17-كۈنى، كورىيە SBS تېلېۋىزىيەسى STARKING پىروگراممىسىنىڭ تەكلىپىگە بىنائەن، كورىيەنىڭ داڭلىق كىنو ئارتىسلىرى، ناخشىچىلىرى يىغىلغان سەھنىدە تاش چېقىش، مىخ يېيىش، يوغان تاشنى چىشلەپ ئۈزۈشتەك كارامەتلىرىنى كۆرسىتىپ، پۈتكۈل كورىيەلىكلەرنى ھاڭ-تاڭ قالدۇرغان.    2006-يىلى 8-ئاينىڭ 17-كۈنى، دۆلەت پەن-تېخنىكا مىنىستىرلىقى ئۆمەرجان ئەپەندىگە ‹‹جۇڭگودىكى خاسىيەتلىك ئادەم›› دېگەن نامنى بەرگەن ۋە ئۇنىڭ نامى ‹‹دۇنيادىكى داڭلىق شەخسلەر›› قامۇسىغا كىرگۈزۈلگەن. ئۇ ھازىر جۇڭگو مەدەنىيەت تارقىتىش مەركىزىنىڭ ئالاھىدە خادىمى، جۇڭگو مودا-سەنئەت كومىتېتىنىڭ مۇئاۋىن رەئىسى، جۇڭگو مىللىي مائارىپ كېڭەشمىسىنىڭ ئىش بېجىرگۈچىسى، جۇڭگو خەير-ساخاۋەت جەمئىيىتىنىڭ مۇئاۋىن باش كاتىپى. ئۇ ئون نەچچە يىلدىن بۇيان، كورلا، ئاقسۇ، سانجى قاتارلىق جايلاردىكى قىيىنچىلىقى بار بالىلارغا 3 مىليون 200 مىڭ يۈەن قىممىتىدىكى پۇل ۋە ماددىي بۇيۇم ئىئانە قىلغان.    خوش، ئۇنداقتا دىيارىمىزدىكى يەنە بىر كارامەت ئىگىسى زادى كىمدۇ؟ ئۇنىڭ قانداق كارامەتلىرى باردۇ؟ ئۇ ھازىر قەيەردە، نېمە ئىشلارنى قىلىۋاتقاندۇ؟    مەن بۇلتۇر يۇرتۇم بۈگۈردە بىر مەزگىل تۇرۇش جەريانىدا، دوست- بۇرادەرلىرىمدىن بۈگۈر ناھىيەسىنىڭ قارىباغ يېزىسىدا ئۆمەرجان ھىمىتقا ئوخشاش قالتىس كارامەتكە ئىگە يەنە بىر ئۇيغۇر يىگىتىنىڭ بايقالغانلىقىنى ئاڭلىغان ئىدىم. لېكىن ئۇ يىگىتنىڭ ئالاقىلىشىش تېلېفون نومۇرى بولمىغاچقا، ئۇنىڭ ئۈستىگە مەن بۈگۈردە ئۇزاق تۇرمىغاچقا، ئۇنى زىيارەت قىلىش پۇرسىتىگە ئېرىشەلمەي كەلگەن بولساممۇ، لېكىن بۇ يىگىتنى زىيارەت قىلىش ئويۇم بارلىقىنى ئاغىنىلىرىمگە ئېيتقانىدىم. دېگەندەك، ئالاھەزەل ئۈچ ھەپتىنىڭ ئالدىدا بۈگۈر ناھىيە قارىباغ يېزىلىق ھۆكۈمەتتە ئىشلەيدىغان ئاغىنەم ئوسمانجان ماڭا تېلېفون بېرىپ، مەن ئۇزۇندىن بېرى زىيارەت قىلىشنى كۆڭلۈمگە پۈككەن خىسلەتلىك ئادەم ـــ ھەسەنجان مۇھەممەدنىڭ ئىشخانىسىغا كەلگەنلىكىنى ئېيتىپ ماڭا تېلېفون قىلىپتۇ. مەن تېلېفوندا ئۇنىڭ بىلەن قىسقىچە كۆرۈشۈپ، بىرەر ئىش بىلەن كورلىغا كەلسە ماڭا تېلېفون قىلىشنى ھەمدە ئۆزۈمنىڭمۇ ئۇزۇنغا قالماي بۈگۈرگە بېرىپ، كارامەتلىرىنى ئۆز كۆزۈم بىلەن كۆرۈپ، مەخسۇس زىيارەت قىلىدىغانلىقىمنى ئېيتتىم ۋە ئۇنىڭ تېلېفون نومۇرىنى خاتىرىلىۋالدىم.    