ئەلكۈيى كۈندىلىك خاتىرىسى

seher129

ئەسلى قاتتىق دەرت تۆكەي دەپ كىرگەن، ئۇيغۇران ئەپەندىم ئەمدى دەرت تۆكۈپتۇ دەپ ساقچىغا مەلۇم قىلمىسۇن دەپ ئىچىمگە يۇتۇۋەتتىم خەير...

mary

ھايات گويا تىلسىملىق ئوردا،
ئۇندا باردۇر ھەرخىل قىسمەتلەر.
گاھ كۇلدۇرۇپ گاھى يىغلىتار،
يىشىپ بولماس ئۇنى كىشلەر .

جېلىليۈزى

ئەسسالامۇ ئەلەيكۇم،ئەزىزلەر،ياخشى تۇردىڭلارمۇ؟مەن ئالمىزاردىكى بىر نەچچە ئوماق كىچىك دوستلىرىمنىڭ كەينىدىن ئەگىشىپ،بۇ مۇنبەرگە ئەزا بولۇپ قالدىم!ئاشۇ ئوماقلارنى راستىنلا ياقتۇرۇپ قالدىم،شۇڭا ئۇلاردىن ئايرىلغىم كەلمىدى، بۇندىن كېىين شۇلار بىلەن  بىرگە بۇ يەرگە ئىزلىرىمنى قالدۇراي دەيمەن!

zulal0999

دەرت تۆكسەڭ دەرتمەنگە
دەردىڭنى بىلەر
يىقىلىپ قوپقانلار
يىقىلساڭ يۆلەر
كۆرىنگەنگە دەردىڭدىن زارلانما ئى جان
دەردى يوق
دەرتمەننىڭ ھالىدىن كۈلەر
                 ئۇيغۇران كۈلمەيدىغانسىز ھە؟

xemxinur

ئەسسالامۇ ئەلەيكۇم قېرىنداشلار!مەن بۇ مۇنبەرگە گەرچە يېڭى ئەزا بولساممۇ،لېكىن بىر يىلدىن بۇيان بۇ مۇنبەرنى يوقلىمىغان كۈنۈم يوق . ئىلگىرى  بەرگىيە ھەدەمنىڭ ‹خىرۇستال قىز ›،‹قانسىرىغان گۈل ›ناملىق ئەسەرلىرى ۋە ئۇيغۇران ئەپدىنىڭ ‹خىرۇستال ئوردا›ناملىق ئەسەرلىرىنىڭ تۈرۈتكىسىدە بىر قېتىم ئەزا بولغانتىم.(pari607)نامىدا.  لىكىن يىقىنندىن بۇيان  ئىچىلماي،يەنە  قايتىدىن  يەنە  ئەزا بولدۇم .مەنمۇ بۇ مۇنبەرنى بەك  ياخشى كۆرىمەن ھەم  ئىزچىل دىققەت قىپ كىلىۋاتىمەن.

