بوز يېگىتلىرىمىزگە نېمە بولدى؟

ئەسلى بۇ ھەقتە بىر نەرسە يازماسلىقنىمۇ ئويلىغان. يازغانلىرىم ھەرگىزمۇ ھاياسىزلىشىپ كەتكەن دۇنياغا شەھۋەت ئۇرۇقلىرىنى چېچىش ئەمەس. شۇنداق بولسىمۇ يېزىش زۆرۈر دەپ قارىدىم. قادىر ئاللاھ ئىنسانغا گۈزەل سۈپەت، قامەتلەرنى، ئەقىل-ئىدراك، ھايانى بەخشەندە قىلىپ بەرگەندە ۋۇجۇدىمىزدا غۇرۇر، جاسارەت، شىجائەتنىڭ خېمىرتۇرۇچلىرىنىمۇ قېتىپتىكەن. دەرھەقىقەت زامان تەرەققىي قىلدى. قىلىدىغان ئىشلار كۆپەيدى،شۇغىنىسى، ئىمانى زەئىپ، ئېتىقادى سۇلاش بىر قىسىم قېرىنداشلىرىمىز تەرىپىدىن مۇناسىپ ھالدا ناماز، ھايا، ئەدەپ، زاكات، پەرزلەر تەرك ئېتىلدى. ئاللاھ بۇيرىغان ئىشلار قىلىنماي، ئەكسىچە چەكلەنگەن، گۇناھ بولىدىغان ئىشلار ئەۋج ئېلىپ كەتتى. تورغا چىقساملا QQ نى ئېچىپ قويىدىغان ئادىتىم بار ئىدى. گەرچە بەك پاراڭلىشىپ كەتمىسەممۇ، بىر قىسىم ئۇچۇرلاردىن QQ توپى ئارقىلىق خەۋەردار بولاي، دەپ يېڭىلىقلاردىن خەۋەر تاپقاچ، دەرىجىسىنى ئۆستۈرۈشنى نىيەت قىلىپ شۇنداق قىلاتتىم. مۇشۇ بىرەر ئايدىن كۆپرەك ۋاقىتتىن بېرى بىر قانچە قېرىندىشىمىزنىڭ ئۆتىنىشى بىلەن دوستلار قاتارىغا ئۇلارنىمۇ قوشۇپ قويغان. دەسلەپتە نۇرمال، تەبىئي پاراڭلاشقاندۇق. ئەپسۇس، ۋاقىت ئۆتكەنسىرى بۇ لاۋزىلىقمۇ ئەۋجىگە چىقىپ، بىر نەچچە بەچچىۋازلار-تىلىمىز بويىچە ئېيتقاندا كۆتلەرگە دۈچ كېلىپ قاپتىمەن (تور دۇنياسىدا). «مەن ئۇغۇل بالىغا ئامراق ئۇغۇل بالا، دوست بولايلى»، «ئىچىڭىز پۇشۇپ قالسا كۆڭۈل ئاچايلى».... ۋە شۇنىڭغا ئوخشاش تىلغا ئالغۇسىز پەس گەپلەر بىلەن ئۇلاردىن بىر نەچچە قېتىم ئۇچۇر تاپشۇرۇپ ئالدىم. ئۇلارنى بىۋاستىلا «قارا تىزىملىك» ئىچىگە كىرگۈزىۋېتىپ، بىر يولىلا قۇتۇلۇپ كېتەي، دەپمۇ ئويلىدىم. بىراق ئۇلارنىڭ قايسى يوللار بىلەن بەچچىۋازلىقتىن ئىبارەت بۇ يولغا كىرىپ قالغىنىنى بىلگۈممۇ، ئۇلارنى ياخشى گەپلەر بىلەن تۇسۇپ قويغۇممۇ كەلدى. شۇڭا بۇ ھەقتە تەپسىلىي پاراڭلاشقانمۇ بولدۇم. ھازىرغىچە ئۈچى بىلەن پاراڭلىشىپ قالدىم. ھەممەيلەن بىلىشىمچە تېخى يىگىرمە نەچچە ياشلاردا بار نەۋقىران يىگىتلەر. بىرسى توي قىلغاننى تىلغا ئالغىنىدىن باشقا، قالغان ئىككىسى تېخى توي قىلمىغان باللا ئىكەن (گەرچە توردا ھەممىسىنى راست، دەپ كەتكىلى بولمىسىمۇ). ئۇلارنىڭ بۇ ناچار، پەسكەش يولغا كىرىپ قېلىشى بىر-ئىككى قېتىملىق قىزىقىش، ھاراقنىڭ كەيپچىلىكى... دىگەندەك سەۋەپلەرگە چېتىلىدىكەن. مەن كۆپرەك پاراڭلاشقان بىرسىنىڭ دىيىشىچە ئۇ ھازىرغىچە 20 دىن ئارتۇق ئەرلەر بىلەن بىرگە بوپ بېقىپتۇ. قالغان ئىككىسى نامەلۇم. ئۇلار ئۈچۈن AIDS (ئەيدىز) ۋە باشقا جىنسىي كېسەللەر، ئەخلاق، دىنىي بەلگىلىمىلەر ھېچنىمە ئەمەس ئىكەن. پەقەت كۆڭۈل خۇشى بولسىلا، ھۇزۇر بولسىلا بولىدىكەن. بۇنىڭ ئۈچۈن