سەرداھى: ئۇيغۇرىيەنىڭ ئاۋازى

سەرداھى

ئۇيغۇرىيەنىڭ ئاۋازى(شېئىرلار)
ئەھمەد يۈسۈپ سەرداھى

سۇ
1
ئۇسساۋاتىمەن
سۇ ھەققىدە سۆزلىگۈم يوق!
مەن سۆزلەيدىغان ئاخشامقى سۆزلەر
ئاياللاردەك ئاجىز ۋە ئورۇق.
2
سۇ
ئاياللارنىڭ ھەسرىتى ئەمەس
ئەركەكلەرنىڭ جاسارىتى ھەم.
سۇ بىر پارچە يوقلۇقتۇر، ياكى
ھېچكىم سېزەلمەي تاشلىۋەتكەن تەم!
3
يالاڭئاياق پۇتلىرى بىلەن
توپا كېچىپ چوڭ بولغان قىزلار.
سۇ ئالغىلى كېلىپ ھەر كۈنى
ئېسىلغانچە كىرپىكلىرىمگە
سۇ ئۇسسۇيدۇ كۆزۈمدىن تەكرار.
4
سۇ
ئۇچۇپ كەتكەن قۇشنىڭ سايىسى
جىنەستىلىك باغلاردىن چىقىپ.
ھىچكىم سۇ ئىچىشتىن ۋاز كىچەلمەيدۇ
ئىچكۈسى بار ھەتتا دۈم يېتىپ!
5
سۇ يوق
قۇملار قايغۇلۇق!

جىمجىتلىقنىڭ ئاۋازى

جىمجىتلىق
كېچە قۇيرۇقىدىن چۈشۈپ قالغان پەي!
جىمجىتلىقنىڭ ئاۋازى يوق دىسە ئىشەنمەيمەن
جىمجىتلىقتۇر سايراۋاتقان نەي...

جىمجىتلىقنى تۇتقىلى بولماس،
جىمجىتلىقنى ئاڭلىغىلى ھەم.
جىمجىتلىقنى ھىس قىلىش كېرەك جىمجىت ئولتۇرۇپ
شۇندىلا توزۇيدۇ پورەكلىگەن غەم!

جىمجىتلىقىنى يازغىلى بولىدۇ،
جىمجىتلىقنى ئوقۇغىلى ھەم.
جىمجىتلىقنىڭ قاراڭغۇ ئىچىدە جىمجىت ئولتۇرۇپ
سۇمبۇل چاچلىرىنى تارايدۇ سەنەم.

جىمجىتلىق
ئويغاق كۆڭۈللەرنى مەستخۇش ئەيلىگەن
مۇھەببەتنىڭ سۈزۈك ئاۋازى!

ئىككىمىز

ئۆلۈم يورۇق
شەھەر قوۋۇقىغا ئېسىپ قويۇلغان.
ئاپتاپ قاراڭغۇ
تاش ئىچىدە قاناپ ئولتۇرغان.
ئىككىمىز
سىيلاپ يارىسىنى ئەستىلىكلەرنىڭ
ئىچىمىزنىڭ سىرتىدا قالغان!


قىياغا ياماشقۇچى

بىز
ئېگىز قىياغا ياماشقۇچى
قاراڭغۇ ئىچىمىزدىن قېچىپ چىقىپ...

سۆزلەيمىز رىۋايەتلەرنى يىراقتىكى
گۈللەرنىڭ گۈزەللىكىنى سۆزلەشكە رايىمىز يوق.
ئاياللار ھەققىدە ناخشا ئېيتىمىز
ئاۋازىمىز يۇمران ۋە بوغۇق!

بىز ئېگىز قىياغا ياماشقۇچى
دىلىمىز سۇنۇق!

ئىشىكنى ئاچتىم

ئىشىكنى ئاچتىم
ئالتۇن پىيالىدەك جاراڭلاپ تۇرغان
چېقىلىش لەھزىسىدىكى تەننىڭ ئىشكىنى!

بارماقلىرىمنىڭ سۈركىلىش ئىستەكلىرىگە
تەن قوڭغۇراقلىرىڭ جىرىڭلاۋاتقان.
مېنىڭ قاقاس ئېتىزلىقىمدا
چاچلىرىڭ دەريادۇر ئۆركەشلەپ ئاققان.

ئەي! كۆزلىرى بوشقىنە يۇمۇلغان دىلبەر،
ئەي! سۆزلىرى جاڭگالدا ئۇنتۇلغان دىلبەر.
كۆكسۈڭدە تىكلەنگەن دارغا ئېسىلدى،
ئۆلۈمگە ئۇدۇلدىن قاراۋاتقان ئەر.

ئىشىكنى ئاچتىم
باغلاقتىكى ئاتنى قويىۋەتتىم!
ئاۋازىڭ نەقەدەر شىرىن ھە شىرىن؟!
   كېچىنى قان بىلەن بويىۋەتتىم...

ئىشىكنى ئاچتىم
قاراڭغۇ ئىچىمدە ئۇخلاپ قالدى ئاي!

