سوئال:
خەلقىمىزدە «ئالماقنىڭ بەرمىكى بار» دېگەن گەپ بار. سىزنىڭچە، قان - قېنىغا نەپسانىيەتچىلىك سىڭىپ كەتكەن بەزى كىشىلەرنىڭ بىزلەرگىمۇ قايتۇرىدىغان، بېرىدىغان چاغلىرىمۇ بولارمۇ؟ (تۇردى ئوبۇلنىڭ سوئالى)
1. جاۋاب:
ئەلۋەتتە قايتۇرىدىغان چاغلىرىمۇ بولىدۇ. چۈنكى، خەلقىمىز ئارىسىدا «تۇغۇلۇپ ئۆلمىگىنىڭنى كۆرەي، قەرزدار بولۇپ بەرمىگىنىڭنى» دېگەن گەپمۇ بار ئەمەسمۇ.
- مەكىت ناھىيىلىك 1 - ئوتتۇرا مەكتەپتىن: ياسىنجان ئوسمان
2. جاۋاب:
ئۇلاردىن «يېگەن - ئىچكەنلىرىنى» قەي قىلدۇرۇشنى تەلەپ قىلالىغۇدەك ئەزىمەتلەر چىققاندا چوقۇم «ياندۇرىدۇ».
- گۇما ناھىيە مۇجى يېزىلىق ئامانەت - قەرز كوپىراتىپىدىن: مامۇت توختى
3. جاۋاب:
كەلگەنلەر كېتەر، ئالغانلار بېرەر،
بىز كۆرەلمىسەك، بالىلار كۆرەر.
باردۇر قىسمەتتە بەلكىم مۆھلىتى -
تاقەتسىزلىنىپ يۇتمىغىن زەھەر.
- پىچان ناھىيىلىك سىياسىي كېڭەش ئىشخانىسىدىن: ئابدۇل ھەمدۇل
4. جاۋاب:
نەپسى بالادىن نەرسە تەلەپ قىلماڭ ئوبۇل،
ھەتتا ئال دەپ بېرىپ قالسىمۇ قىلماڭ قوبۇل.
ئىتتىن سۆڭەك تەلەپ قىلىپ چىدامدۇ غۇرۇر؟
مېھنەت قىلىپ تېپىپ يېگەن ھەقىقىي ئوغۇل.
- قاراماي كەسپىي تېخنىكا ئىنستىتۇتى ئاھالىلەر كومىتېتىدىن: تۇرسۇن تۇردى
سوئال:
«كۆڭۈل ياتقان يەردە ئىت ياتماپتۇ» دەيمىز. ئەمما ھازىر ئىت ياتقان يەرلەردىمۇ يېتىۋېرىدىغان كۆڭۈل ئىگىلىرى خېلى كۆپ. بۇنى قانداق چۈشىنىش مۇمكىن؟ (ياسىنجان ئوسماننىڭ سوئالى)
1. جاۋاب:
ئەجەبلەنمەڭ، بۇ ئۇلارنىڭ دارۋېننىڭ «تەدرىجىي تەرەققىيات نەزەرىيىسى»نىڭ «كەم» قىسمىنى ئەمەلىيەتتىن ئۆتكۈزۈۋاتقىنى.
- ئاقسۇ شەھەرلىك 9 - باشلانغۇچ مەكتەپتىن: رەخىم راخمان
سوئال:
ھازىرقى كۈندە ھەقىقەتنىڭ كۈچى چوڭمۇ ياكى پۇل بىلەن ھوقۇقنىڭ كۈچىمۇ؟ (تۇرسۇنجان ئەرشىدىننىڭ سوئالى)
1. جاۋاب:
سىز قايسى تەرەپتە تۇرسىڭىز شۇنىڭ كۈچى چوڭ.
- گۇما ناھىيە مۇجى يېزىلىق ئامانەت - قەرز كوپىراتىپىدىن: مامۇت توختى
2. جاۋاب:
ھەقىقەت گويا ئاي، ھارارىتى يوق،
ئۆزىنى داڭلاشقا ماھارىتى يوق.
ئىگىلىپ - ئىگىلىپ تۇرىدۇ دائىم -
پۇل بىلەن ھوقۇقتەك جاسارىتى يوق.
ھەقىقەت «قاپاق«تۇر، پۇل - ھوقۇق باراڭ،
ھەقىقەت ئىزدىگەن سانىلار ساراڭ.
كىم كۈچلۈك، كىم ئاجىز ئادەمگە باغلىق،
كۆز ئېچىپ ئەتراپقا زەن سېلىپ قاراڭ.
- پىچان ناھىيلىك سىياسىي كېڭەش ئىشخانىسىدىن: ئابدۇل ھەمدۇل
ژۇرنىلىمىز 2004.3- سانىدىن
|
تورداشلارنىڭ مۇنازىرىلىرى:
