مۇيەسسەر ئاباھامىت خەۋەر قىلىدۇ: شىنجاڭ ‹‹داسىن›› مەدەنىيەت تارقىتىش چەكلىك شىركىتى ئىشلىگەن، جەنۇبىي شىنجاڭدىكى بىر نەچچە ياشنىڭ يۇرتىنىڭ ئۆرۈكچىلىكىنى تەرەققىي قىلدۇرۇش جەريانى، يېزىسىنىڭ ئۆرۈكنى سېتىپ چىقىرالماسلىقتەك قىيىنچىلىقىنى ھەل قىلىدىغان يول تاپقانلىقى ئەكس ئەتتۈرۈلگەن مۇھەببەت فىلىمى ‹‹ئۆرۈك گۈللىگەندە›› (فىلىمنىڭ نامى مۇشۇنداق قويۇلغان) 10 – مارتتىن باشلاپ، شىنجاڭدىكى كىنوخانىلاردا كۆرۈرمەنلەر بىلەن يۈز كۆرۈشىدۇ.

    فىلىمدە ئىستۇدېنت كەنت ئەمەلدارى زىبا، يېزا ئىگىلىك ئۇنىۋېرسىتېتىنى پۈتكۈزۈپ يۇرتىغا قايتقان ئىستۇدېنت سەمەت قاتارلىق تۆت ياشنىڭ چىن مۇھەببىتى، ‹‹ئۆرۈك يۇرتى›› دەپ نام ئالغان شامال كەنتىنىڭ ئۆرۈكچىلىك كەسپىنى تەرەققىي قىلدۇرۇش ئۈچۈن ئالىي مەكتەپتە ئۆگەنگەنلىرى بويىچە سورتلۇق ئۆرۈك يېتىشتۈرۈپ، ھەمكارلىق كوپىراتىپى قۇرۇپ، دېھقانلارنىڭ كىرىمىنى كۆپەيتكەنلىكىدەك تەسىرلىك ئىشلىرى بايان قىلىنغان.

    ياش سېنارىست نۇرسىمان ئابدۇكېرىم يازغان سېنارىيەگە ئاساسەن ئىشلەنگەن بۇ فىلىمگە كۆپ قىسىملىق تېلېۋىزىيە تىياتىرى ‹‹ئانارخان››غا رېژىسسورلۇق قىلغان داڭلىق رېژىسسور يەن چىنشيۇ رېژىسسورلۇق قىلغان، فىلىمدە ئاكتىيورلاردىن مېھرىگۈل ئەمەت، تېلېۋىزىيە تىياتىرى <<ئانارخان>>دا قۇرباننىڭ دادىسىنىڭ رولىنى ئالغان ئىلغار ئابدۇرېھىم، قۇرباننىڭ رولىنى ئالغان ئابلىكىم ئابلەت، يېقىندا تېلېۋىزوردا قويۇلغان ئالتە قىسىملىق تېلېۋىزىيە تىياتىرى ‹‹شۇنداق بىر گۈل بار››دا رەيھانگۈلنىڭ رولىنى ئالغان دىلدار رىشات قاتارلىقلار ئاساسلىق روللارنى ئالغان.