پەيلاسوپتىن سورىشىپتۇ:
_ قانداق ئادەمنى ئەقىللىق دەيمىز؟
_ يېتىش مۇمكىنچىلىكى بولغان نىشانغا پۈتۈن كۈچى بىلەن ئاتلانغان ئادەمنى.
 بىر پەيلاسوپ مۇنداق دەيدۇ:
_ ئەقىللىق ئادەم دائىم ئەينەككە قاراپ تۇرىدۇ. بۇنىڭ مۇنداق پايدىسى بار: ئەگەر چىرايى كۆرۈمسىز بولسا، ئەينەك ئۇنى ھېچ بولمىغاندا يامان ئىشلارنى قىلماسلىققا، يۈزىگە قارا سۈركىمەسلىككە ئۈندەيدۇ؛ ئەگەر چىرايى كېلىشكەن بولسا، ئەينەك ئۇنى بولمىغۇر قىلىقلار بىلەن چىرايىغا داغ تەگكۈزمەسلىككە ئۈندەيدۇ.
 بىر پەيلاسوپ مۇنداق دەيدۇ:
_ نادان ئادەملەر پەقەت باشقىلارنىڭ يېتەرسىزلىكىنىلا كۆرۈپ، ئارتۇقچىلىقىغا دىققەت قىلمايدۇ. بۇ خۇددى چىۋىننىڭ ئادەم بەدىنىدىكى پاسكىنا جايغىلا چاپلىشىۋالغىنىدەك بىر ئىش.
 بىر پەيلاسوپ مۇنداق دەيدۇ:
_ ۋاقىتلىق زىيان تارتىش ۋاقىتلىق غەلىبە قىلىشتىن كۆپ ئەۋزەل.
 ئارقار ئۆزىنى قوغلاپ كېلىۋاتقان ئوۋ ئىتىغا مۇنداق دەپتۇ:
_ سەن ماڭا مەڭگۈ يېتىشەلمەيسەن. چۈنكى، مېنىڭ يۈگۈرۈشۈم ھاياتلىق ئۈچۈن، سېنىڭ يۈگۈرۈشۈڭ بولسا ئىگەڭگە ياخشىچاق بولۇش ئۈچۈن.
 ئەتىلىككە ئېرىشكۈڭ كەلمىگەن نەرسەڭدىن بۈگۈن ۋاز كەچكىن؛ ئەتىلىككە ئېرىشسەمكەن دېگەن نەرسىنى بۈگۈن تىرىشىپ قولغا كەلتۈرگىن.
 بىر ئاقىل مۇنداق دەيدۇ:
_ بەدەن يېمەكلىككە ئېھتىياجلىق بولغانغا ئوخشاش، روھ ئەقىل - پاراسەتكە موھتاج.
 ئەرلەر مۇھەببىتىدىن مەھرۇم بولغاندا، خىزمەتكە بېرىلىش ئارقىلىق دەردىنى چىقىرىپ ئۆچ ئالىدۇ؛ ئاياللار مۇھەببىتىدىن مەھرۇم بولغاندا، دەردىنى چىقىرىپ ئۆچ ئېلىشنى ئۆزىنىڭ خىزمىتى قىلىۋالىدۇ.
 شادلىق دېگەن سېتىۋالغىلى بولىدىغان ئويۇنچۇق ئەمەس، ئۇ كىشىلىك تۇرمۇشتىن يەكۈنلەنگەن مول تەجرىبىلەرنىڭ جۇغلانمىسىدۇر.
 ئېسىڭدە بولسۇن: 20 ياشتا چىرايلىق، 30 ياشتا ساغلام، 40 ياشتا باي، 50 ياشتا ئەقىللىق بولالمىساڭ، بۇ نەرسىلەرگە مەڭگۈ ئېرىشەلمەيسەن.
 مىجەز - خاراكتېرى ئوخشاش بولمىغان قىز - يىگىتلەرنىڭ توي قىلىشى _ «بىر - بىرىنىڭ مىجەز - خاراكتېرىدىكى يېتەرسىزلىكلەرنى تولۇقلاش» دەپ ئاتىلىدۇ؛ نىكاھتىن ئاجراشقاندا بولسا «مىجەزى چىقىشالماسلىق» دەپ ئاتىلىدۇ.
 شەيتان بىرەر كىشىنى يوقلاپ بارماقچى بولسا، ھاراقنى ئۆزىگە ۋاكالىتەن ئەۋەتىدۇ.
 ئىرادىنى يېگىلى بولمايدۇ، لېكىن ئىرادىسىزلىك ئادەمنى ھەرقانداق نەرسىنى يەيدىغان قىلىۋېتىدۇ.

(ماتېرىياللاردىن قاھار تەييارلىغان)
ژۇرنىلىمىز 2004.4 - سانىدىن