bargiya

ئەسسالامۇ ئەلەيكۇم ئەلكۈيى تورىدىكى بارلىق قېرىنداشلار،ئاللاھتىن ئۇلۇغ رامىزان كۈنلىرىڭلارغا ئاسايىشلىق تىلەيمەن!
بۈگۈن 2013-يىلى چىللە ئېيىنىڭ 17-كۈنى
ۋاپا تۇپرىقى ئۈستىدە ئويلىنىشنىڭ ئالدىدا كىرىپ بۇ يەرگە ئىز قالدۇرغۇم كەلدى. تۈنۈگۈن كۆڭلۈم پەرىشان بولۇپ قالدى. سەۋەبىنى ئۇقمايمەن. بەلكىم يېزىۋاتقان ھىكايەمگە بەكلا كىرىپ كېتىپ شۇنىڭدىكى  ھىس-تۇيغۇلارنى ئۆزۈمگە يۈكلىۋالغان بولسام كېرەك. ئەتىگەن قوپسام يەنىلا بۇ خىل ئېغىر تۇيغۇلاردىن قۇتۇلالماپتىمەن. بىردىنلا بۇ خاتىرە ئېسىمگە كەلدى. كىرىپ ئايلىنىپ چىقساممۇ گۈل-غۇنچىلار قالدۇرغان خۇشپۇراقلاردىن ھوزۇر ئالساممۇ بولىدىغۇ..باھانىدە كۆڭلۈم كۆتۈرۈلۈپ قالسا ئەجەپ ئەمەس دەپ ئويلىدىم. دەرۋەقە خۇش بولدۇم. نازۇك،زۇلال،بىگانە ئىزلارنى قالدۇرۇپتۇ.بىگانە سۈزۈك ھالىتىگە قايتىشنىڭ ئەڭ سۆيۈملۈك ئىكەنلىكىنى تۇنۇغاندەك قىلىدۇ.مارىي توردىشىمىز تاتلىق-تاتلىق شېئىرلار بىلەن ئىچكى ھىسسىياتلىرىنى ئىپادىلەپتۇ.جېلىليۈزى ھەدەمنىڭ كىرگىنىدىن ئالەمچە خۇشال بولدۇمكىن ھەجەپ ياخشى دەپ ئۈنلۈك دەۋەتتىم. مەن بۇ ھەدەمگە باشقىچە ئامراق.
تابىنغۇچىنىڭ جىققىدە قۇلاقلارنى يىغىپ كەلگىنىدىنمۇ خۇرسەن بولدۇم....
شۇنداق..مانا بۇ قۇرلارنى يېزىپ ئولتۇرۇپ مەۋھۇم دۇنيادىكى دوستلىق سەمىمىيلا بولىدىكەن ھەقىقىي دوستلىق بولۇپ قالالايدىغانلىقىنى ھىس قىلىپ ئولتۇرۇپتىمەن. چەكلىك ھاياتتا مىھىر-مۇھەببەتنىڭ چەكسىز بولغىنىغا نىمە يەتسۇن قېرىنداشلىرىم.
بەرگىيە سۆزلىمەيدۇ سۆزلىسە مۇشۇنداق بەك سۆزلەيدۇ ھە..
ئەمدىكى  قۇرلار بەرگىيەنىڭ بۈگۈنكى ئىچى سىقىلىشلىرىنى يەشكۈسى!
دولقۇنلىغان مىھنەت ئېقىملىرى ئارىسىدا ئۆزۈمگە تەئەللۇق بولغان كىچىككىنە ئارامىي دۇنيا بولسىچۇ ھە! شۇلارنى ئويلاۋىتىپ قۇربانلىق قىلىنغان نۇرغۇن ۋاقىتلار ۋە نۇرغۇن نەرسىلەر كۆز ئالدىمغا كەلدى. يۈرىكىنى ئەقىدە سۈيىدە سۇغۇرالىغان كىشىلەرلا بۇ خىل قۇربانلىقنىڭ ئارقىسىدىكى مەھرۇمدىن كەلگەن خۇشاللىقنى ھىس قىلالىشى مۇمكىن .بىراق ئەلۋەتتە شۇنىڭغا لايىق جاۋابقا ئېرىشكىنىڭىزدە .. لايىق جاۋابقا ئېرىشمىسىڭىزچۇ؟كۈلۈپ تۇرۇپ توزۇغان گۈل بەرگىلىرىنى خاتىرەمگە قىستۇرۇشقا باشلىدىم.

