سوئال - جاۋابلار

سوئال :
بەزىلەر ئاياللار دۇنيادا ئەڭ جاپاكەش ، ئۇلار نەچچە مىڭ يىلدىن بۇيان ئەرلەرنىڭ كەمسىتىشى ۋە ئېزىشىگە ئۇچراپ كەلدى ؛جاھاندا ئۇلار تارتمىغان دەرد قالمىدى ، دەيدۇ . راستتىنلا شۇلارنىڭ دېگىنىدەك ئاياللار دۇنيادىكى ھەممە دەردنى تارتىپ باققانمىدۇ ؟
- ئۈرۈمچى شەھىرىدىن : گۈلنەزەر سابىت
جاۋاب :
 ئەرلەرگىلا خاس دەردلەرنى تېخى تارتىپ باقمىغان بولۇشى مۇمكىن .

سوئال :
 ئايالىم ئېغىرئاياق ئىدى ، ئۇ بەزىلەرنىڭ « ھامىلىنىڭ قورساقتىكى شەكلىگە قاراپ ئۇنىڭ چوڭ بولغاندا قانداق ئادەم بولىدىغانلىقىنى بىلگىلى بولىدۇ » دېگەن گەپلىرىگە ئىشىنىپ ، « بالىمىز چوڭ بولغاندا پۇلدار ئادەم بولىدىكەن » دەپ كۆڭلىنى خۇش قىلىپ يۈرىدۇ. ئېيتىڭە مۇھەررىر، بالام چوڭ بولغاندا راستتىنلا شۇنداق ئادەم بولارمۇ ؟
  جاۋاب :
ئەگەر بالىڭىز ئوغۇل بولسا ، چوڭ بولغاندا چوقۇم ئەر بولىدۇ ؛ ئەگەر قىز بولسا ، چوڭ بولغاندا چوقۇم ئايال بولىدۇ .

  سوئال :
مەھەللىمىزدە كۆزنىڭ يېغىنى يەيدىغان ، ئەقىللىق بىر قىز بار . ئاڭلىسام ، ئۇ : « كەڭ - ئازادە ئۆيى بار ، ئەللىك - ئاتمىش قويى بار ، بىرەر يۈزمىڭ كويى بار ؛ ئىشلىرى ئېقىشلىق ، قامىتى يېقىشلىق » يىگىتكە ياتلىق بولارمىش . شۇنداق بولسا كۈنلىرى تاتلىققا ، ئۆيلىرى شادلىققا تولارمىش . مېنىڭ شۇ قىزغا بەكمۇ ئۆيلەنگۈم بار ئىدى . ئۆزۈمنى دەڭسەپ باقسام ، ئالدىنقى شەرتلىرىگە توغرا كەلسەممۇ ، « ئىشلىرى ئېقىشلىق ، قامىتى يېقىشلىق » دېگەن شەرتى سەل ئېغىر كېلىۋاتىدۇ . قانداق قىلسام مەقسىتىمگە يېتەلەرمەن ؟
- يەكەن بازارىدىن : نۇرمۇھەممەت
جاۋاب :
بولسىمۇ گەر ئاۋاق ، كۆرۈمسىز ،
پاك ئەمەلدار دوك ۋەزىر ليۇ يۇڭ .
بولغاچقا باي بىلىم ، تەدبىرگە،
كەلدى ھەرچاغ ئامەتلىرى ئوڭ .
جاۋاب شۇ ،
   دوستۇم نۇرمۇھەممەت :
بولسا سىزدە ئاشۇنداق خىسلەت ،
سىز تەلپۈنگەن شۇ ئوماق قىزمۇ ،
ھەمراھ بولغاي سىزگە تائەبەت .
- يەكەندىن : ئۆمەر ئىسمائىل

سوئال :
مەن بەزىدە كىشىلەر ئاغزىدىن « پالانى ۋىجدانلىق ئادەم ئىكەن ، پوكۈنى ۋىجدانسىز ئادەم ئىكەن » دېگەندەك گەپلەرنى ئاڭلاپ قالىمەن . ئۇنداقتا ۋىجدان دېگەن زادى قانداق نەرسە ؟
- قەشقەر شەھىرى نەزەرباغ يېزىسىدىن : مۇختار ئابلىز
جاۋاب :
ۋىجدان دېگەن كۆزگە چېلىقمايدىغان، قولغا چىقمايدىغان ، بىراق ھەممە ئادەم ئۆزىدە يوق دېمەيدىغان بىردىنبىر نەرسە.

