يەم كۆكىرىشنىڭ ئالدىنى ئېلىش ۋە كۆكەرگەن يەمنى زەھەرسىزلەندۈرۈش تەدبىرلىرى

  1. كۆكىرىشنىڭ ئالدىنى ئېلىش
  (1) نەملىكنى تىزگىنلەش: بۇ، يەمنىڭ سۇ تەركىبى ۋە يەم ساقلايدىغان مۇھىتنىڭ نىسپىي نەملىكىنى تىزگىنلەشنى كۆرسىتىدۇ. دانلىق زىرائەتلەرنى يىغىۋالغاندىن كېيىن، سۇ تەركىبىنى قىسقا ۋاقىت ئىچىدە بىخەتەر دائىرىگە چۈشۈرۈش كېرەك. ئادەتتە، دانلىق زىرائەتلەرنىڭ بىخەتەر سۇ تەركىبى %13 تىن تۆۋەن بولىدۇ. مەسىلەن، كۆممىقوناقنىڭ %12 تىن، يەر ياڭىقى مېغىزىنىڭ %8 تىن تۆۋەن بولۇپ، مۇشۇنداق شارائىتتا كۆكەرتكۈچى باكتېرىيەلەر ئاسان كۆپىيەلمەيدۇ. ھەر خىل يەملەرنىڭ بىخەتەر سۇ تەركىبى ئوخشاش بولمايدۇ، ئۇنىڭدىن باشقا، يەمنىڭ بىخەتەر سۇ تەركىبى بىلەن ساقلاش تېمپېراتۇرىسى ئۆزئارا تەتۈر تاناسىپلىق مۇناسىۋەتتە بولىدۇ.
  (2) تېمپېراتۇرىنى تىزگىنلەش: يەمنى℃12 تىن تۆۋەن شارائىتتا ساقلىسا، كۆكەرتكۈچى باكتېرىيەلەرنىڭ كۆپىيىشى ۋە زەھەر ھاسىل بولۇشنى ئۈنۈملۈك تىزگىنلىگىلى بولىدۇ.
  (3)  قۇرت ۋە چاشقان زىيىنىدىن ساقلاش: ئۈسكۈنە ۋە خىمىيەلىك ئالدىنى ئېلىش تەدبىرلىرىدىن پايدىلىنىپ، ئىسكىلاتتىكى قۇرت، چاشقان قاتارلىق زىيانداشلارنى يوقىتىش كېرەك، چۈنكى قۇرت چۈشكەن ۋە چاشقان چىشلەپ قويغان يەم ئاسان كۆكىرىپ قالىدۇ.
  (4) كۆكىرىشنىڭ ئالدىنى ئېلىش دورىلىرىنى ئىشلىتىش: پىششىقلانغان يەم ۋە تەڭشەلگەن يەملەر ئاسان پاختىلىشىپ قالىدۇ، شۇڭا پىششىقلاپ ئىشلىگەندە كۆكىرىشنىڭ ئالدىنى ئېلىش دورىسى قوشۇش كېرەك. ئادەتتە، يەمنىڭ كۆكىرىپ قېلىشىنىڭ ئالدىنى ئالىدىغان دورىلاردىن ئورگانىك كىسلاتا ۋە تۇز تۈرىدىكىلەر بولۇپ، بۇنىڭ ئىچىدە پىروپىئونىك كىسلاتا ۋە تۇزلار كۆپ ئىشلىتىلىدۇ.
  2. كۆكەرگەن يەمنى زەھەرسىزلەندۈرۈش
  (1)  كۆكەرگەن دانچىلارنى يوقىتىش: زەھەر ئاساسلىق كۆكىرىپ سۈپىتى ئۆزگەرگەن يەم دانچىلىرىغا مەركەزلىشىدىغان بولغاچقا، يەمدىكى كۆكىرىپ قالغان دانچىلارنى چىقىرىۋېتىپ، ئاپتاپقا سېلىپ قۇرۇتۇپ ئاندىن ئىشلىتىش كېرەك.
  (2) قىزىتىپ بىر تەرەپ قىلىش: كۈنجۈرە تۈرىدىكى يەملەرنى℃150 لۇق تەبىئىي مۇھىتتا يېرىم سائەت قاقلاش ياكى مىكرو دولقۇنلۇق دۇخوپكىدا 9～8 مىنۇت قىزىتىش ئارقىلىق، %61～%48 ئافلاتوكسىن خۇاڭچۈمېيدۇسۇ B1 ۋە %40～%32 ئافلاتوكسىن C1 نى يوقاتقىلى بولىدۇ.
  (3) سۇدا يۇيۇش: كۆكىرىپ قالغان يەمنى پاكىز سۇدا قايتا - قايتا يۇيسا، تەركىبىدىكى سۇدا ئېرىشچان زەھەرنى چىقىرىۋەتكىلى بولىدۇ. مەسىلەن، كۆممىقوناق ۋە كانىپۇرچاق قاتارلىق دانلىق زىرائەتلەرنى ئۇۋاقلاپ بولغاندىن كېيىن، پاكىز سۇدا ياكى %2 لىك ھاك سۈيىدە قايتا - قايتا بىرقانچە قېتىم يۇيسا، يەمدىكى كۆكەرتكۈچى باكتېرىيەنىڭ زەھىرىنى يوقاتقىلى بولىدۇ.
  (4) ئادسورپىسىيەلەش (سۈمۈرۈپ يېپىشتۇرۇش) ئۇسۇلى: گاۋلىڭ توپىسى، ئاكتىپلاشتۇرۇلغان كاربون قاتارلىق ئادسورپىسىيەلىگۈچى رېياكتىۋلار كۆكەرتكۈچى باكتېرىيە زەھىرىنى سۈمۈرۈش رولىغا ئىگە بولۇپ، زەھەرسىزلەندۈرۈش ئۈنۈمى ياخشى بولىدۇ.

ھەمبەھىرلىنىڭ