※ كىشى كۆڭلىگە ياخشى نىيەت پۈكسە، دۇنيادا ھەممە ئىشى تىلىگىنىدەك بولىدۇ. ياخشى نىيەت قىلغان كىشىگە ياخشىلىق كېلىدۇ، ئىشنى ئەمەلگە ئاشۇرالمىسىمۇ، ساۋابقا ئېرىشىدۇ.

    ※ ئادەمگەرچىلىك قىلىش ئۈچۈن ئادىمىي بولۇش كېرەك، كىشى ئادەمگەرچىلىكنىڭ ئۇلىنى ئەنە شۇنداق قۇرۇپ چىققان.

    ※ كىمنىڭ ئەسلىي ياخشى بولسا، ھەرىكىتى يېقىملىق بولىدۇ، ياماننىڭ ئەسلىگە ئۆزى، ھەرىكىتى گۇۋاھتۇر.

    ※ كىشىلەردىن يامانلىما، ئۇششاق سۆزلىمە، توغرا سۆزلە، سۆزلەشكە تېگىشلىك سۆزنى يوشۇرما.

    ※ تىرىكلىكنى ئىزدىمە، ياخشى نام چىقىرىشنى ئىزدە، نامىڭ ياخشى بولسا، تىرىك ۋە شاد ياشىغىنىڭ شۇ.

    ※ ياخشى خۇلقلۇق كىشى موھتاجلىققا چۈشۈپ قالسا، قىلىقلىرى ۋە ياخشى مىجەز – خۇلقىمۇ ئۆزگىرىپ كېتىدۇ.

    ※ كىشىگە مال – دۇنيا كېرەك ئەمەس، ياخشى خۇي كېرەك، شۇنداق كىشى زۆرۈر بولغاندا، ھەممە ياخشى نەرسىلەرگە ئېرىشەلەيدۇ.

    ※ ياخشى قىلىق نۇرغۇن ياخشىلىقلار ئۈچۈن سەرمايىدۇر، مىجەز – خۇلقى ياخشى بولسا مىڭ تۈرلۈك شادلىقلارغا ئېرىشىدۇ.