«جاۋاب بېرىڭ» گە جاۋابلار

سوئال:
 خەلقىمىزدە «ئالماقنىڭ بەرمىكى بار» دېگەن گەپ بار. سىزنىڭچە، قان-قېنىغا نەپسانىيەتچىلىك سىڭىپ كەتكەن بەزى كىشىلەرنىڭ بىزلەرگىمۇ قايتۇرىدىغان، بېرىدىغان چاغلىرى بولارمۇ ؟ (تۇردى ئوبۇلنىڭ سوئالى )
جاۋاب:
 ئەلۋەتتە بولىدۇ، بىرى، ئۇلارنىڭ سىزگە ھاجىتى چۈشكەندە ؛ يەنە بىرى، ئۇلارنىڭ بېشىغا كۈن چۈشكەندە.

سوئال:
 ھازىر جەمئىيەتتە ئاياللارنىڭ كىيىملىرى بارغانسېرى نېپىز، بارغانسېرى تار، بارغانسېرى ئاز بولۇپ، يېرىم يالىڭاچ يۈرۈش ئەۋج ئالماقتا. ناۋادا بۇ ئىشلار تەرەققىي قىلىپ، يالىڭاچ يۈرۈش مودا بولۇپ كەتسە، پاختىكارلار، توقۇمىچىلىق فابرىكىلىرى ۋە كىيىم تىكىپ ساتقۇچىلار ئىشسىز قېلىپ، «مۇقىملىق» بۇزۇلۇپ كېتەرمۇ ؟ (تۇردى ئوبۇلنىڭ سوئالى)
جاۋاب:
 ئۇنىڭدىن ئەنسىرەشنىڭ ھاجىتى يوق. چۈنكى ئۇ چاغدا ئەرلەر قېلىنراق كىيىنىشكە، يۈزىگە چۈمبەل تارتىشقا توغرا كېلەر، شۇنىڭغىمۇ رەخت كېتىدۇ ئەمەسمۇ؟

سوئال:
 «كۆڭۈل ياتقان يەردە ئىت ياتماپتۇ» دەيمىز، ئەمما ھازىر ئىت ياتقان يەرلەردىمۇ يېتىۋېرىدىغان كۆڭۈل ئىگىلىرى خېلى كۆپ. بۇنى قانداق چۈشىنىش مۇمكىن ؟ (ياسىنجان ئوسماننىڭ سوئالى)
جاۋاب:
 بۇ، ھايۋانلار بىلەن ئىنسانلارنىڭ مىجەز-خۇلقى، خاراكتېرنىڭ بىر-بىرىگە يېقىنلىشىۋاتقانلىقىنىڭ ئالامىتىمىكىن؟ سىزنىڭچە قانداق؟

سوئال:
ھازىرقى كۈندە ھەقىقەتنىڭ كۈچى چوڭمۇ ياكى پۇل بىلەن ھوقۇقنىڭ؟ (تۇرسۇنجان ئەرشىنىڭ سوئالى)
جاۋاب:
 قايسىسىنىڭ قىممىتى چوڭ بولسا، شۇنىڭ كۈچى چوڭ.

سوئال:
 ئېشەك بىر قېتىم پۇتى كىرىپ كەتكەن كۆۋرۈكتىن ئىككىنچىلەپ ئۆتكىلى ئۇنىمايدىكەن، ئەمما ئادەم «بىر قېتىم پۇتى كىرىپ كەتكەن كۆۋرۈك»تىن ئون قېتىملاپ ئۆتسىمۇ كۆڭلى تىنمايدىكەن. ئويلىنىپ قالدىم: زادى ئادەم ئەقىللىقمۇ ياكى ئېشەكمۇ ؟(مامۇت توختىنىڭ سوئالى)
جاۋاب:
 مېنىڭچە، بىر قېتىم پۇتى كىرىپ كەتكەن كۆۋرۈكتىن ئۆتكىلى ئۇنىماسلىق - ئېشەكچە ئەقىل ؛ مەغلۇبىيىتىگە تەن بەرمەسلىك بولسا - ئادەمچە ئەقىل.
 -چەرچەن ناھىيە 3-ئولتۇراق رايونىدىن: شېرىنگۈل مۇسا

ژۇرنىلىمىز 2004.2 - سانىدىن