دېھقان بالىلىرىنىڭ پارچە خىراجەت سېلىقى كەچۈرۈم قىلىندى. دەرسلىك كىتابلار ھەقسىز تارقىتىپ بېرىلدى. ئەمما، بەزى رەھبەرلەرنىڭ كەيپچىلىكتە نامرات دېھقان پەرزەنتلىرىنىڭ ئەھۋالى بىلەن ئوينىشىپ قول قويۇۋەتكەن، بىر - بىرىگە ئوخشىشىپ كېتىدىغان، قاتمۇقات تېڭىلغان «يانداشما ماتېرىياللار»، «پايدىلىنىش ماتېرىياللىرى»نىڭ پۇلى ئوقۇغۇچىلار ئىلگىرى تاپشۇرۇپ كەلگەن دەرسلىك كىتابنىڭ پۇلىدىن ھەسسىلەپ ئېشىپ كەتتى. ئوقۇغۇچىلارنىڭ زىممىسىدىكى پاختا تېرىش ئەمگىكى ئارقىلىق مەكتەپ مالىيىسىگە كىرىم قىلىدىغان 15 كۈنلۈك ئەمگەك پۇلى 150 يۈەندىن 180 يۈەنگىچە ئۆستى.
_ ھۆكۈمەت شۇنچىۋالا كىتابنى ھەقسىز تارقىتىپ بېرىۋاتسا، شۇنچىلىك يانداشما ماتېرىيالنى ھەقلىق ئوقۇمامدىكەن؟ ئوقۇغۇچى دېگەن كىتاب ئوقۇمىسا نېمە ئىش قىلىدۇ؟ ئىدىيىۋى خىزمەتنى ياخشى ئىشلەڭ. بولمىسا بۇ مۇدىرلىقنى قىلالمىدىم - دەڭ، _ دېدى بىر رەھبەر مەكتەپ مۇدىرىغا.
_ ئوقۇغۇچىلارغا بولغان ئىدىيىۋى - سىياسىي خىزمەتنى كۈچەيتىڭ، كاللىسىنى ھەل قىلىڭ. بىزنىڭ مەقسىتىمىز سىزنىڭ ئىش ھەققىڭىزنى تۇتۇۋېلىش ئەمەس. سىنىپىڭىزدىكى ئوقۇغۇچىلارنىڭ داۋام تۇراقلىقى بىز بەلگىلىگەن نىسبەتكە يەتسۇن، ئوقۇغۇچىلاردىن يىغىۋېلىشقا تېگىشلىك تۈرلۈك ھەقلەرنى تولۇق يىغىپ تاپشۇرۇڭ. شۇنداق قىلسىڭىز، بىز سىزنىڭ مائاشىڭىزغا بىكاردىن - بىكار چېقىلمايمىز. بولمىسا بۇ خىزمەتنى ئىشلىيەلمىدىم دەپ، %30 تۇرمۇش پۇلى ئېلىپ ئۆيىڭىزدە ئولتۇرسىڭىزمۇ بولىدۇ. قالغان مائاشىڭىزغا ۋاقىتلىق ئوقۇتقۇچىدىن ئىككىنى تەكلىپ قىلسام، جان دەپ ئىشلەيدۇ بۇ خىزمەتنى، _ دېدى مەكتەپ مۇدىرى 12 - ئايلىق مائاشىدىنمۇ قولىغا تۈزۈك پۇل ئاشماي ھال ئېيتىپ كىرگەن سىنىپ مۇدىرىغا.
_ بىزگە ھازىر پۇل مۇھىم. قانداق، ھەرقايسىڭ گەدىنىڭدىكى پۇلنى ئەكېلىشتىڭمۇ - يوق؟ گېپىڭنى ئوچۇق قىلىش، ئەگەر دېگەن ۋاقىتتا پۇلنى تاپشۇرۇپ بولالمايدىكەنسەن، كېچىكتۈرگەن ھەربىر كۈنۈڭ ئۈچۈن جەرىمانە بىلەن قوشۇپ ئالىمەن، ئوقۇش پۈتتۈرگەندە دىپلوم ئالغىنىڭنى بىر كۆرەي، _دەپ چېچىلدى سىنىپ مۇدىرى ئۆز سىنىپىغا دەرسكە كىرىپ، ئوقۇغۇچىلارنىڭ دەرس ئۆتۈش ھەققىدىكى تەلىپىگە ئۆز - ئۆزىدىن چېچىلىپ.
_ جەرىمانە، ئەمگەك پۇلى، قوشۇمچە ماتېرىيال پۇلى دەپ ئۆيدىكى تېلېۋىزور، ۋېلىسىپىت، ئاشلىق، قوي - كالىلىرىمىزنى تارتىۋېلىپمۇ يەنە تويمىغانمىدۇ بۇ مەكتەپ؟ _ دەپ غۇدۇراشتى ئوقۇغۇچىلار.
ئەتراپىڭىزغا قاراپ بېقىڭ. زادى مۇشۇ گەپلەرنىڭ قانچىلىكى راست؟
(ئاپتور: مارالبېشى ناھىيە ئاۋات بازارلىق ئوتتۇرا مەكتەپتە)