يارىم مېنى داڭلايدۇ،
يانچۇق قاقسام ،بەش مىنۇت.
گەپلىرىمنى ئاڭلايدۇ،
ئېڭەك ياقسام بەش مىنۇت.

سۆيۈملۈكۈم دەۋېلىپ،
يۈرۈكۈمنى يەۋېلىپ،
قاچقانسېرى يىراققا..
بېقىن چىمداپ كەۋېلىپ.
يار ئۇچرامدۇ ئاشۇنداق،
بويتاق قالسام بەش مىنۇت.

ئوينايلى دەپ تانسىنى،
ئالمامسىز دەپ سامسىنى.
ئۈزۈك كۆپكەن زەگەردە،
ئېپ بېرىسىز قايسىنى؟
مىنىۋېلىپ شىللەككە،
پونى ئاتسام بەش مىنۇت.

تۇتۇپ قىممەت ئاياقنى،
قويۇڭ دەيدۇ ياق،ياقنى.
بىزمۇ ئۇنداق بوش ئەمەس،
بىكار يەيسىز تاياقنى!
قىلىمەن دەپ سايماخون،
ئۆيدە ياتسام بەش مىنۇت.

ئويناتتىم دەپ كۆزۈمنى،
قىلدىم شېرىن سۆزۈمنى.
سۈرۇق سۈرگەن لەۋ بىلەن،
سۆيدۈم تېخى يۈزۈڭنى.
مەندەك ياردىن خوش بول -دەپ،
بەدەر قاچسام بەس مىنۇت.

ئالمىساڭمۇ ئالسەن دەپ،
دۇتتارىڭنى چالسەن دەپ.
سەن ئويناشما مەن بىلەن،
پۇشايمانغا قالسەن دەپ.
قورقۇتامدۇ كۈن بويى،
پۇلنى تاپسام بەش مىنۇت.

دەيدۇ قاچان تويىمىز؟
قانچە قوينى سويىمىز؟
مابەت دىگەن ئاتاقنى،
ئەمدى قانداق يۇيىمىز؟
نۇمۇس قىلماي سۈيلەيدۇ،
ئۇچراپ قالسام بەش مىنۇت.

ۋاي بەش مىنۇت،بەش مىنۇت!
ئويلىۋەتتىم  بەش مىنۇت.
يار تۇتتۇم دەپ جاھاندىن،
تويىۋەتتىم بەش مىنۇت.
تۆۋە قىلىپ گۇناھنى،
يۇيىۋەتتىم بەش مىنۇت.
------------------------------
مەزكۇر شېئىر خەلىق ناخشىچىسى ھەسەنجاننىڭ شۇ ناملىق ناخشىسىغا تەقلىد قىلىندى. ئاپتورىنى بىلدىغانلار ئەسكەرتىش بەرگەيسىلەر. ----ئۆرۈكجان.
--------------------------------
2009-يىلى سىنتەبىر. ئۆرۈكجان.