مۇيەسسەر ئاباھامىت خەۋەر قىلىدۇ: ئاپتونوم رايونلۇق پارتكوم تەشۋىقات بۆلۈمى ئاساسىي قاتلامدىكى خەلق سەنئەتكارلىرى ۋە تەشۋىقاتچىلارنىڭ مەدەنىيەت سەۋىيەسىنى ئۆستۈرۈش مەقسىتىدە ئۇيۇشتۇرغان 3 – قېتىملىق تەربىيەلەش كۇرسى 11 – مارت ئۈرۈمچىدە باشلاندى، 15 – مارتقىچە داۋاملىشىدىغان بۇ كۇرسقا ئاپتونوم رايونىمىزدىكى 50 ناھىيە (شەھەر)دىن كەلگەن 126 خەلق سەنئەتكارى، مەدەنىيەت قابىلى قاتناشتى.

    كۇرسنىڭ تۇنجى كۈنى چۈشتىن بۇرۇن كۇرسانتلار ‹‹ئاساسىي قاتلامدا زامانىۋى مەدەنىيەتنى تەشۋىق قىلىش توغرىسىدا››، ‹‹ھەقىقىي تەربىيە مۇھەببەت ۋە پاراسەتنىڭ جەۋھىرى›› قاتارلىق تېمىلاردىكى لېكسىيەلەرنى ئاڭلىدى، چۈشتىن كېيىن ئۇلار گۇرۇپپىلارغا بۆلۈنۈپ، مەھەللىلەر ۋە شىنجاڭ سەنئەت يۇرتىدا زىيارەتتە بولدى.

    پىچان ناھىيەسىنىڭ لەمجىن بازىرى خاندۇشا كەنتىدىن كەلگەن تەشۋىقات كادىرى خەلچىگۈل ئېلى مۇنداق دېدى: مەن بىر كەنت كادىرى، بۈگۈنكى لېكسىيە ۋە زىيارەتتىن ئۆز خىزمىتىمنىڭ نەقەدەر مۇھىملىقىنى چوڭقۇر ھېس قىلدىم، ئاپتونوم رايونلۇق پارتكومنىڭ تەدبىر – ئورۇنلاشتۇرمىلىرىغا بولغان تونۇشۇم ۋە چۈشەنچەم تېخىمۇ چوڭقۇرلىشىپ، نەزەر دائىرەم كېڭەيدى، يېزىلاردا زامانىۋى مەدەنىيەتنى يېتەكچى قىلىشنىڭ ناھايىتى مۇھىملىقىنى تونۇپ يەتتىم.

    قەشقەر ۋىلايەتلىك پارتكوم تەشۋىقات بۆلۈمى لېكتورلار ئۆمىكىدىن كەلگەن يۈسۈپ كارامەت مۇنداق دېدى: مەن ئۈرۈمچىدىكى بىر نەچچە ئاھالە كومىتېتىنى زىيارەت قىلىش جەريانىدا، يۇرتىمىزدىمۇ ئىلگىرى سۈرۈشكە تېگىشلىك بىر نۇقتىنى ھېس قىلدىم. ئۈرۈمچى شەھىرىدىكى ئاساسىي قاتلام خىزمەتچىلىرىنىڭ كۆپىنچىسى ياش ئىستۇدېنتلار ئىكەن، ئۇلارنىڭ خىزمەت ئۈنۈمىمۇ ناھايىتى ياخشىكەن. بىزنىڭ كەنت پارتىيە ياچېيكا شۇجىلىرىمىزنىڭ كۆپىنچىسىنىڭ مەدەنىيەت سەۋىيەسى ناھايىتى تۆۋەن، بىزمۇ كەنتلەرگە ئىستۇدېنت كەنت كادىرلىرىنى قويساق، ئوقۇش پۈتكۈزگەن ئىستۇدېنتلارنىڭ ئىشقا ئورۇنلىشىش مەسىلىسىنى ھەل قىلىپلا قالماي، ئۇلارنىڭ رولىدىن پايدىلىنىپ ياشلارنى توغرا يولغا يېتەكلەپ، قارانىيەتلەرنىڭ ياشلارنى ئازدۇرۇپ كېتىشىدىن تېخىمۇ ياخشى ساقلانغىلى بولغىدەك.

    