2014-يىلى 6-ئاينىڭ 24-كۈنى كەچ ئۈرۈمچى ۋاقتى 10:00دا، 2014-يىللىق برازىلىيە دۇنيا لوڭقىسى د گۇرۇپپا ئەڭ ئاخىرقى ئايلانما مۇسابىقىسى ناتال شەھىرى قۇم-بارخان تەنتەربىيە مەيدانىدا ئىتالىيە- ئۇرۇگۋاي ئوتتۇرىسىدا ئوينالدى.
مارجىسىئو قىزىل كارتا يەپ چۈشۈپ كېتىپ، ئىتالىيە ئون ئادەم بىلەن قالغان ئەھۋالدا، ئۇرۇگۋاي ھۇجۇمنى كۈچەيىتىپ ئاخىرىدا گودىن كاللا توپ ئۇردى، ئاخىرىدا ئۇرۇگۋاي 1-0 نەتىجىدە ئىتالىيەنى مەغلۇپ قىلىپ گۇرۇپپىدىن ئىككىنچى بولۇپ چىقتى.
مۇسابىقە باشلىنىپ7-مىنۇتتا ئۇرۇگۋاي سول تەرەپتىن بىر ئىخىتىيارى توپقا ئېرىشتى، سۇيارىس چەكلەنگەن رايون ئوتتۇرىدىن توپنى ئېسىپ قويدى، بۇففۇن توپنى توسۇپ چىقىرىۋەتتى، گونزالىز ئارقىدىن كاللا توپ ئۈسىدى، بۇففۇن يەنە تېزلىكتە چىقىرۋەتتى.
22-مىنۇتتا بالوتېللى توپ تالاشقاندا ئېگىز سەكرەپ چىقتى، باش رېپىر بالوتېللىنى ئارۋالو پېرىيرانى تىزلىۋەتتى دەپ قاراپ سېرىق كارتا بەردى.
ئالدىنقى يېرىم مەيداندا ئىككى تەرەپ شۇنداق كۆپ ھۇجۇم قىلغان بولسىمۇ، ئەمما ئىككىلا تەرەپ توپ كىرگۈزۈش پۇرسىتىنى تۇتالمىدى.
ئالدىنقى يېرىم مەيدان 0-0 نەتىجىدە تەڭلىشىپ ئاياقلاشتى.
كېيىنكى مەيدان مۇسابىقە باشلىنىپ 59-مىنۇتتا مارجىسىئو توپنى تارتقۇزۇپ قويغاندىن كېيىن قايتا توپ تالىشىپ رېپىرنىڭ ئالدىدىلا رودىرىگۇزنى يىقىتىۋەتتى، باش رېپىر دەرھال بىۋاستىلا قىزىل كارتا چىقاردى.
81-مىنۇتتا ئۇرۇگۋاي ئوڭ تەرەپتىن بۇلۇڭ توپ چىقاردى، گودىن كاللا توپ ئۇرۇپ، ئۇرۇگۋاي1-0 ئۈستۈنلىككە ئېرىشتى.
ئەڭ ئاخىرىدا ئۇرۇگۋاي 1-0 نەتىجە بىلەن ئىتالىيەنى مەغلۇپ قىلىپ گۇرۇپپىدىن ئىككىنچى بولۇپ چىقتى، يەنە بىر ياۋروپا كوماندىسى دۇنيا لوڭقىسىدىن خوشلاشتى. بۇ ھالاكەت گۇرۇپپىسىدا ئىتالىيە بىلەن ئېنگىلاند ئىككىي ياۋروپا كوماندىسى قول تۇتۇشۇپ دۇنيا لوڭقىسىدىن خوشلىشىپ ياۋروپاغا سەپەر قىلدى.