2-ئاينىڭ 14-كۈنى، مەن ئوبلاستىمىزنىڭ ئىككى يىغىنىنى زىيارەت قىلىش بىلەن ئالدىراش يۈرگەندە، ھەسەنجان ئۆزىنىڭ كورلىغا كېلىدىغانلىقىنى ئېيتىپ ماڭا تېلېفون قىلىپتۇ. مەن ‹‹كەلسىڭىز كېلىڭ، بۇ يەردە ھازىر ئوبلاستلىق تېلېۋىزىيە ئىستانسىسى، رادىيو ئىستانسىسى، كورلا كەچلىك گېزىتى، بايىنغولىن گېزىتىنىڭ ھەر مىللەت مۇخبىرلىرى بار، ئاۋۋال بۇ مۇخبىرلار كارامىتىڭىزنى كۆرۈپ باقسۇن›› دېدىم. دېگەندەك ھەسەنجان چۈشكە ئۈلگۈرۈپ كورلىغا كەلدى. بىز چۈشلۈك تاماقنى يەپ بولۇپ، بوستان بازىرىغا بېرىپ ئالتە–يەتتە سانتىمېتىر ئۇزۇنلۇقتىكى مىخ، يىپ، كاۋاپ زىخى ۋە پىۋا بوتولكىسىنىڭ ئاغزىنى ئاچىدىغان ئەسۋابنى سېتىۋالدۇق. مەن يولدا كېتىۋېتىپ ھەسەنجانغا سەل تۇرۇپ مۇخبىرلارنىڭ ئالدىدا مىخنى يېيەلمەي ئاغزىغا يۇشۇرۇپ قويسا بولمايدىغانلىقىنى ياكى بۇنداق ئۇزۇن مىخنى يەيمەن دەپ، ئۆزىنى زەخمىلەندۈرۈپ قويسا ئاقىۋىتىگە ئۆزى مەسئۇل ئىكەنلىكىنى، بولسا بىر تال مىخ يېمەي، سەككىز–ئون تال يەپ بېرىشنى ئېيتتىم.  ھەسەنجان ماڭا ئىشەنچ بىلەن قاراپ خاتىرجەم بولۇشۇمنى ئېيتتى. مەن ھەسەنجاننى ئۇدۇل ئىككى يىغىن مۇخبىرلار ئىشخانىسىغا باشلاپ كىردىم ۋە ئۇنى مۇخبىرلارغا قىسقىچىلا تونۇشتۇرۇپ، كارامەتلىرىنى كۆرسىتىشكە تەكلپ قىلدىم.    ھەسەنجان ئالدى بىلەن ئالتە-يەتتە سانتىمېتىر ئۇزۇنلۇقتىكى مىخنى ئاغزىغا سېلىپ، كورۇسلىتىپ يېيىشنى باشلىۋەتتى، بىردەمدىلا سەككىز-ئون تال مىخنى نان يېگەندەك يەۋەتتى. بۇنى كۆرۈپ مۇخبىرلار ھەيرانو-ھەس قالدى ھەمدە بۇ جەريانلارنى سۈرەتكە تارتتى. ھەسەنجان ئارقىدىنلا زىخنى ۋە تۆمۈردىن ياسالغان پىۋا بوتولكىسىنىڭ ئاغزىنى ئاچىدىغان ئەسۋابنى ئوڭ قولىنىڭ باش بارمىقىنى ئىشلىتىپ، ياغاچنى ئۇشتىغاندەك سۇندۇرۋەتتى. ئاندىن يەنە يوتقان يىپىدىن بىر مېتىرچە ئۈزۈپ، ئۇنى سەككىز–توققۇز پارچە قىلىپ پارچىلاپ، ئاندىن ئۇنى دەرھال ئاغزىغا سېلىپ ئەسلى پۈتۈن ھالىتىگە ئەكىلىپ بەردى. مۇخبىرلار بۇ كۆرۈنۈشلەرنى كۆرۈپ، ئاغزىنى ئېچىپلا قالدى. مۇخبىرلار بۇ كۈنى ئالدىراش بولغاچقا ھەسەنجان باشقا كارامەتلىرىنى كۆرسەتمىدى ۋە ئۆزىنىڭ بۈگۈردە ئىشى چىقىپ قالغانلىقىنى ئېيتىپ، قايتىپ كەتتى.    مەن 2-ئاينىڭ 18–كۈنى بۈگۈرگە بېرىپ، ھەسەنجاننى مەخسۇس زىيارەت قىلدىم. ھەسەنجان زىيارىتىمنى قوبۇل قىلىشتىن بۇرۇن بەش–ئالتە تال مىخ يەپ ۋە يەتتە-سەككىز سانتىمېتىر قېلىنلىقتىكى تاش پارچىسىنى قولى بىلەن ئۇرۇپ چېقىپ، كارامەت كۆرسىتىپ بەردى.    