ئۈرۈمچى شەھەرلىك ج خ ئىدارىسى قاتناش ساقچى تارماق ئەترىتى قانۇنچىلىق باشقارمىسىنىڭ مۇئاۋىن باشلىقى سۈي لىفىڭنىڭ تونۇشتۇرۇشىچە ، ئۈرۈمچى شەھىرىدىكى ھەر قايسى قاتناش ساقچى چوڭ ئەترەتلىرىدە مەخسۇس قاتناش قائىدىسىگە خلاپلىق قىلىش ئۇچۇرلىرىنى تەكشۈرۈش سۇپىسى تەسىس قىلىنمىغان بولۇپ ، شوپۇرلار ئەگەر ئۆزىنىڭ قائىدىگە خلاپلىق قىلغانلىقىدىن گۇمانلانسا ، چوقۇم ج خ ئورگانلىرىغا بېرىپ سۈرۈشتۈرۈشى ، توردا ۋە جەمئىيەتتە ئېقىپ يۈرگەن ئۆسەك سۆزلەرگە ئىشەنمەسلىكى كېرەك ئىكەن .
توردا ئېقىپ يۈرگەن ئاتالمىش « 8 ماددا » ئاساسەن ئەسلىدىنلا بار بولۇپ ، بەزىلىرىنىڭ جازالاش سالمىقى ئاشۇرۇلغان . بەزىلىرى ئۆزگەرمىگەن . قاتناش ساقچىلىرى بۇ « 8 ماددا » غا تۆۋەندىكىچە ئېنىقلىما بەرگەن :
1 . قىزىل چىراغنى بۆسۈپ ئۆتسە 6 نومۇرى يىرتىلىپ ، 100 يۈەن جەرىمانە قويۇلىدۇ .
قاتناش ساقچىسى : بۇ قىسمەن توغرا . بۇ يىل 1 – يانىۋاردىن باشلاپ ، قىزىل چىراغنى بۆسۈپ ئۆتكەن شوپۇرلارنىڭ 6 نومۇرى يىرتىلىپ ، 200 يۈەن جەرىمانە قويۇلىدۇ .Ry3ئاقيول ئۇيغۇر تور بىكىتى

2 . ھاراق ئىچىپ ئاپتومۇبىل ھەيدىسە 5 يىلغىچە پراۋا ئېلىشىغا رۇخسەت قىلىنمايدۇ .
قاتناش ساقچىسى : بۇ توغرا ئەمەس . بۇ يىل 1 – يانىۋاردىن باشلاپ ، ھاراق ئىچىپ ئاپتومۇبىل ھەيدەش بىلەن مەست ھالەتتە ئاپتومۇبىل ھەيدەشكە پەرقلىق جازا قوللىنىلىدۇ :
ھاراق ئىچىپ ئاپتومۇبىل ھەيدىگەن شوپۇرنىڭ پراۋىسى 6 ئاي تۇتۇپ قېلىنىدۇ ، 12 نومۇرى يىرتىلىدۇ ھەم 1000 يۈەندىن 2000 يۈەنگىچە جەرىمانە قويۇلىدۇ . بىر قېتىم ھاراق ئىچىپ ئاپتومۇبىل ھەيدەپ جازالانغاندىن كىيىن ، يەنە ھاراق ئىچىپ ئاپتومۇبىل ھەيدىگەنلىكى بايقالسا ، شوپۇر 10 كۈندىن تۆۋەن توختىتىپ قويۇلىدۇ ، 1000 يۈەندىن 2000 يۈەنگىچە جەرىمانە قويۇلىدۇ ھەم پراۋىسى ئەمەلدىن قالدۇرۇلىدۇ . ھاراق ئىچىپ ترانسپورت ئاپتومۇبىللىرىنى ھەيدىگەن شوپۇر 15 كۈن توختىتىپ قويۇلىدۇ ، 5000 يۈەن جەرىمانە قويۇلىدۇ ، پراۋىسى ئەمەلدىن قالدۇرۇلۇش بىلەن بىللە جىنايى جاۋاپكارلىقى سۈرۈشتۈرۈلىدۇ . 5 يىل ئىچىدە قايتا پراۋا ئېلىش ئىمتىھانىغا قاتناشتۇرۇلمايدۇ .
مەست ھالەتتە ئاپتومۇبىل ھەيدىگەن شوپۇرلارنىڭ پراۋىسى ئەمەلدىن قالدۇرۇلۇپ ، جىنايى جاۋاپكارلىقى سۈرۈشتۈرۈلىدۇ ھەم 5 يىل ئىچىدە قايتا پراۋا ئېلىش ئىمتىھانىغا قاتناشتۇرۇلمايدۇ . مەست ھالەتتە ترانسپورت ئاپتومۇبىللىرىنى ھەيدىگەن شوپۇرلارنىڭ پراۋىسى ئەمەلدىن قالدۇرۇلۇپ ، جىنايى جاۋاپكارلىقى سۈرۈشتۈرۈلىدۇ ھەم 10 يىلغىچە پراۋا ئېلىش ئىمتىھانىغا قاتناشتۇرۇلمايدۇ . چەكلەش مۇددىتى توشۇپ قايتا پراۋا ئالغان ھالەتتىمۇ ترانسپورت ئاپتومۇبىللىرىنى ھەيدىشىگە رۇخسەت قىلىنمايدۇ .
ھاراق ئىچىپ ياكى مەست ھالەتتە ئاپتومۇبىل ھەيدەپ ، پەۋقۇلئاددە زور قاتناش ھادىسىسى سادىر قىلغان ھەم جىنايەت شەكىللەندۈرگەن شوپۇرلارنىڭ پراۋىسى ئەمەلدىن قالدۇرۇلۇپ ، جىنايى جاۋاپكارلىقى سۈرۈشتۈرۈلىدۇ ، شۇنداقلا ئۆمۈرۋايەت قايتا پراۋا ئېلىشىغا رۇخسەت قىلىنمايدۇ .