تەتىلىم

13899112969

تەتىلىم

          (شېئىرىي چاخچاق)

پىراقىڭدا ئۆلگىلى تاسلا قالدىم، تەتىلىم،
قەدىمىڭگە سۆيگىلى راسلا قالدىم، تەتىلىم.
« يۈزسىز» ئاتاپ رەنجىيتىم، بۈگۈن يەنە كەلمىسەڭ،
بۇ كۆڭۈلنى بۆلگىلى ئازلا قالدىم، تەتىلىم.

ئۇزۇن يىللار ئايرىلغان جانانىنى تاپقاندەك،
ئۈستىۋاشقا يېڭىدىن شاھانە تون ئارتقاندەك،
بولۇپ قالدىم راھەتنىڭ بۆشۈكىدە ياتقاندەك،
شەرىپىڭگە سازىمنى ياڭراق چالدىم، تەتىلىم.

سەنسىز ئۆتكەن كۈنلەرنى باستى ئەجەپ غېرىپلىق،
ماڭغان-تۇرغان قەدەملەر فورمىلاغا سېلىقلىق،
ئائىلىنىڭ غەملىرى ساڭا ئېشىپ  قېلىقلىق،
راست گەپ قىلسام خىزمەتتە ،چارچاپ-تالدىم تەتىلىىم

«ئۆلىما»لار دوق قىلار: چىشلىمەكنىڭ دەردى بار،
ۋايسىمىغىن يەلكەڭدە كەلگۈسىنىڭ قەرزى بار،
پوكىنڭنى سىلاپ كۆر، ئالغىنىڭنىڭ ھەققى بار،
«پەتىۋا»نى تىل بىلەن دوققا ئالدىم، تەتىلىم.

سېنىڭ ئۈچۈن چىدىدىم، جاپالارغا، ئۇۋالغا،
يەكشەنبىمۇ جۆر بولدۇم «غەيرەت» دىگەن شۇئارغا،
كەچقۇرۇنى تەييارمەن، دىجورنىغا تۇرارغا،
رەنجىمىگىن، باغرىمنى ساڭا ياردىم  تەتىلىم.

سېغىنىشنىڭ تەكتىنى، كېتەرىڭدە ئۇقۇپ كەت،
مۇمكىن بولسا تۆت-بەشنى يەنە ئارتۇق تۇغۇپ كەت،
«كەتسەم يەنە كېلىمەن» دىگەچ سۆيۈپ، نوقۇپ كەت،
دىمىگەيمەن سەن كەلسەڭ:كەلمە، تاندىم تەتىلىم.

كەيىپلىكمەن سەن كەلگەچ، خوشاللىقتىن مەس بەلكىم،
ئەيىپلىكمەن سەن كەلمەي، كۈنۈم ئۆتەر تەس بەلكىم،
بەرگەنلىرىڭ ئالدىدا، نەزمىلىرىم خەس بەلكىم،
قەلەم چاغلىق ، چاخچاقنى تەستە يازدىم  تەتىلىم.

چاخچىقىمنى باشقىچە نىيەت بىلەن چۈشەنمە،
مەن تانمىدىم كەسپىمدىن، ئۆسەكلەرگە ئىشەنمە،
گۇمان دىگەن ئىماننى قاچۇرغۇچى كۈشەندە،
لاتاپىتىڭ ئالدىدا ئازسام ئازدىم، تەتىلىم!