مۇھەمەتجان راشىدىن

مەندە نوقسان سېنىڭدە سەۋەن،
چۈنكى، ئىنسان ساپ ئالتۇن ئەمەس.
تۈمەن سەۋەن ئادەملەرگە تەن،
چۈنكى، ئىنسان ساپ ئالتۇن ئەمەس.

قوغۇنلۇققا نېرى شۇمبۇيا،
ئاق قەغەزگە تۈكۈلگەن سىياھ:
بىرى ئەلگە بەھرى يوق گىياھ،
چۈنكى، ئىنسان ساپ ئالتۇن ئەمەس.

ئەمەللەر ئاز ، قەسەملەر تولا،
خاتا باسقان قەدەملەر تولا.
خاتا يازغان قەلەملەر تولا،
چۈنكى، ئىنسان ساپ ئالتۇن ئەمەس.

ئۇ گېپىنى<راست>دەيدۇ بىرى،
<مەن -مەن> لىكتىن يۈرمەيدۇ نېرى.
بولدى بىرى پۇلنىڭ دىلبىرى،
چۈنكى، ئىنسان ساپ ئالتۇن ئەمەس.

بىرى يۈرەر ئەلدىن ياتلىشىپ،
شورا بۇزۇپ، تامدىن ئاتلىشىپ.
كاردىن چىقتى بىرى داتلىشىپ،
چۈنكى، ئىنسان ساپ ئالتۇن ئەمەس.

ئالتۇن رەڭنىڭ نۇرغۇنلىرى مىس،
مىس ئالتۇنغا قىلىدۇ خىرىس.
كۆرۈنگەنگە بولماڭلار ھېرىس،
چۈنكى، ئىنسان ساپ ئالتۇن ئەمەس.

بېغىڭىزنى ئاچماڭ ئالدىراپ،
باغرىڭىزغا باسماڭ ئالدىراپ.
بوينىڭىزغا ئاسماڭ ئالدىراپ،
چۈنكى، ئىنسان ساپ ئالتۇن ئەمەس.

بىرلىرىنىڭ ۋەدىسى يالغان،
بىرلىرى بار يارىدىن تانغان.
بۇ سەۋەنلەر قەدىمدىن قالغان،
چۈنكى، ئىنسان ساپ ئالتۇن ئەمەس.

2001-يىلى 2-يانۋار،غۇلجا