版权声明：转载时请以超链接形式标明文章原始出处和作者信息及本声明
logs/63323771.html

قېچىپ يۈرۈپ تۇتۇلغان جەرەن 

خوجا مۇھەممەت مۇھەممەت

كۆز نۇرۇڭدۇر يۇلتۇزلار سېنىڭ
تىنىقىڭدۇر سېنىڭ شاماللار.
قۇچىقىڭدا ئەللەيلىنىمەن
لەۋلىرىڭدىن شاراب ئىچىمەن.
كىرپىكلىرىڭ ئورمانلىقىدا
ئاچ بۆرىدەك ھوۋلاپ ئۆلىمەن...
ئارام بەرمەس غالجىر خىياللار.


تېنىڭ دەريا چۇڭقۇر ۋە سۈزۈك،
يالىڭاچتۇر دەردىڭ، ھەسرىتىڭ.
سەرەڭگىدەك ئۆچكەن يېنىپلا
ئۈمىدلىرىڭ، بەختىڭ، شادلىقىڭ.
بارلىقىڭمەن، تاجۇ-تەختىڭمەن
چۈمۈلىدەك ھارماس ئىشچىمەن.
قېچىپ يۈرۈپ تۇتۇلغان جەرەن
چۈشلىرىڭدە ئۆلگەنمەن بەزەن.

ئاي يىغلىسا ئىچ ئاغرىتار كىم،
گۈل توزىسا چېكەر كىم پەرياد.
سۆيۈش ئىكەن ئەسلىدە ھايات...
سانسىز ئۆلۈم كەينىدە ۋىسال،
ئادەم دېگەن زۇلمەتلىك جامدا
چايقىلىدۇ جۇدالىق ھەيھات.

ئالدىنىشلار تەكرار ۋە تەكرار،
تىللاپ- تىللاپ ئۆڭۈپ كەتكەن سۆز
يىغلاپ- يىغلاپ ئۆچۈپ كەتكەن كۆز...
تاش قەلبىدە تاش باردۇر يەنە
كۆز يېشىدا يوقتۇر ھېچنىمە.

ئۇھ دېگۈچە ئارام بەر نەپەس،
يوتقان يىرىتقان پۇتلىرىم قېنى؟
سۆيگۈ كېسەل، كېسەل ھېسىيات،
ئەتىرگۈلدۇر كېسەل كارۋىتى.
مۇنچىدىكى قىپيالىڭاچ تەن
سىمىۋولدىن يىراق كېلەچەك.
بىر چىۋىننىڭ ئۆلۈمى بەزەن
ھەممە نەرسە گۈزەل توساتتىن
يىرگىنىشلىك توساتتىن ھەممە.
ئېھ، شۇ تاپتا ئۆلۈۋاتقان كىم
ئۇ مەن بەلكىم شۇنچە بىمەنە.
ئېھ، شۇ تاپتا يىغلاۋاتقان كىم،
ئۇ مەن ياكى ئادەم، پەرشتە