ـــ ئۆزىڭىز ۋە كارامىتىڭىز ھەققىدە گەپ قىلىپ بەرگەن بولسىڭىز، ـــ دېدىم مەن. ھەسەنجان مۇنداق دېدى:    ـــ مەن 1983–يىلى 3–ئاينىڭ 12–كۈنى، بۈگۈر ناھىيەسى قارىباغ يېزىسىنىڭ ئۇششاقتېرەك كەنتىدە تۇغۇلغان. بىز تۆت بالا بولۇپ، ئىككى ھەدەم، بىر ئاكام بار، مەن بالىنىڭ ئەڭ كىچىكى. مەن 2007–يىلى 2–ئاينىڭ 25– كۈنى ئۆيلەنگەن. كارامىتىم ھەققىدە ئانچە–مۇنچە گەپ قىلىپ بېرەي، ئالاھەزەل توققۇز ياش ۋاقتىمدا تاسادىپىي بىر ۋەقە تۈپەيلىدىن ئۆزۈممۇ ھەيران قالدىم، ئېشەك ھارۋىسى ھەيدەپ كېتىۋاتسام، ئىگەرنىڭ ئاغامچىسى ئۈزۈلۈپ كەتتى، شۇنىڭ بىلەن چىگىپ قوياي دەپ ئىككى ئۇچىنى يېقىن ئەكەلسەم، ئۆزلۈكىدىن ئەسلى ھالىتىگە قايتىپ ئۇلىنىپ قاپتۇ. ئەينى چاغدا بۇ ئىشنى ئۆيدىكىلەرگە ئېيتمىدىم. كېيىن چوڭ بولغانسېرى چىشلىرىم غۇچۇرلايدىغان بولۇپ قالدى، دەرەخنى، ئۇنى–بۇنى چىشلەپ يۈرۈپ، مىخ يەيدىغان خىسلىتىمنى بايقىدىم. باياتىن كۆردىڭىز، مىخ ئاغزىمغا كىرىپلا ئېرىپ كېتىدۇ، ئۆزۈممۇ بىلمەيمەن، ئىشقىلىپ ئاشقازىنىمغا بارمايدۇ. كېيىنچە چوڭ بولغانسېرى مەن يەنە ئۆزۈمدە ئادەتتىكى ئادەملەردە بولمىغان باشقا نۇرغۇن خىسلەتلەرنىڭ بارلىقىنى بايقىدىم.    ـــ ئاساسلىق قانداق كارامەتلىرىڭىز بار؟ ـــ دەپ سورىغىنىمدا ھەسەنجان كۈلۈپ تۇرۇپ مۇنداق دېدى:    ـــ بىر ئولتۇرۇشۇمدا بەش–ئالتە سانتىمېتىر ئۇزۇنلۇقتىكى مىختىن ئىككى كىلوگرام يېيەلەيمەن، قاتتىق تاشلارنى قولۇم بىلەن چېقىۋېتەلەيمەن، كىشىلەرنى كىيىم كەيمىگەن ھالەتتە كۆرەلەيمەن، قولۇمنى يارىلاندۇرماي تۇرۇپ، يىپىلق يوتقان يىڭنىسىنى قولۇمنىڭ بىلىكىدىن تىقىپ، تۆۋىنىدىن ئۆتكۈزەلەيمەن. خېلى ئۇزاق جايلارغا بىردەمدىلا بېرىپ قالىدىكەنمەن، بەزىدە بۈگۈردىن كورلىغا جاڭگاللىقنىڭ يولى بىلەن مېڭىپ بىر سائەتتە بارالايدىكەنمەن. ئادەتتە باشقىلار بىلەن ئۇرۇشمايمەن، ئۇرۇشۇپ قالسام 30 ئادەمگە تەڭ كېلەلىگۈدەك كۈچۈم بار. ئۇنىڭدىن باشقا ئۈزۈلگەن نەرسىلەرنى ئۇلىيالايمەن. ئىشقىلىپ دېيىشكە بولمايدىغان باشقا كارامەتلىرىممۇ خېلى بار، بەزى ئىشلارنى يامان بولىدۇ، دەپ قىلمايمەن.    ـــ ھازىرغىچە قانداق پائالىيەتلەرگە قاتنىشىپ باقتىڭىز؟ قايسى خىل سەھنىلەردە، قانداق كارامەتلەرنى كۆرسەتتىڭىز؟ ـــ دېگەن سۇئالىمغا ھەسەنجان مۇنداق دەپ جاۋاب بەردى:    ـــ مەن ئۆزۈم دېھقان، ئۇنىڭ ئۈستىگە ئاتا–ئاناممۇ دېھقان بولغانلىقى ئۈچۈن تېخى ئانچە تونۇلۇپ كېتەلمىدىم. ئىككى ئاي بۇرۇن بايىنغولىن تېلېۋىزىيە ئىستانسىسى مېنى بىر قېتىم زىيارەت قىلدى. بەلكىم كىشىلەر تېلېۋىزور ئارقىلىق مېنى ئانچە–مۇنچە بىلگەن بولۇشى مۇمكىن، بەزىدە يېزىمىزغا ئوبلاست ۋە ناھىيەدىن كىشىلەر كېلىپ قالسا، كارامەت كۆرسىتىپ قويىمەن. بۇلتۇر 10–ئاينىڭ 30–كۈنى، مەن تۆمۈر داۋامەت ئاكىنىڭ تەكلىپىگە بىنائەن ئۈرۈمچى ۋە توقسۇندا ماھارەت كۆرسەتتىم. بۇ سورۇندا ئاپتونوم رايونلۇق مەدەنىيەت نازارىتىنىڭ نازىرى ئابلىز ئابدۇرېھىم ئەپەندى، ئاپتونوم رايونلۇق يۇقىرى خەلق سوت مەھكىمىسىنىڭ باشلىقى نەيىم ياسىن قاتارلىقلارمۇ بار ئىدى. تۆمۈر داۋامەت ئاكا كارامىتىمنى كۆرگەندىن كېيىن، مېنى سېرىك ئۆمىكىگە تونۇشتۇرۇش خېتى قىلىپ بەرگەن ئىدى، لېكىن ھازىرغىچە ئۇلاردىن جاۋاب كەلمىدى. مەنمۇ بارا–بارا ئۆزۈمدىكى خىسلەتلەرنىڭ باشقىلاردا يوقلۇقىنى بىلىپ، تونۇلۇشنى، كارامىتىمنى ئىقتىسادقا ئايلاندۇرۇشنىڭ يولىنى ئويلىشىۋاتىمەن.  پۇل تاپسام مەنمۇ ئۆمەرجان ئاكامغا ئوخشاش ئاۋال ئۆزۈمنى ئوڭشىۋالغاندىن كېيىن، ئاتا–ئانام، ئۇرۇق–تۇغقانلىرىم، مەھەللىدىكىلەر ۋە خەلقىم ئۈچۈن ساخاۋەتلىك ئىشلارنى كۆپرەك قىلسام دەيدىغان ئارزۇيۇم بار. شۇڭا، ھازىر ماڭا كارامەتلىرىمنى كۆرسىتىدىغان ۋە كارامەتلىرىمنىڭ قەدرىگە يېتىدىغان چوڭراق سەھنە لازىم بولۇپ قالدى. بۇنىڭدىن كېيىن، مەن بۇ جەھەتتە باشقىلار بىلەن ھەمكارلىشىشنى خالايمەن.    مەن يەنە ھەسەنجان بىلەن باشقا پاراڭلارنىمۇ قىلىشتىم. ئۇنىڭ گەپ– سۆزلىرىدىن يېزىدا چوڭ بولغان ئاددىي-ساددىلىقى، سەمىمىيلىكى، جەمئىيەتكە ئانچە ئارلىشىپ كەتمىگەنلىكى چىقىپ تۇراتتى. مەن ھەسەنجانغا چوقۇم كۈنلەرنىڭ بىرىدە ئۆمەرجان ئاكىدەك تونۇلۇپ كېتىدىغانلىقىنى ۋە كارامىتىگە تايىنىپ نۇرغۇن ئىقتىسادقا ئېرىشىپ، ساخاۋەتچى بولۇش ئارزۇسىنى ئەمەلگە ئاشۇرالايدىغانلىقىنى، بۈگۈردە كارامەتكە تۇشلۇق سەھنىنىڭ كەملىكىنى، مۇمكىن بولسا ئۈرۈمچى تەرەپكە چىقىپ، تەرەققىي قىلىش ۋە تونۇلۇش لازىملىقىنى ۋە كۈنلەرنىڭ بىر كۈنى ئۆزىنىڭ جۇڭگو ۋە چەت ئەللەردە تونۇلغان داڭلىق خاسىيەتلىك ئادەم بولۇپ، يۇرتىمىز ۋە مىللىتىمىزگە زور شان–شەرەپ ئەكىلەلەيدىغانلىقى ھەققىدە تىلەكلىرىمنى بىلدۈرۈپ ئۇنىڭ بىلەن خوشلاشتىم.   تۆۋەندىكىسى ئۇنىڭ بىر قىسىم سۈرەتلىرى   مۇھەررىر: توخنىياز ئىسمائىل نىدائىي    ئاپتور: ‹‹بايىنغولىن گېزىتى›› ئىدارىسى مۇخبىرلار بۆلۈمىدە

