دەرستە ئارقىدا قېلىشنى مەڭگۈلۈك دېيىشكە بولمايدۇ

تۇرغۇن666

دەرستە ئارقىدا قېلىشنى مەڭگۈلۈك دېيىشكە بولمايدۇ. ۋاقىتنىڭ ئۆتۈشى بىلەن، دەرستە ئارقىدا قالغان ئوقۇغۇچى دەرستە ئەڭ ئالدىدا مېڭىشى مۈمكىن. ئوقۇغۇچىلارنىڭ دەرستە ئارقىدا قېلىشى قورقۇنچلۇق ئەمەس، قورقۇنچلۇقى ئۇلارنى كەمسىتىش، ئۇلارغا كۆيۈنمەسلىك، سەمىمىيلىك بىلەن ياردەم قىلماسلىقتۇر.
    ئوقۇتۇش، تەلىم- تەربىيە ئىلمىي، شۇنداقلا سەنئەت بولۇپ، بىلىم، ئىقتىدار، قابىلىيەت، ئەخلاق-پەزىلەت تەربىيەدىن كېلىدۇ. مېنىڭچە دەرستە ئارقىدا قالغان ئوقۇغۇچىلارنى يېتەكلەشتە:& O' ~5 ?, y2 w) u$ [! q' Y& q4 `
    ئاتا – ئانىلار پەرزەنتلىرىگە تېنچ – ئىتتىپاقلىق ئائىلە ۋە ئۆگىنىش مۇھىتى ھازىرلاپ بېرىشى، ئاتا-ئانىلار مەكتەپ بىلەن زىچ ماسلىشىپ، بالىلارنى تەلەپچان باشقۇرۇشى، بالىلىرىنىڭ دەرستىن سىرتقى ۋاقىتلىرىنى مۇۋاپىق ئورۇنلاشتۇرۇپ، لاياقەتلىك تەربىيەلىنىشىگە كۆڭۈل بولۇشى كېرەك. ئاتا – ئانىلار پەرزەنتلەر بىلەن باراۋەرلىك مۇناسىۋەت ئورنىتىپ، ئۇلارنىڭ مەخپىيەتلىكىگە ھۆرمەت قىلىپ، ياخشى ئائىلە كەيپىياتى بەرپا قىلىپ، ھەممە ئىشتا پەرزەنتلەرگە ئۈلگە بولۇپ، تۇرمۇش ۋە ئۆگىنىشتە ياخشى ئادەت شەكىللەندۈرۈشىگە ياردەم بېرىشى كېرەك.
    ئوقۇتقۇچى ‹‹ئۈچ ئالدىدا بولۇش››نى ئورۇنداش كېرەك. يەنى: ئوقۇتقۇچى دەرستە ئارقىدا قالغان ئوقۇغۇچىلارغا نىسبەتەن دەرسخانىدا سۆزلىتىشتە ئالدىدا، تاپشۇرۇقىنى تەكشۈرۈشتە ئالدىدا، ئايرىم يېتەكلەشتە ئالدىدا بولۇش كېرەك. ئۇلارنى ‹‹دۆت››، ‹‹مىڭ ئەجىر قىلغان بىلەنمۇ ئۆزگەرمەيدۇ››، ‹‹ئالغا ئىلگىرىلىشىدە ئۈمىد يوق›› دەپ قارىماي، ئۇلارنى سەۋرچانلىق، ئىنچىكىلىك بىلەن يېتەكلىشى، دەرسخانىدىكى مەشىق، دەرستىن سىرتقى مەشىق ۋە تاپشۇرۇقلاردا باشقا ئوقۇغۇچىلارغا ئوخشاش تەلەپ قويماي، ئۇلارغا ئۆزىنى ئىپادىلەش پۇرسىتى بېرىپ، ياخشى تەرەپلىرىنى ۋاقتىدا مۇئەييەنلەشتۈرۈپ، مۇۋەپپەقىيەت شادلىقىدىن بەھرىمەن قىلىشى كېرەك. بالىلاردا تېرىشچانلىق، ئىشچانلىق، چىدامچانلىق، ئىنتىلىشچانلىق ئىقتىدارىنىڭ يېتىلىشىدە ئوقۇتقۇچىنىڭ تەربىيەسى مۇھىم ئورۇندا تۇرىدۇ. شۇڭا، ئوقۇتقۇچى ئۈمىدلىك ياشلار، ئۆسمۈرلەرنى تەربىيەلەشتە، بالىلارغا ئۈمىد ۋە ئىشەنچ ئاتا قىلىپ، ئوقۇغۇچىلارنى چۈشىنىشى ۋە ئۇلارغا ئىلھام بېرىش ئارقىلىق، ئۇلارنىڭ ئىلگىرىلىشىگە يېشىل چىراغ يېقىپ بېرىشى كېرەك. ئوقۇغۇچىلارنىڭ مۇستەقىل ئۆگىنىش قابىلىيىتىنى يېتىلدۈرۈش، ئوقۇغۇچىنى مەلۇم بىر دەرسكە قىزىقتۇرۇش ئۈچۈن، ئوقۇتقۇچىدا كۈچلۈك جەلپ قىلىش مېتودى بولۇش كېرەك. ئوقۇتقۇچى دەرسخانا ۋە دەرستىن سىرتقى ۋاقىتلاردا دەرستە ئارقىدا قالغان ئوقۇغۇچىلارغا كۆپرەك دىققەت قىلىپ، ئۇلارنىڭ ئۆگىنىش پوزىتسىيەسى، ئادىتى ۋە ئۇسۇلى قاتارلىق جەھەتلەردە قانداق مەسىلىلەرنىڭ بارلىقىنى ئىگىلەپ، نىشانلىق يېتەكلەپ، ئۆگىنىش پوزىتسىيەسىنى توغرىلاپ، توغرا بولغان ئۆگىنىش ئادىتى يېتىلدۈرۈشىگە ۋە ئۆگىنىش ئۇسۇلىنى ئۆزگەرتىشىگە ياردەم بېرىش كېرەك. ئوقۇغۇچىلار ئۆزلىرىنىڭ قاراشلىرىنى ئوتتۇرىغا قويغاندا، ئوقۇتقۇچى ئەستايىدىل ئاڭلاپ، ئاساسەن توغرا بولسا ئۇنى قوللاپ، رىغبەتلەندۈرۈش كېرەك. شۇنداق قىلغاندىلا، ئوقۇغۇچىلارنىڭ ئۆزىگە بولغان ئىشەنچىسى ئېشىپ، مۇستەقىل پىكىر قىلالايدىغان، مۇھىمى مۇستەقىل ئۆگىنەلەيدىغان، ئوقۇتقۇچىغا تەشەببۇسكارلىق بىلەن يېقىنلىشىپ، دۇچ كەلگەن مەسىلىلەردە ياردەم تەلەپ قىلىدىغان بولىدۇ.
    قىسقىسى، ئوقۇتقۇچىدا ئوقۇغۇچىلارغا قارىتا توغرا ئىدىيە، يۈكسەك مەسئۇلىيەت، قىزغىن مۇھەببەت بولسىلا، دەرستە ئارقىدا قالغان ئوقۇغۇچىلارنى دەرستە ياخشى ئوقۇغۇچىلار قاتارىغا كىرگۈزگىلى بولىدۇ.