
جۇڭگو كوممۇنىستىك پارتىيىسى مەركىزىي كومىتېتى سىياسىي بيۇروسى دائىمىي كومىتېتىنىڭ ئەزاسى لى چاڭچۈن شۇ جاي ۋاقتى بىلەن تۈنۈگۈن چۈشتىن كېيىن سېدنىيدا ئاۋسترالىيىنىڭ مۇۋەققەت ۋالىيسى، يېڭى جەنۇبىي ۋالېس شتاتىنىڭ نازارەتچىسى مارى باشىر بىلەن كۆرۈشتى.
لى چاڭچۈن جۇڭگو - ئاۋسترالىيە ئىككى دۆلەتنىڭ مۇناسىۋىتىگە ئىجابىي باھا بەردى ھەمدە يېڭى جەنۇبىي ۋالېس شتاتىنىڭ جۇڭگو - ئاۋسترلىيە مۇناسىۋىتى تەرەققىياتىدا ئوينىغان مۇھىم رولىنى تولۇق مۇئەييەنلەشتۈردى. ئۇ مۇنداق دېدى: يېڭى جەنۇبىي ۋالېس شتاتىنىڭ بايلىقى مول، ئىقتىسادىي تەرەققىي تاپقان، پەن - تېخنىكىسى ئىلغار، مەدەنىيىتى كۆپ مەنبەلىك. يېقىنقى يىللاردىن بۇيان، جۇڭگو - ئاۋسترالىيە مۇناسىۋىتىنىڭ ئومۇميۈزلۈك تەرەققىياتىغا ئەگىشىپ، جۇڭگو بىلەن يېڭى جەنۇبىي ۋالېس شتاتىنىڭ ھەر قايسى ساھەلەردىكى بىر - بىرىگە نەپ يەتكۈزۈش ھەمكارلىقى كۆرۈنەرلىك كېڭەيدى، يېڭى جەنۇبىي ۋالېس شتاتى جۇڭگو كارخانىلىرىنىڭ ئاسترالىيىدىكى ئەڭ مەركەزلىك مەبلەغ سالغان جايى بولۇپ قالدى.
لى چاڭچۈن مۇنداق دەپ كۆرسەتتى: ئىككى دۆلەت ئوتتۇرىسىدىكى دوستلۇق ئالماشتۇرۇش ۋە بىر - بىرىگە نەپ يەتكۈزۈش ئاساسىدىكى ھەمكارلىق - ئىككى دۆلەت مۇناسىۋىتىنىڭ ئومۇميۈزلۈك تەرەققىياتىدىكى مۇھىم ئاساس ۋە قۇدرەتلىك ھەرىكەتلەندۈرگۈچ كۈچ، يېڭى جەنۇبىي ۋالېس شتاتىنىڭ جۇڭگو بىلەن ئىقتىساد - سودا ھەمكارلىقىنى يەنىمۇ چوڭقۇرلاشتۇرۇپ، مەدەنىيەت ئالاقىسىنى كۈچەيتىشىنى، ئەلئارا دوستلۇقنى ئىلگىرى سۈرۈپ، جۇڭگو - ئاۋسترالىيە دوستلۇقىنىڭ ئۈزلۈكسىز تەرەققىياتىنى ئىلگىرى سۈرۈشىنى ئۈمىد قىلىمەن.