ۋاستە، ۋاقىت، يول تاللاپ ئولتۇرمايدىكەن، ھەتتا بىر قىسمى نەچچە يۈز كىلومېتىر يولنى بېسىپ كېلىپ، مېنى ئىزدىمەكمۇ بولدى. تولىمۇ ئېچىندىم، ئەپسۇسلاندىم، دىلىمنى غېرىبلىق، بۇرۇقتۇرمىلىق، شۇنداقلا چۈشىنىپ بولمايدىغان ۋەھىمە تۇيغۇسى چىرمىۋالدى.... ئاچچىق بىر خىل ئازاپ، چۈشىنىكسىز بىر خىل ئاچچىق كەچمىش دەملىرىمنى سىقىپ قويدى... ئۇلۇغ ئاللاھ، قۇرئان كەرىمنى نازىل قىلغاندا، ئىسلامنىڭ بەش تۈۋرۈكىنى ئوتتۇرغا قويغان. پاكىزلىق-پاكلىقنى ئىماننىڭ، ئىسلامنىڭ يېرىمى، دەپ بەلگىلىگەن. دىنىمىز باشتىن-ئاخىر ھايانى، ئادىمىي پەزىلەت، ئىنساپنى، جىسمانىي ۋە روھىي پاكلىقنى، ئىلىم-مەرىپەت ئىگىلەشنى تەكىتلەپ كەلدى. ئەر-ئاياللار ئوتتۇرسىدىكى نازۇك مۇناسىۋەتلەرگىچە ئېنىق پەتىۋالار بېرىلدى. ئەرلەر بىلەن ئەرلەر، ئاياللار بىلەن ئاياللار، ئىنسانلار بىلەن ھايۋانلار ئوتتۇرسىدىكى ھەرقانداق جىنسىي مۇناسىۋەت، ئۆزىنىڭ ھالال-پاك جۈپتىدىن باشقا ھەر قانداق بىر يات كىشى بىلەن بىرگە بولۇش قاتتىق گۇناھلىق ئىشلار قاتارىغا قويۇلدى، سانالدى، سانىلىپ كېلىۋاتىدۇ. ئەپسۇس، مېڭىسى يىگىلەپ، دىلىنى ئاڭقاۋلىق، جانباقتىلىق، بۇشاڭلىق، قاششاقلىق قاسماقلىرى بېسىۋالغان يوقىرىقىغا ئوخشاش بىر قىسىم قېرىنداشلىرىمىز ئۆزىنىلا ئەمەس، نۇرغۇن قىزلىرىمىزنى، قېرىنداشلىرىمىزنى چىرىتمەكتە. ئۆزىنى ھەم، ئۆزگىنى ھەم.... ئۇلارنىڭ ئۆزىنىڭ قانداق ئاقىۋەتكە قالىدىغانلىقىنى بىلىش-بىلمەسلىكى ماڭا نامەلۇم. شۇنىسى ئېنىقتىكى، ئۇلۇغ ئاللاھ بۇ ھەقتە ئېنىق بىشارەت بەرگەن. بەچچىۋازلىق (مەيلى ئەرلەر ياكى ئاياللار ئۇتتۇرسىدا بولسۇن) ئەڭ پەسكەش، ئەڭ گۇناھلىق ئىشلار قاتارىدا سانىلىدۇ، ئۇ خىل ھەرىكەتنىڭ AIDS (ئەيدىز) بىلەن يۇقۇملىنىش خەۋپىنى تېخىمۇ ئېغىرلىتىۋېتىدىغانلىقىنىمۇ مەتبۇئاتلاردىن ئاڭلاپ، كۆرۈپ تۇرىۋاتىمىز. سۆيۈملۈك قېرىنداشلار، ئۇلۇغ ئاللاھتىن دىلىمىزغا ئىنساپ، ھايا، تەۋپىق، پاك ئىمان ئاتا قىلىشىنى، شىجائەت-جاسارەتنى يار قىلىشنى تىلەيلى. ئاشۇنداق قاراڭغۇلۇقتا قالغان قېرىنداشلىرىمىزغا يولۇقساق تەربىيە، ئۆزىنى ئوڭشىۋېلىشىغا مەدەت بېرەيلى. بىھايالىق، نۇمۇسسىزلىق، شەھۋەت، شەيتاننىڭ ۋەسۋەسىلىرى دىلىمىزنى، جىسمىمىزنى خاكۇ-چاك ئەتمىسۇن. ئىمانىمىزغا دەز كەتمىسۇن. ئاللاھنىڭ غەزىپىگە كەتمەيلى ... شۇنى قوشۇپ قويايكى: مۇشۇ ئىشنى باھانە قىلىپ، قېرىنداشلىرىمىزنىڭ بۇ ھەقتە ئەھۋال ئىگىلەيمەن، دەپ بىھۇدە ۋاقتى، زېھنىنى ئىسراپ قىلماسلىقىنى ئۆتىنىمەن (بەلكىم بۇنداق ئىشقا دۈچ كەلگەنلەر خېلى كۆپتۇ)، بۇ يەردە تەپسىلىي سۆزلىمىسەكمۇ، زېھنىياتلىق قېرىنداشلىرىمىزنىڭ يازما مەزمۇنىدىن نېمە ئۈچۈن بۇ يازمىنى يېزىشىمدىكى ئاساسىي سەۋەپنى بىلىۋالالايدىغانلىقىغا ئىشىنىمەن .
مەنبە:http://boghlan.blogbus.com