قۇياش نۇرى : دۇنيادىكى بارلىق جانلىقلار قۇياشسىز ياشىيالمايدۇ ، ھالبۇكى ، كىشىلەر تاكى ھاياتى ئاخىرلاشقانغا قەدەر قۇياش نۇرىدىن ھەقسىز پايدىلىنىدۇ .
ھاۋا : ئادەمنىڭ تىنىقى بولىدىكەن ، چۇقۇم ھاۋانى سۈمۈرۈشكە مۇھتاج بولىدۇ . لىكىن قەدىمدىن تارتىپ ھازىرغىچە ، ھېچكىم بۇ ھاياتلىقتا كەم بولسا بولمايدىغان نەرسە ئۈچۈن ھەق تۆلەپ باققان ئەمەس .
ئاتا - ئانا مېھرى : بالا تۇغۇلغاندىن تارتىپلا ئاتا ـ ئانىسىنىڭ كۆڭۈل قۇيۇپ بېقىشىغا مۇيەسسەر بولىدۇ . بۇ بىر خىل مىننەتسىز مۇھەببەت . مەيلى پەرزەنتى قورامىغا يەتكەندە بولسۇن ۋە ياكى ئۆزلىرى كۈچ مادارىدىن كەتكەندە بولسۇن ، ئاتا ـ ئانا مۇھەببىتى سۇسلىشىپ كەتمەيدۇ . پەقەت ئۇلار ھاياتلا بولىدىكەن ، بۇ مۇھەببەت ئىزچىل بىردەكلىكنى ساقلايدۇ .
دوستلۇق مېھرى : غېرىپ ۋاقتىڭىزدا سىزگە ھەمراھ بولالايدىغان ، يىقىلغىنىڭىزدا سىزگە دادىللىق بىلەن قولىنى سۇنالايدىغان ، ئازاپلانغان چېغىڭىزدا سىزنى مېھىر بىلەن قۇچاقلايدىغان ئاشۇ دوستىڭىز سىزدىن قاچان ھەق تەلەپ قىلىپ باققان ؟
سۆيگۈ : ئىختىيارسىز ھالدا كۆڭۈل بېرىش ، بوران ـ چاپقۇندىمۇ بىرگە بولۇش ، ساختىلىق ئارلاشمىغان چىن مۇھەببەتلەرنىڭ ھەممىسى ھاياتىڭىزدىكى مەزمۇن يۆلەنچۈكىڭىزدۇر . ئەمما ئۇلار ھەقسىز . سىز ئۇلارنى كۆپ پۇل خەجلەپ سېتىۋالىمەن دېسىڭىزمۇ سېتىۋالالمايسىز .
غايە : مەيلى شاھزاە ياكى سەرگەردان بولسۇن ، ئۆزىنىڭ ھاياتلىق غايىسىنى تىكلەش ھوقۇقىغا ئىگە . ئۇ مەيلى ئۇلۇغۋار ياكى ئاددىي غايە بولسۇن ، پەقەت سىز خالىسىڭىزلا ئۇ سىزگە تەئەللۇق بولىدۇ . ئېتىقاد ، ئۈمۈد ، ئىرادە ، ئارزۇ ... قاتارلىقلارمۇ ھەقسىز . سىز بىر پۇڭ خەجلىمەيمۇ ئۇلارغا ئېرىشەلەيسىز .
ئەمدى ئۆز تەغدىرىڭىزدىن ئاغرىنىپ يۈرمەڭ . چۈنكى ئۇ ئاللىبۇرۇن سىزگە ھاياتىڭىزدىكى ئەڭ قىممەتلىك نەرسىلەرنى ئاتا قىلىپ بولغان . ئەمدىكى گەپ ، ئۇلارنى قانداق قىلىپ ئۆزىڭىز ئۈچۈن خىزمەت قىلدۇرۇش ئۆزىڭىزگە باغلىق .