ھارغىن دۇنيانىڭ ئاۋايلاپ ماڭغان قەدەملىرى بىزنى شۇ قەدەر مەھلىيا قىلىدۇكىن بىلىپ-بىلمەي شېرىن ئالدىنىشلارغا قەدەم قويىمىز.شېرىن ئۇيقۇغا ئورالغان مەنىۋى تەشنالىقنىڭ باغرىدا ئۇزاق چۆرگىلىدىم .يا ئۆزۈمنى يارىتالماي يا ئۆزگىنى يارىتالماي ئۆتۈپ كېتىشتەك مەغلۇبىيەت مېنى بارا-بارا ھالسىزلاندۇرۇۋاتاتتى.مېنى بۇ قەدەر ئېزىۋاتقىنى يۈرىكىمدە مۆكۈشمەك ئويناۋاتقان سوراقلار ئىدى. سوراقلارغا سۇكۇت بىلەن جاۋاب بېرىشنىڭ قىيناقلىرىدا تىتما-تالاڭ بولاتتىم.ۋۇجۇدلۇقنىڭ تەگسىز غەملىرىدە ئېزىلغان روھىمنىڭ پەريادىغا كۈلكىلىرىمنى سىڭدۈرۈپ قويۇۋاتاتتىم...ھالبۇكى بۇ كۈلكىلەر پۈتۈن ئالەمگە شەبنەم بولۇپ تارىلىۋاتاتتى. ئاۋايلاپقىنا ئاخىرقى شەبنەمنى بەرگىمگە قويدۇم. بىلەتتىم بۇ كۈن نۇرىدا قۇرىماس،شەپەقتە توزىماس ئاخىرقى شەبنەم ئىدى.

كىشىنىڭ پۇخاسى چىقمايدىغان ئەسلىمىلەرنىڭ بەتلىرىنى بىر-بىرلەپ يىرتىۋاتقان ۋاقىتتا كىشى ئۆزىنىڭ قانچىلىك چىداملىق ئىكەنلىكىنى تۇنۇپ يېتىپ ياراتقان ئىگىسىگە ھەمدۇسانا ئوقۇيدىكەن. بۈگۈنكى مەۋجۇداتلارنى يورۇتۇۋاتقان يىراق ئۆتمۈشلەرنى باغرىمدىن يۇلۇپ ئېلىپ چۆرۈۋەتتىم. چۆرۈۋەتكەن يەردىن قىپقىزىل گۈللەر ئۈنۈپ چىقىپتۇ، كىشىلەر ئۇنى بەس-بەستە پۇراپ مەدھىيىلەشمەكتە، ئېلىپ چېكىلىرىگە قىسماقتا ئىدى. مەن يىراقتا ئۇلارغا جىممىدە قاراپ تۇراتتىم.

تەبىئەت ئۆز ھوقۇقىنى پەرۋاسىزلىق بىلەن يۈرگۈزۈدىغان پەسىللەر قوينىدىكى ياز پەسلىنىڭ بىلىندۈرمەيلا ئۆتۈپ كېتىۋاتقانلىقىدىن ئاغرىنچىم يوق .بىراق شۇنچە گۈزەل يازلارنى دەسسەپ-چەيلەۋاتقان مۇھىتقا ئاغرىنىپ تۇرۇپ ئۆزۈمنى قوغداۋاتاتتىم ...
چىق..تېز چىق..قاپقاراڭغۇ چۈشلەر قوينىدىن قايتىپ چىق ئەركىم!

تۈنۈگۈن  قەلىمىم مۇنۇلارنى يازدى:

يالغۇز،يالغۇز قالغانلىرىمدا،
نىمە سىر بار يازغانلىرىمدا.
لەيلەپ يۈرەر غەمكىن بىر نىگاھ،
يىراقلاردا
ئويلىرىمدا تىنىقلىرىمدا.
تەنھا ئەمەس ئىدىم ھىچقاچان،
بىراق بۈگۈن مەن بەك پەرىشان،
چېچىۋەتتىم دېڭىزلىرىڭغا،
كۆز يېشىمنى ئەي ياۋۇز پىغان.
كۈتتۈم ئۇزاق كەلمەسلىرىڭنى،
كەلمەيسەن راست كېلىشىڭ يالغان .

atirgul

align=center]

[

align=center]

ئەزىز دوستلىرىمغا  ئەتىرگۈلدىن سالام .

