دادام ھايات بولغان بولسا

★parixta★ · ۋاقتى: 2013-8-6 00:07:03

                                    دادام ھايات بولغان بولسا...
                                             (فىلىيەتۇن)
                                    ئەنۋەرجان خۇجا ئەرتېكىن

   ئىنتاھاندىن ئۆتۈپ خىزمەتكىمۇ ئۇرۇنلاشتىم. ئەمما، تاغلىق يېزىغا بېرىپ قالدىم. ھەي... دادام ھايات بولغان بولسا يۇلۇمنى مېڭىپ يېقىنراق جايغا يۆتكەپ قويماسمىدى؟!
ئۆيلەندىم. ئەمما، ئۆي ئېلىشتا بېشىم قاتتى. ھەي... دادام ھايات بولغان بولسا پۇل بىرىپ تۇرغان، ياردەم قىلغان بولماسمىدى؟!
بالامغا ئەقىل كىرىپ قالدى. ئەمما، ئايىغى چىقماس سورۇندارچىلقتىن بىكار بولالماي ئۇنىڭ چۆچەك خۇمارىنى قاندۇرالمىدىم. ھەي... دادام ھايات بولغان بولسا ئەتىسى-ئاخشىمى بالامغا گۇڭۇر-مۇڭۇر ھەمراھ بولماسمىدى؟!
ئاخىر ئۆيمۇ ئالدىم. ئەمما، ئەل-ئاغىينە، خىزمەتداشلىرىم بەس-بەس بىلەن ماشنا ئېلىشقىلى تۇردى. ھەي... دادام ھايات بولغان بولسا قاراپ تۇرارمىدى؟!
خىزمەتتىنمۇ زىرىكتىم. ئەمما، بىر ئىش قىلاي دىسەم يەنە شۇ قولنىڭ قىسقىلىقى. ھەي... دادام ھايات بولغان بولسا... ئويلىرىمدىن قارىسام مەن دادامغا ئەمەس، دادام ماڭا قەرىزدار بۇلۇپ قالغاندەك تۇرامدۇ نېمە!؟

            («شىنجاڭ قانۇنچىلىق گېزىتى» 2013-يىل 19-ئاپىرىل «تامچە» بېتىدە ئېلان قىلىنغان

بەختىيار(بايقاش · ۋاقتى: 2013-8-6 11:52:15

مەزمۇنى چوڭقۇر فىلىيەتۇن ئىكەن،رەھمەت سىزگە!

pari · ۋاقتى: 2013-8-6 23:32:26

ياخشى يېزىلغان ئەسەر بىلەن ئۇچراشتۇرغىنىڭىزغا كۆپ رەھمەت .

دىلرۇس · ۋاقتى: 2013-8-7 02:36:11

دادىلىرىمىز ھايات ۋاقىتىدا ئۇنى شۇنداق يۈنۇيدىكەنمىز، ئىقتىساد، مەنىۋىي، جىسمانىي جەھەتتە. بىز دادا بولدۇق، ئەمدى بالىلىرىمىزمۇ شۇنداق قىلارمۇ بىزنى؟... رەھمەت تېمىڭىزغا.

توغراق · ۋاقتى: 2013-8-8 00:41:33

كونىلاردا سەن داداڭغا نىمە قىلساڭ بالاڭدىن كۆرىسەن دەيدىغان گەپ بار ،بىرئۇلارنى ھۆرمەتلەپ ،قەدىرلەپ ئۆتسەڭ باللىرىمىزمۇ بىزنى شۇنداق قىلىدۇ..................

مەرىپەت · ۋاقتى: 2013-8-9 11:15:52

ئاتا -ئانا خۇددى تۈگىمەس كاندەك ئېلىشنىلا بىلىدىكەنمىز يۇ بىزمۇ بېرىشنى ئۇنتۇپ قالىدىكەنمىز. رەھمەت دوستۇم...

گۈلزار · ۋاقتى: 2013-8-11 16:29:24

«ئاتا دىگەن تاغ ئىكەن .ئانا دىگەن باغ ئىكەن » دىگەن شۇدە ، ئاتىلار ھەممىمىزنىڭ روھى ۋە جىسمانى جەھەتتىكى يۆلەنچۈكىمىز . تېمىڭىزغا رەھمەت دوستۇم .

دولانلىق · ۋاقتى: 2013-8-11 16:32:20

ئاتا-ئانمىز بار ۋاقىتتا ئۇلارنى قەدىرلەيلى،ھورمەتلەيلى.

زەھرا · ۋاقتى: 2013-8-12 10:57:57

مەن تۇرمۇش قۇرۇشتىن بۇرۇنلا دادىسىز قالغان ئىدىم ،ھەر قېتىم تۇرمۇشنىڭ بوران- چاپقۇنغا يولۇققاندا « دادام بولغان بولسىچۇ؟ »دەپ ئاھ ئۇراتتىم ،....ئىشقىلىپ دادىسى ھاياتلارغا شۇنداق ھەۋىسىم كېلىدۇ.

قەسىر · ۋاقتى: 2013-8-12 18:16:02

جەمىيىتىمىزدىكى بەزى بىر ئاتا-ئانىسىگە تايىنىۋېلىپ بايۋاتچىلەردەك كۈن كەچۈرۈشنى ئويلايدىغان مۇغەمبەر كىشىلەرگە كىنايىلىك زەربە بېرىلگەن تېمىكەن.«پۇل،ئاتاڭدا بولغاندىن،ئالقىنىڭدە بولسىچۇ؟»دەيدىكەن دانالىرىمىز.مۇستەققىل ئەمگەك قىلىش،ئاتا-ئانىلارغا بېقىنىۋالماسلىق-يۆلۈنىۋالماسلىق زۆرۈردۇر.چۈنكى ئاتا-ئانىلار باقى ئەمەس!شۇنداق ئادەتلىنىپ قالغۇچىلار كېيىن ئۆزى زىيان تارتىپ قالىدۇ قولىدىن ھېچ بىر ئىش كەلمەي.......

ھېسابات		ساقلاش	پارول قايتۇرىۋېلىش
پارول			ئەزا بولىمەن

دادام ھايات بولغان بولسا

ئالاھىدە ئاگاھلاندۇرۇش:

باھا سۆز

ئىنكاس يوللاش