يولدىشىدىن ئەيدىز يۇقتۇرغان مۇسۇلمان قىزنىڭ ھېكايىسى:

تۆۋەندىكىسى ئەرتۈرك ئەسەرلىرى بلوگىغا يوللانغان بىر سۆھبەت خاتىرسىگە يوللىغان ئىنكاسىم ئىدىم ، بلوگىمغىمۇ يوللاپ قويدۇم:

نېمىشقا تېۋىپلار ھە دېسە باھنى قۇۋۋەتلەشنى دەسمايە قىلىۋالىدۇ؟
ئەرلەر نېمىشقا لاتىلىشىپ كەتتى؟ كۆپ خوتۇنلۇق مەسىلىسى نېمىشقا ئوتتۇرىغا چىقتى؟
مانا ماۋۇلار تېپىك رېئال مەسىلىلەر ئىكەن. دېمىسىمۇ بەزىلەرنىڭ جېگەر ، يۈرەك، قان-تومۇرلاردا مەسىلە خىلى ئېغىر بولسىمۇ ئاۋۋال شۇنى داۋالىماي بۆرەكنى قۇۋۋەتلەيدىغانغا بىرمۇنچە پۇل خەجلەپ جان بىلەن ئوينىشىدۇ. ئۆلىدىغان ئىش بولسىمۇ ئوينىۋېلىپ، جىنسىي ھەۋىسىنى قاندۇرۇپ بولۇپ بېشىمغا نېمە كەلسە كۆرەي دەيدۇ.
يولدىشىدىن ئەيدىز يۇقتۇرغان مۇسۇلمان بىر قىزنىڭ ھېكايىسى:
مەن ئىسلامىي بىر ئائىلىدە تۇغۇلۇپ پاكىز بىر موھىتتا چوڭ بولدۇم. دادام-ئاناملارنىڭ تەربىيسىدە دىنىي ئىلىملەردىن تەلىم ئىلىپ قارىيە  بولدۇم.  بالاغەتكە يېتىپ چوڭ بولدۇم. ئىلگىرى بىر قېتىم توي قىلىپ ئاجرىشىپ كەتكەن، ئەيشى-ئىشرەتلىك زىنايى-زالالەتلەردىن، كۇفرى قىلىقلاردىن تەۋبە قىلىپ يېڭىدىن مۇسۇلمان بولغان بىر ئەرگە ياتلىق بولدۇم. توينىڭ دەسلىپىدە ئۇنىڭ ئىيمان-ئىتقادى، ماڭا بولغان مۇئامىلىسى ياخشى ئىدى. سەل بىر مەزگىل ئۆتكەندىن كىيىن يەنە بۇرۇنقى <<سەنەم>> گە دەسسەپ تالاغا قاترايدىغان بولىۋالدى. مىجەزى ئوساللىشىپ ئۇرۇشقاق بولۇپ كەتتى. مەينەتلىشىپ نامازنى تاشلىدى.  قانچە نەسىھەت قىلسام شۇنچە جاھىللىق قىلىپ ئۆز يولىنى تاپمىدى. شۇ ئارىلىقتا ئاللانىڭ بىرىشى بىلەن ھامىلدار بوپتىمەن. بۇنىڭدىن مەن قانچە خۇشال بولسام يولدىشىم تازا خۇشال ئەمەستەك كۆرۈندى. ئارىمىز نى كۈندىن -كۈنگە سوغۇقچىلىق چىرماشقا باشلىدى. ئاجرىشىپ كېتىدىغانمۇ بولدۇق. قورساقتىكى ھامىلە نەخ 5 ئايلىق بولغاندا يولدىشىم بالىنى ئالدۇرۋېتىشىمنى ئېيتىپ مەجبۇرى ھالدا دوختۇرغا ئىلىپ باردى. مەن ئاللاھتىن قورسىقىمدىكى بالامنى ئامان-ئىسەن قىلىشىنى تىلەپ يىغلاشتىن باشقا چارە قىلالمىدىم. ھامىلىنى ئىلىشتىن ئاۋۋالقى قان تەكشۈرۈشتە قېنىمدا ئەيدىز ۋېرۇسى بايقالدى. مېڭەمگە بىر ئاغرىق كىرىپ كەلدى. ئاللاھتىن سەبرى تىلىدىم. يولدىشىمنىڭمۇ قېنىنى تەكشۈرمەكچى بولدى. ئۇ ئۆزىنىڭ ئەيدىز ئىكەنلىكىنى ئاللىقاچان بىلىپ بولغان ئىكەن . بالىنى ئالدۇرۇشتىن ئاۋۋال مۇتەخەسىس دوختۇرلارغا مەسلەھەت سالدىم. ئۇلارنىڭ ئېيتىشىچە بەزى بىر بىخەتەرلىك تەدبىرلىرىنى قولانغاندا تۇغۇلغان بوۋاقنىڭ ئانا تېنىدىن ئەيدىز ۋىرۇسىنى يۇقتۇرۋېلىش نىسبىتى بەكلا تۆۋەن بولىدىكەن.  شۇنىڭ بىلەن مەن بۇ بالىنى تۇغۇش يولىنى تاللاپ ئاللاھتىن سالامەتچىلىك تىلىدىم. ئىگىرى << ئاللاھ بەندىسىگە بىرەر كېسەل بەرسە شۇ بەندە سەبرى قىلسا ئۇنىڭ گۇناھلىرى دەرەخنىڭ يوپۇرماقلىرى تۆكۈلگەندەك تۆكۈلۈپ كېتىدۇ>> دېگەن ھەدىسنى ئوقۇپ شۇنداق دۇئا قىلغان ئىكەنمەن: ئى ئاللا ماڭا ئەڭ ئېغىر كېسەل ئاتا قىلسىلا، گۇناھلىرىمدىن پاك بولغان ھالدا ھاياتىمنى ئاخىرلاشتۇرغايمەن!