بەرگىيە گۈلۈم بۇ شېئىرلار ئېسىڭىزدە بارمۇ ؟

مەن خاتىرىگە 4 پارچە رەسىم قالدۇرسام ،ھەر بىر رەسىمگە قاراپ بۇ شېئىرلارنى يىزىپ بەرگەن ئىدىڭىز  شۇ چاغدا  شېئىرلىرىڭىزنى ساقلىۋالغان ئىدىم ...مەن بۇ شېئىرىلىرىڭىزنى بەك ياختۇرىمەن ..ماڭا ئېسىل سوۋغات ئىدى.

شۇڭا باشقا دوستلارنىمۇ كۆرۇپ بەھىرلىنىشى ئۈچۈن ۇ يەرگە قالدۇرۇپ قويۇشنى توغرا كۆردۇم ..قالغان شېئىرلىرىڭىزنىمۇ  ۋاقىت چىقىرىپ بۇ يەرگە  پۇتۇپ قوياي.

رامزان كۈنلىرىڭىزگە خوشاللىق ، خاتىرجەملىكلەر تىلەيمەن ، سىزگە ئامراقمەن ھى ھى

قولۇڭنى بەر سۆيگۈڭنى بەر

قولۇڭنى بەر ،قولۇڭنى بەر كىتەيلى بىز،
سېنى دىدىم ،سىنى دەپ كەلدىم يىراقتىن.
سۈرەن سىلىپ، بورانلاردەك ھەم زارىقىپ،
سۆيۈنۈپ كەلدىم ،سۆيۈپ كەلدىم ئۇزاقتىن.

ئىككىلەنمەي چىقايلى تاغ چوققىسىغا،
بار ئالەمگە چاقنايلى ئاي-زۆھىرە بوپ.
مۇھەببەتنىڭ ئۇۋلىرىغا پۇركۈيلى،
كۆكسىمىزنى ساپ ھاۋاغا تولدۇرۇپ.

قولۇڭنى بەر ،بەر سۆيگۈڭنى ئالەمگە،
مۇزدەك سوغۇق كېچىلەردىن يىراق تۇر.
قولۇڭنى بەر، بەر كۆڭلۇڭنى  ،يۈرىكىڭنى،
ئېقىپ كېرسۇن خىرۇستالدەك سۈزۈك نۇر.[/

color]

تولۇقلىما مەزمۇن (2013-7-17 14:59):
يازمىنى تەھرىرلەش ھۇقۇقى يوق ئىكەن .. تەھرىرلىيەلمىدىم ھى ھى[/color

]

mamtimin520

بۇگۇن 2013-7-17-كۇنى  .
ئەسسالامۇ ئەلەيكۇم قىرىنداشلار  
كۇندىلىك خاتىرە دەپ تىما تۇردىكەن ئەمما  مەن مۇشۇ  ياشقا  كىرگىچە  كۇندىلىك خاتىرە يىزىپ باقماپتىكەنمەن شۇڭا بۇگۇندىن باشلاپ مەنمۇ  يىزىپ باقاي دىدىم
     بۇگۇن  قاقسەھەردە    قۇپۇپ  دۇكھنغا كىرىپ بەرگىيە  ۋاپا تۇپرىقى دىگەن ئەسەرنىڭ داۋامى قانداق بولغاندۇ دەپ  ئاچسام .   داۋامىنى  ئاخشام يىزىپتىكەن  .
ئوقۇۋالدىم تازا. ئەمدى  ئۇيغۇران قاچان  يازا      مەن ئەلكۇيىگە  (ئويغانغاندىن كىيىن) گە  ئاشىق بولۇپ ئەزا بولغانتىم ئەمما ئۇنىڭمۇ ئاخىرى  3 يىلدىن ئاشتى  تاھ ھازېرغىچە  چىقمايۋاتىدۇ .
شۇڭا     ۋاپا تۇپرىقىنىڭمۇ  داۋمى چىقىپ  تامام بولغاندا ئوقۇي دىسەم   .تىخې  قانداق قىلسام بولا  ھە  دوسلار  .  

