بىر ھەيكەلتىراش تېخى بىرەر شەكلىگە كىرمىگەن يوغان بىر مەرمەر تاشنى تاراشلاۋاتاتتى، بىر بالا ئۇنىڭ ھەرىكىتىگە ھەيران بولغان ھالدا قاراپ تۇراتتى، ئارىدىن ئۇزاق ئۆتمەي بۇ مەرمەر تاش شەكىلگە كىرىشكە باشلىدى، باشتا، باش، مۈرە، بىلەك ۋە بەدەن بالىنىڭ كۆز ئالدىدا پەيدا بولدى، ئاندىن ئۇزۇن چاچ، كۆز، بۇرۇن ۋە ئېغىز پەيدا بولۇپ، ئۇزاققا قالماي بىر ساھىبجامال قىز گەۋدىلەندى. بۇ ھالدىن ھەيران بولغان بالا ھەيكەلتىراشتىن:
- ئۇستاز، بۇ قىزنىڭ مەرمەر تاشنىڭ ئىچىدە بارلىقىنى قانداق بىلدىڭىز؟- دەپ سورىۋىدى، ھەيكەلتىراش قاقاقلاپ كۈلگەندىن كېيىن مۇنداق جاۋاب بەردى:
- بۇ مەرمەر تاشنىڭ ئىچىدە ھېچقاچان بىر ساھىبجامال بولغان ئەمەس، پەقەت مەن قەلبىمدىكى قىزنى تاراشلاش تىغى بىلەن بۇ يەرگە يۆتكەپ كەلدىم.
بەرھەق، بالا تولىمۇ ساددا ۋە ئاق كۆڭۈل، ئۇنىڭ ھەيكەلتىراشلىقتىن خەۋىرى يوق، ئەمما رېئاللىقتا بالىلارچە تەسەۋۋۇرغا ئىگە قۇرامىغا يەتكەن كىشىلەر ئاز ئەمەس. بۇلارنىڭ تەسەۋۋۇرىدا مۇۋەپپەقىيەت قازىنىشنىڭ ئۇسۇللىرى بىر يەرگە قويۇلغان بولىدۇ، تەلىيى بار ئادەم ئۇنىڭغا تاسادىپىيلا ئۇچراپ قالىدۇ، ئەمما تەلەيسىز ئادەملەر ئۇنىڭغا ئۇچرىغان تەقدىردىمۇ بايقىماي يانداپ ئۆتۈپ كېتىدۇ، بىراق مۇۋەپپەقىيەت قازىنىش ئۈچۈن ئالدى بىلەن قەلبدە بىر «ساھىبجامال» بولمىسا ئاندىن قولىدا «تاراشلاش تىغى» تەييار بولمىسا، تاشنى بۇ تاراشلاش تىغى بىلەن بىر-بىرلەپ سەۋرچانلىق بىلەن تاراشلىمىسا ئۇ «ساھىبجامال» ھەرگىز پەيدا بولمايدۇ.
