روسىيە ھۆكۈمىتى باج سىياسىتى ئاساسىي يۆنىلىشى لايىھەسىنى تەستىقلىدى

      رۇسىيە ھۆكۈمىتى يېقىندا 2011 - يىللىق ۋە 2012- 2013 - يىللىق باج سىياسىتىنىڭ ئاساسىي يۆنىلىشى لايىھەسىنى تەستىقلىدى. يېڭىلىق ياراتقۇچىلارنى يۆلەش مەزكۇر لايىھەنىڭ مۇھىم نۇقتىلىرىدىن بىرىدۇر. بۇ لايىھەدە مۇنۇلار بەلگىلەندى: يېڭىلىق يارىتىش پائالىيىتى بىلەن شۇغۇللىنىدىغان باج تاپشۇرغۇچىلار 2015 - يىلىدىن ئىلگىرى (بىر قىسىم باج تاپشۇرغۇچىلارغا نىسبەتەن 2020 - يىلىدىن ئىلگىرى) سۇغۇرتا بېجى ھەققىنىڭ ئومۇمىي باج نىسبىتىنى %41 كە چۈشۈرۈشتىن ئىبارەت باجدا ئېتىبار بېرىش سىياسىتى يۈرگۈزۈلىدۇ؛ ئېنېرگىيە تېجەيدىغان ئەسۋاب - ئۈسكۈنىلەرنى ئىشلەتكۈچى ئورۇنلارغا نىسبەتەن بۇ ئەسۋاب - ئۈسكۈنىلەر ئىشلىتىلىشكە باشلىغان كۈندىن ئېتىبارەن، بۇ ئورۇنلارنىڭ ئۈچ يىللىق مۈلۈك بېجى كەچۈرۈم قىلىنىدۇ؛ يېڭىلىق يارىتىش تىپىدىكى شىركەتلەرگە نىسبەتەن مەخسۇس باجنى نازارەت قىلىش تۈزۈمى يۈرگۈزۈلىدۇ. مەسىلەن، «سىكوركوۋ» پەن - تېخنىكا باغچىسىغا نىسبەتەن مەخسۇس باجنى نازارەت قىلىش تۈزۈمى يۈرگۈزۈلىدۇ؛ تېخنىكا ئومۇملاشتۇرۇش ساھەسىدىكى كارخانا ۋە ئالىي مەكتەپ كىچىك كارخانىلىرى، شۇنداقلا ئۇچۇر تېخنىكىسى ساھەسىدىكى يۇمشاق دېتال ئىشلەپچىقارغۇچى كارخانىلارنى قوللاش تەدبىرلىرى يۈرگۈزۈلىدۇ، ۋەھاكازالار.
      بۇندىن باشقا، رۇسىيە ھۆكۈمىتى يەنە 2011 - يىلىدىن باشلاپ يامال - نېنېتس ئاپتونوم رايونىنىڭ شىمالىدىكى يېڭى نېفىتلىكتە نېفىت قېزىشتا شەرقىي سىبىرىيە نېفىتلىكىدە يەر ئاستى بايلىقىنى قازغاندا قېزىش بېجىنى كەچۈرۈم قىلغاندەك مۇمكىنچىلىك باھالىشىنى يولغا قويۇشنى ھەمدە زاپىسى بىرقەدەر ئاز بولغان يېڭى نېفىتلىك رايون بۆلىكىدە يەر ئاستى بايلىقىنى قېزىش بېجى نىسبىتى كوئېففېتسېنتىنى تۆۋەنلىتىش توغرىسىدا مۇمكىنچىلىك باھالىشىنى ئېلىپ بېرىشنى پىلانلىدى.