khan ھەقىي سالاھىيەتلىك ئەزا

2013-يىلى چىللە ئېيىنىڭ 17-كۈنى، بۈگۈن ئۇيغۇران مۇنۇلارنى دېمەكچى:

ئۈلۈشكۈن ناھىيىلىك تەشۋىقات بۆلىمىدە ئىشلەيدىغان دوستۇم ماڭا «توقسۇن مۇقاملىرى» دېگەن توپلامنى سوۋغا قىلغانىدى. بۇ سوۋغىدىن ئالەمچە خۇش بولدۇم. بۇرۇن دەرد - داغ مۇقامىنى نەچچە يۈز قېتىم كۆرگەن ھەم ئاڭلىغان ئىدىم. ئەتراپىمدىكىلەر مېنى مۇقام ئاڭلاشنى ياخشى كۆرىدىغان قېرى مىجەز دېيىشىدۇ. بەلكىم شۇنداقتۇ. لېكىن مۇقام ئاڭلاشنى قېرىلىق دېگەن سەپسەتىگە ئەلۋەتتە ئىشەنمەيمەن. بۇرادىرىمىز ئەكبەرنىڭ ئوماق قىزى مەدىنەمۇ «مەن مۇقامنىڭ ۋارىسى» دېگەن ناخشىنى ئېيتىپ ناۋانى چاڭ كەلتۈرىۋەتتىغۇ ئەنە. يېزىمىزنىڭ ئوتتۇرىسىدىكى مەھەللىدە تۇغۇلۇپ چوڭ بولغان دىلشات قۇدرەتمۇ راك مۇقامىنىڭ مۇقەددىمىسىنى ئوسمان ئەمەتتەكلا ئېيتىۋەتتىغۇ. دېمەك مەن قېرى مىجەز ئەمەس. مۇقاممۇ ھەم قېرىلارغا خاس ئەمەس. ئاخشام مەكتەپتە دىجۇرنىلىك قىلغاچ توقسۇننىڭ ئالتە مۇقامى بىلەن دىلشات قۇدرەتنىڭ ناخشا كېچىلىكىنىڭ پىلاستىنكىسىنى يەنە بىر كۆرىۋەتتىم. ھە راست، توقسۇننىڭ ئالتە مۇقامىنى دەپ بېرەي:
1. دەرد - داغ مۇقامى
2. پىراق مۇقامى
3. خارابىڭمەن مۇقامى
4. مۇڭلانما مۇقامى
5. ھىجران مۇقامى
6. ۋىسال مۇقامى
يۇرتۇمدىن يەنە بىر قېتىم پەخىرلەندىم.