polat

	ھەسەنجان ئىقتىدارىڭىز ھەقىقەتەن ئادەمنى قايىل قىلارلىق ئىكەن.ئىقتىدارىڭىزنى تۇلۇق جارى قىلدۇرۇپ ئۆمەرجان ئاكامنىڭ ئىزىنى بېسىشىڭىزنى ئۈمۈد قىلىمەن.

BadBoy

	ھەقىقەتەن قالتىسكەن، سىن ھۆججەتلىرى بولسا بىر كۆرۈپ باقساق بوپتىكەن. ھەسەنجاننىڭ ئىشلىرىغا ئۇتۇق تېلەيمەن.

turkogul

	جاھاندا ئادەمنىڭ ئەقلى يەتمەيدىغان ئىشلار كۆپ دېسە ! ھەسەنجاننىڭ ئىشلىرىنىڭ ئوڭۇشلۇق بۇلۇشىغا تىلەكداشمەن !

sarsanroh

	ئۇيغۇرلاردىن ئۆمەرجان ئاكىمىزغا ئوخشاش خاسىيەتلىك ئادەمدىن يەنەبىرسى چىقىپتۇدە ھەسەنجان ئاكىمىزنىڭ ئۆزىدە بار بولغان بۇ يوشۇرۇن ئىختىدارىنى دۆلىتىمىز ۋە دۇنيا سەھنىلىرىدە تولۇق نامايەن قىلىپ مىللىتىمىز ئۈچۈن شان-شەرەپ كەلتۈرۈشىنى ئۈمىد قىلىمەن ۋە ئىشلىرىغا ئۇتۇق تىلەيمەن!

skod

	ھەقىقەتەن قالتىسكەن، سىن ھۆججەتلىرى بولسا بىر كۆرۈپ باقساق بوپتىكەن. ھەسەنجاننىڭ ئىشلىرىغا ئۇتۇق تېلەيمەن.

skod

	ھەسەنجان ئىقتىدارىڭىز غا  ھەقىقەتەن  قايىل بولماي ،ئاپىرىن ئۇقۇماي تۇرالمايمىز.ئىقتىدارىڭىزنى تۇلۇق جارى قىلدۇرۇپ ئۆمەرجان ئاكامنىڭ ئىزىنى بېسىشىڭىزنى ئۈمۈد قىلىمەن. ئاپىرىن سىزگە !

halpambag

	ھەرقانداق ئادەم ھەسەنجاننىڭ ئىقتىدارىغا  قايىل بولماي ،ئاپىرىن ئۇقۇماي تۇرالمايدىكەن.

uyghun

	تەڭرىتاغ مۇنبىرىدىن مەخسۇس سىنلىق زىيارەت قىلىپ بىر تونۇشتۇردىغان ئىىشكەن.

nawkeran

	يەنە بىر كارامەت ئىگىسى چىقىپ بىزنى بەك خۇش قىلۋەتتى ، بارا بارا تۇنۇلۇشقا باشلىغۇدكمىز