شياڭگاڭ ئۇنىۋېرسىتېتى 2015-يىلى ئىچكىرى ئۆلكىلەردىن باكلاۋۇر ئوقۇغۇچى قوبۇل قىلىش دائىرىسىنى كېڭەيتتى. كۆپلىگەن ئۆلكىلەردىن ئىلتىماس قىلغان ئوقۇغۇچىلار سانى بۇلتۇرقى ئوخشاش مەزگىلدىكىدىن ئاشقاچقا، يېقىندا شياڭگاڭ ئۇنىۋېرسىتېتى ئوقۇغۇچى قوبۇل قىلىش دائىرىسىنى كېڭەيتىدىغانلىقىنى ئېلان قىلدى، شۇنداقلا تۇنجى قېتىم بىرىنچى تۈركۈمدىن تاللاپ قوبۇل قىلىشنى سىنايدىغانلىقىنى بىلدۈردى، بارلىق ئىمتىھان بەرگۈچى ئوقۇغۇچىلار 6-ئاينىڭ 15-كۈنىدىن بۇرۇن توردا ئىلتىماس قىلىشنى تاماملىسا بولىدىكەن.

مەزكۇر پىلان بويىچە، ئىمتىھان بەرگۈچى ئوقۇغۇچىلار مۇناسىۋەتلىك ئالاھىدىلىكىنى ياكى ئىلىم-پەن تۈرىدىكى مۇسابىقە، تەنتەربىيە، سەنئەت، ئىجتىمائىي مۇلازىمەت قاتارلىق دەرستىن سىرتقى پائالىيەتكە قاتناشقانلىق ئىسپاتىنى تەمىنلىسە، شياڭگاڭ ئۇنىۋېرسىتېتى ئىلتىماس قىلغۇچى تەمىنلىگەن ماتېرىياللارغا ئاساسەن، ئالىي مەكتەپ ئىمتىھان نەتىجىسى شۇ جاينىڭ 1-تۈركۈم نومۇر سىزىقىغا يەتكەن ئوقۇغۇچىلارنى 6-ئاينىڭ كېيىنكى يېرىمىدىكى يۈز تۇرانە ئىمتىھانغا تەكلىپ قىلىدىكەن، يۈز تۇرانە ئىمتىھاندا لاياقەتلىك بولغان ئوقۇغۇچىلارنى قوبۇل قىلىش ئويلىشىلىدىكەن.

شياڭگاڭ ئۇنىۋېرسىتېتىغا ئىمتىھان بېرىشنى خالايدىغان بارلىق ئوقۇغۇچىلار، 6-ئاينىڭ 15-كۈنىدىن بۇرۇن شياڭگاڭ ئۇنىۋېرسىتېتى چوڭ قۇرۇقلۇقتا ئوقۇغۇچى قوبۇل قىلىش تورىغا چىقىپ، توردا ئىلتىماس قىلىشنى تاماملىشى كېرەك ئىكەن، ئىلتىماس قىلغۇچىلار ئالىي مەكتەپ ئىمتىھان نەتىجىسى ئېلان قىلىنغاندىن كېيىن، ئامال بار توردا ئىلتىماس قىلغان سىستېمىغا تىزىملىتىپ، ئالىي مەكتەپ ئىمتىھان نەتىجىسىنى يوللاپ بېرىشى كېرەك. شياڭگاڭ ئۇنىۋېرسىتېتى 6-ئاينىڭ كېيىنكى يېرىمىدا شېنجېن، بېيجىڭ، شاڭخەي، شيامېن، ۋۇخەن، چۇڭچىڭ، جىنەن، كۇنمىڭ، خاڭجۇ، شېنياڭ قاتارلىق 10 شەھەردە يۈز تۇرانە ئىمتىھان ئورۇنلاشتۇرىدىكەن.