شىنجاڭ ئۇيغۇر ئاپتونوم رايونلۇق مائارىپ نازارىتى تاشقى مەبلەغ تۈرى ئىشخانىسىدىن ئىگىلىگەن خەۋەرگە ئاساسلانغاندا، دۇنيا بانكىسىنىڭ شىنجاڭ كەسپى مائارىپىغا قەرز بېرىش تۈرى رەسمىي قوزغىتىلىپتۇ، مەزكۇر تۈرگە سېلىنىدىغان ئومۇمىي مەبلەغ 102 مىليون 680 مىڭ دوللار بولۇپ، تۈرگە مەسئۇل ئورۇن ئۆزى توپلايدىغان مەبلەغ 52 مىليون 680 مىڭ دوللار، دۇنيا بانكىسى شىنجاڭ كەسپى مائارىپىنى قوللاشقا ئاجراتقان قەرز 50 مىليون دوللار ئىكەن. 

شىنجاڭ ئۇيغۇر ئاپتونوم رايونلۇق پارتكوم، ھۆكۈمەتنىڭ كەسپى مائارىپ تەرەققىياتىغا يۈكسەك ئەھمىيەت بېرىشى نەتىجىسىدە، ئاپتونوم رايونىمىزدىكى كەسپى مەكتەپلەرنىڭ مەكتەپ باشقۇرۇش ئىقتىدارى ۋە سەۋىيەسى ئۈزلۈكسىز يۇقىرى كۆتۈرۈلۈپ، كەسپى تەربىيەلەش كۆلىمى ئۈزلۈكسىز كېڭەيگەن، ئوقۇش پۈتتۈرگەن ئوقۇغۇچىلارنىڭ خىزمەتكە ئورۇنلىشىش ۋە ئىگىلىك تىكلەش ئىقتىدارى كۆرۈنەرلىك يۇقىرى كۆتۈرۈلگەن بولسىمۇ، كەسپى تېخنىكا مەكتەپلىرىنىڭ ئۇل ئەسلىھە قۇرۇلۇشى، ئوقۇ-ئوقۇتۇش ئىقتىدارىنى يۇقىرى كۆتۈرۈش بوشلۇقى بار، ئوقۇتقۇچىلار قوشۇنىنىڭ ئومۇمىي ساپاسىمۇ تەرەققىياتنىڭ تەلىپىگە يېتىشەلمەيدىكەن. مەزكۇر تۈرنىڭ ئەمەلىيلىشىشى، شىنجاڭدىكى كەسپى تېخنىكا مەكتەپلىرىدىكى يۇقىرىقى مەسىلىلەرنى ئۈنۈملۈك ھەل قىلالايدىكەن.