كىچىك ۋاقتلىرىمىزدا بالىلار بىلەن دائىم «دۇنيادا ھەممىدىن كىم يامان؟» دەپ تالىشىپ كېتىشەتتۇق. بەزىلىرىمىز سۇن ۋۇكۇڭ يامان دەيتتۇق بەزىلىرىمىز خېمەن يامان دەيتتۇق. ئىشقىلىپ تېلېۋىزوردا كۆرگەنلىرىمىز بويىچە ئۇنى - بۇنى ئەڭ يامان دەيتتۇق. ئۆتكەندە ئوغلۇممۇ مەندىن: «ئاتا، دۇنيادا ھەممىدىن ئوۋتىمەن يامانمۇ، ئۆمۈچۈك پالۋان يامانمۇ؟» دەپ سورىغان ئىدى، مەن ئوغلۇمغا: «بالام، دۇنيادا ھەممىدىن خۇدا يامان، خۇدا ھەممىنى بىلىدۇ، ھەممىمىزنى ياراتقان، ھەرقانداق ئىشنى قىلالايدۇ» دېگەن ئىدىم. بۈگۈن ئەتىگەن ئوغلۇم تۇيۇقسىزلا ماڭا شۇنداق دېدى:
__ ئاتا، مەن خۇدادىنمۇ يامان بىرىنى بىلىۋالدىم.
__ ھە، دەپ باقە، كىم يامانكەن،__ دەپ قىزىقسىنىپ سورىسام، ئوغلۇم كۆرەڭلىگەن ھالدا:
__ ئاللا يامان،__ دەيدۇ.
بالامنىڭ بۇ گېپىدىن كۈلۈپ كەتتىم ۋە بالامنىڭ بېشىنى سىلاپ تۇرۇپ:
__ بالام، خۇدا بىلەن ئاللا بىر. ئىككىسى ئوخشاش،__ دېدىم.
بالام ئوينىغىلى چىقىپ كەتكەندىن كېيىن ئويلىنىپ تۇرۇپ قالدىم. بىز كىچىك ۋاقتلىرىمىزدا سۇن ۋۇكوڭ، خېمەننى بىلەتتۇق. ھازىرقى بالىلار ئاۋتومەن، ئۆزگىرىشچان ۋاجرا، ئۆمۈچۈك پالۋاننى ئاغزىدىن چۈشۈرمەيدۇ. قاچانمۇ بىزنىڭ ئەۋلادلىرىمىز ئوغۇزخاننى، تۇمارىسنى، سادىر پالۋاننى بىلىدىغان بولار؟
ئوغلۇم ئالتە ياش كىرگۈچە خۇدا بىلەن ئاللانىڭ بىر ئىكەنلىكىنى چۈشەندۈرمىگەنلىكىمگە ئىچىم ئاچچىق بولدى. ئائىلە تەربىيىسى ھەقىقەتەن مۇھىم ئىكەن.

بۈگۈن توقسۇنغا ئوت كەتتى. 119 لازىم بولمايدىغان ئوت كەتتى. تېرىغان كۆكتاتلىرىم ئۇسساپ ئۆلەي دەپ قالدى. لازىلىرىمنىڭ ئۇچى قۇرىغىلى تۇرۇپتۇ. ئورۇندۇقتا بىردەملا ئولتۇرسا ئىشتان - پىشتان، كۆينەك - پۆينەك ھۆل بولۇپ كېتىۋاتقان. كۈندە ئىككى - ئۈچ قېتىم مۇنچىغا چۈشىۋاتقان. بۇغا تىنجىقى دەيدىغان ئىسسىق كۈنلەر كەلگەن ئوخشايدۇ.

دوستانە ئەسكەرتىش:
ئىنكاسىمنى تەنقىدلەپ تىللايدىغانلار بىلەن غەربىي دىياردىكى ئىلى بوستانلىقىدىن كېلىپ، شەرقىي دىياردىكى توقسۇن ئويمانلىقىدىن كەلگەن ئۇيغۇرانغا قارشى بىرلىكسەپ قۇرغان «تۆت كىشىلىك گۇرۇھ» ئەزالىرىنىڭ ئىنكاسىمدىن نەقىل ئېلىشىغا ۋە باھا يېزىشىغا رۇخسەت يوق. ماختايدىغانلار بولسا بەھۇزۇر ئېلىشقايلا.

(nazuk)

khan يوللىغان ۋاقتى  2013-7-17 15:54
2013-يىلى چىللە ئېيىنىڭ 17-كۈنى، بۈگۈن ئۇيغۇران مۇنۇلارنى ...

تۆت كىشىلىك گۇرۇھنىڭ ئىككىسى بار، تېخى ئىككىسى كەلمىدى. خاتىرجەم بولىڭە.