كولدۇرما

ئۇ
باھادىرنىڭ قەھرىدۇر ياكى
مۇزىكىسى ئۇيغۇر خەلقىنىڭ...

ئۇ
قىلىچ بىسىدا پارلاۋاتقان نۇر،
قۇم كۆكسىدە قاناۋاتقان چۈش.
ئاۋازىدىن جان بىرىپ چۆلگە،
يىلتىزىنى پەرلىگەن ئۆتمۈش!

ئۇ
تولۇۋاتقان ئۆزىگە-ئۆزى
يىراقتىكى ئۇيغۇر دېڭىزى!

ئۇيغۇرىيەنىڭ ئاۋازى
(قىزىم ئۇيغۇرىيەنىڭ تۇغۇلغان كۈنىگە)

سۈزۈك ۋە يېقىملىق
ئۇيغۇرىيەنىڭ ئاۋازى.
مەن ئۇنىڭ ئاۋازىدىكى نۇر تالالىرىدا ئولتۇرۇپ
خىيال قىلىمەن يىراقتىكى قىيا تاشلارنى!

ئۇيغۇرىيە ئىشىكىنى ئاچتى
ئىچىمدىكى قاراڭغۇ تاملارنى چېقىۋېتىپ.
سۈزۈلمەكتە بىر پارچە ئاسمان
ئۇيغۇرىيە چۆچەكلىرىمنى ئاڭلايتتى جىمجىت
چەكسىز ئاسماننىڭ ئاستىدا يېتىپ...

ئۇيغۇرىيەنىڭ ئاۋازى
شامالدەك ئۇچۇپ، سۇدەك ئۆركەشلەپ
سىڭىپ كەتتى تەكلىماكانغا!

كەلمەسلىكىڭ ئۈچۈن

كەلمەسلىكىڭگە قىيالايمەن
قىيالمايمەن كەتمەكچى بولساڭ.
شۇڭىلاشقىمىكىن
كەلمىسىكەن دەيمەنغۇ سېنى
دېگىن مەيلى سەن مېنى ساراڭ!

باھار قۇشى ئەمەس سەن، بەلكى
رەنجى چۆلىدە بىر تال گىياھ سەن.
سۇ بەرسەمكەن دەيتتىم لېۋىمدە،
ئۇسساپ كەتسە ناۋادا ۋەتەن!
كەتمەكچى بولساڭ، كەلمەيلا قويغىن
كەتسەڭ قۇرۇق ئوتۇندۇر بۇ تەن...!


        ئاپتۇر: ئاقسۇ كەلپىن ناھىيە ئاچال يېزا چىلان باشلانغۇچ مەكتەپ ئوقۇتقۇچىسى
阿克苏柯坪县阿恰乡其兰小学:艾哈买提玉苏浦
18997665818 TEL-
15609975818

ئامان

ھارمىغايسىز ئىنىم، ئېسىل ئىجادى لىرىكىلىرىڭىز ئارقىلىق تورداش دوستلارغا ئىستىتىك زوق بېغىشلاۋاتىسىز. رەھمەت سىزگە، ئىجادىيەت تۇلپىرىڭىز مەڭگۈ چاپچىپ تۇرغاي!

بەختىيار(بايقاش

ئىجادىيەتلىرىڭىزگە بارىكاللا بۇرادەر!ھەربىر شېئىرىڭىزنى زوق بىلەن ئوقۇپ چىقتىم،تولىمۇ ياخشى يېزىپسىز...

دىلرۇس

شېئر- ئەدەبىياتنىڭ يۇقىرى پەللىسى. ئۇنىڭ يۈكسەكلىكى، شېئرىي ئوبرازنىڭ ھەقداسىغا يەتكەن كامالىتىدىلا ئەمەس، مۇستەھكەم شېئرىي بوشلۇق، شېئرىي مۇھىت، شېئرىي تىل، شېئرىي ھېسىيات، شۇنداقلا شېئرىي پىكىرنىڭ كامالىتىدىمۇ كۆرۈلىدۇ. شېئرىدىكى ئىچكى رېتىم، ئاھاڭدارلىق، ھەمدە ئۇنىڭدىكى چىن، ساپ ھېسىيات پەقەت شائېرنىڭ شېئرىي تەپەككۈر پەرۋازىدىلا ئەركىن، جەڭگىۋار قانات قاقىدۇ. سەرداھىنىڭ يېقىندىن بۇيان مۇنبەرگە يوللىنىۋاتقان شېئرلىرى، پېقىرغا شېئرنىڭ قانداق بولىدىغانلىقىنى، قانداق يېزىلدىغانلىقىنى كۆرسىتپ قويدى. ئۇنىڭ شېئرلىرىدىن گۈپىلدەپ چىقىۋاتقان شائېرلىق تېنىقلار، نېرىۋىلىرىمنى غىدىقلاپ، مېنى شېئرغا خۇمار قىلىپ قويدى. گەپنىڭ قىسقىسى، سەرداھى شېئرلىرىنىڭ لەززىتى مېنىلا ئەمەس، مۇنبەر ئەھلىنى مەستانە قىلىۋىتتى.
قەلەم پەرۋازلىرىڭىزغا ئۇتۇق يار بولسۇن!