ئاللاھ دۇئايىمنى ئىجابەت قىلغان بولسا كېرەك، پاسىق ئېرىمدىن بۇ كېسەللىك ماڭا يۇققان ئىدى.  بەك ئىچىنىپ، ئازابلىنىپمۇ كەتمىدىم. پەقەت ئىس-يادىم پەرزەنتىمنىڭ سالامەت تۇغۇلىشىدا ئىدى. ۋاقتىت-سائىتىم توشۇپ سالامەت يەڭگىۋالدىم.  ئاللاھقا كۆپ تەشەككۈرلەر بولسۇنكى تەكشۈرۈشتىن بالامدا ھېچقانداق يۇقۇملىنىش ئالامىتى بايقالماپتۇ. بالا تۇغۇلغاندىن كىيىن يولدۇشۇمنى چاقىرتقۇزۇپ ئوبدانراق بىر مۇڭدىشىپ باقماقچى بولدۇم. ھەر ئىككىلىمىزنىڭ بېشىمىزغا كەلگەن بۇ كېسەللىككە سەبرى قىلىپ ئۆيىمىزنى چىرايلىق تۇتۇپ، مۇشۇ نارەسىدە پاك پەرزەنتىمىزنى دەپ بولسىمۇ  يارىشىپ قىلىشىمىزنى ئېيتتىم. ئۇنىڭ بەرگەن جاۋابى: ئەمدى ھاياتىمنىڭ ئاخىرىغىچە قانچە ئايال بىلەن بىرگە بولالىسام ، جىنسىي ئىقتىدارىمدىن قالغۇچە، ھەتتا ئۆلگىچە ئوينىشىمنى ئوينايمەن دېگەن كۇفرانى سۆز بولدى. خەير دېدىم. ئۇنىڭ شۇ ھالىتىگە، زەئىپ ، مەينەتچىلىك بىسىپ كەتكەن روھىيتىگە، ئىبلىس چاڭگىلىغا ئىلىۋالغان پاسىق قەلبىگە ئىچىندىم.
مېنىڭ ھازىرقى ئارزۇيۇم كېسىلىمنى داۋالىتىش، بالامنى ياخشى تەربىيلەش، چىدامچان بەندە بولۇپ ئاللاھنىڭ تائەت-ئىبادىتىدە ياشاشتىن ئىبارەت.
بۇ قىزنىڭ ھىكايىسىنى تېلفۇن تۇرۇپكىسىدا ئاڭلاپ ئولتۇرۇپ بوغۇزۇمدا شۇنداق بىر ئاچچىق پەيدا بولدىكى بىر ھازا نېمە سۆز ئېتىشىمنى بىلەلمەي تۇرۇپ قالدىم.  ئىتقادىمىزدىكى، مۇسۇلمانچىلىقىمىزدىكى ساختىلىقلاردىن، جىنسىي ھەۋەس قوغلىشىپ ئىت-ئىشەك بولۇپ كېتىۋاتقان، مەسئۇلىيەتسىز ئەركەكلىرىمىزدىن قاتتىق نەپرەتلەندىم. شۇنداق ناكەسلەرنىڭ قۇربانى بولۇپ كېتىۋاتقان ئىيمان-ئىتقادلىق، پاك ئاچا-سېڭىللىرىمىزغا سەبرى تىلىدىم.
______ بىرزات