‹‹تۆگە ــ تۆگىلەڭ›› ئويۇنى

‹‹تۆگە ــ تۆگىلەڭ›› ئويۇنى قىش پەسلىدىن باشقا ھەممە پەسىلدە يەنى ئالاھىدە سوغۇق ۋە پەۋقۇلئاددە ئىسسىق بولمىغان ئەھۋالدا تالا ــ تۈزدە، دەل ــ دەرەخ سايىسىدا قىز ــ ئوغۇللار بىرلىكتە ئوينايدىغان قوشاقلىق ئويۇن. 

      بۇ ئويۇنغا قاتنىشىدىغان بالىلار ئۆزلىرى ئارىسىدىن تەيىنلەنگەن ئىككى ‹‹ئانا››نىڭ تاللىۋېلىشى ئارقىلىق ئىككى گۇرۇپپىغا بۆلۈنىدۇ، ھەربىر گۇرۇپپا 8 ـــ 9 غىچە بالا بولسا مۇۋاپىق بولىدۇ. ئۇلاردىن بىر گۇرۇپپا قول تۇتۇشۇپ چەمبەر ياسايدۇ. يەنە بىر گۇرۇپپا ئەزالىرى ‹‹ئانا››سىنى باشقا ئېلىپ بىر ــ بىرىنىڭ ئارقا پېشىنى تۇتۇپ بويسۈرە قاتار بولۇشۇپ، خۇددى يىراق ــ يىراقلارغا يولغا چىقىش ئالدىدا تۇرغان تۆگە كارۋىنىغا ئوخشاش سەپ تۈزگەچكە، ‹‹قاتار تۆگىلەر›› دەپمۇ ئاتىلىدۇ. سەپ تۈزگەن بالىلار ئۆز سېپىنى بۇزماستىن، دۈگىلەك بولۇپ تۇرغان بالىلارنىڭ قولى ئاستىدىن بىر ــ بىرلەپ ئۆتىدۇ. بۇ چاغدا ئىككى گۇرۇپپا ئارىسىدا قوشاق ئېتىشىش باشلىنىدۇ.

      دۈگىلەك بولۇپ تۇرغان بالىلار:

قاتار ــ قاتار تۆگىلەر،

نەگە ــ نەگە ماڭدىڭلار.

      تۆگە بولۇپ تۇرغان بالىلار:

تۇزغا ــ تۇزغا ماڭدۇق بىز.

 ـــ تۇزۇڭ نەگە تۆكۈلدى؟

ـــ ئارا يولغا تۆكۈلدى.

ـــ تاسقاپ ــ تاسقاپ ئالساڭچۇ؟

تاغىرىڭغا سالساڭچۇ؟

 ـــ تاغىرىمدا تۆشۈك بار،

ماراپ تۇرغان مۈشۈك بار.

      بۇ ئويۇن ئىككى گۇرۇپپىنىڭ ئالمىشىشى بىلەن يۇقىرىقى مەزمۇندا داۋاملىشىدۇ.

      ‹‹تۆگە ــ تۆگىلەڭ›› ئويۇنى بالىلارنى تەرتىپلىك، ئۇيۇشقاق، ھەرىكەتچان بولۇشقا، ئەستە تۇتۇش قابىلىيىتىنى ئۆستۈرۈشكە ئۈندەيدۇ.

      مۇھەممەت ئابلىز بۆرەيارنىڭ قەشقەر ئۇيغۇر نەشرىياتى تەرىپىدىن نەشر قىلىنغان ‹‹ئۇيغۇر بالىلار ئېغىز ئەدەبىياتى قامۇسى››دىن ئېلىندى.

(تەھرىر : admin)

• دەسىلەپكى مەزگىلىدىكى بالىلار تەربىيىس
• بالىلارنىڭ ھەسەتخورلۇق پىسىخىكىسىغا قا
• ‹‹موت كەتتى›› ئويۇنى
• ‹‹ئوردا تۆشۈكى›› ئويۇنى
• ‹‹ئاداش ــ ئاداش›› ئويۇنى
• سالما تاشلاش ئويۇنى
• ‹‹لام ــ جىم›› ئويۇنى
• پىلانلىق بالا
• تاپالامسىز؟
• ‹‹ئىلىشماق›› ئويۇنى
• ‹‹قارا – قارا قۇشلارىم›› ئويۇنى
• ‹‹سۇناي›› ئويۇنى
• ‹‹چىلىشىش›› ئويۇنى
• ‹‹ئىلەڭگۈچ›› ئويۇنى
• ئەنئەنىۋى بالىلار ئويۇنلىرى ۋە بۈگۈنكى
• ‹‹بىجىگەن توپ›› ئويۇنى