سوئال :
 بىر خىزمەتدىشىم بولىدىغان. ئۇ دائىم : « مەن ساڭا قارىغاندا بەش - ئالتە ئىشتاننى ئارتۇق يىرتقان . . . » دەپ پىكىرلىرىمنى رەت قېلىۋېتىدۇ. ماڭا يول كۆرسىتىڭلارچۇ ، بەش - ئالتە ئىشتاننى سېتىۋېلىپ يىرتىۋەتسەم ئۇنىڭ بىلەن تەڭ بولالارمەنمۇ ؟ ( رىزۋانگۈل ئەزىز ئۇيغۇرىنىڭ سوئالى (
جاۋاب :
ئوقنىڭ تەگمىكى پىستاندىن ئەمەس ،
ھالاۋەت ھىممىتى مىشچاندىن ئەمەس ،
پىكىردە تەڭ بولۇش باشقىلار بىلەن ،
مېنىڭچە جىق يىرتقان ئىشتاندىن ئەمەس .
- توققۇزتارا ناھىيە دۆڭمەھەللە يېزا مۈيۈنگۈزەر مەكتەپتىن : ئابدۇخېلىل مىرخېلىل

سوئال :
يولداش مۇھەررىر، ئاق كۆڭۈللۈكنى  - ئەخمەقلىق، سېخىيلىقنى  - ئىسراپخورلۇق، » يول قويۇش »نى  - قورققانلىق، ھۆرمەت قىلىشنى  - خۇشامەت قىلىش، سۈكۈت قىلىشنى  - گالۋاڭلىق دەپ چۈشىنىدىغان مۇتتەھەملەرگە قانداق تاقابىل تۇرۇش كېرەك ؟ ( سۈپۈرگىنىڭ سوئالى (
جاۋاب :
سىزچە ئاشۇنداق قۇمدا ئولتۇرسا كاسسىسىنىڭ ئىزى قالمايدىغانلارغا تاقابىل تۇرۇشنىڭ ھاجىتى بارمۇ ؟
- « شىنجاڭ رادىئو - تېلېۋىزىيە گېزىتى »دىن مۇھەممەتجان ئەمەت يارتېكىن

سوئال :
 بوۋام ماڭا « ئىككى قوشقارنىڭ كاللىسى بىر قازاندا قاينىمايدۇ » دېگەنىدى . بىر كۈنى ئۆپكە - ھېسىپ ساتىدىغان قوشنىمىزنىڭ ئۆيىگە كىرسەم ، ئۇ قوشنىمىز ئون نەچچە كاللىنى بىر قازاندا قاينىتىۋېتىپتۇ. بۇ قانداق گەپ ؟ ( مۇختار ئابلىزنىڭ سوئالى)
جاۋاب :
بوۋىڭىزنىڭ گېپىنى يالغان دېگىلى بولمايدۇ. چۈنكى ، بوۋىڭىز ياشىغان دەۋرلەردە « ئىككى قوشقارنىڭ كاللىسى بىر قازاندا قاينىمايدىغانلىقى » راست ئىدى . سىز ياشاۋاتقان بۇ دەۋردە ، ئۆزئارا نەپ تەگسە ئون نەچچە كاللىنى بىر قازاندا قايناتسىڭىزمۇ سەن - مەن دېيىشمەيدۇ .
- ئاراتۈرۈك ناھىيە ئىقتىسادىي تەپتىش ئىدارىسىن : زىۋىيدە گالى

ژۇرنىلىمىز 2004.5 - سانىدىن