«جاۋاب بېرىڭ»گە جاۋابلار

سوئال: مەن بەزى كىشىلەردىن »ئون گۈلۈمنىڭ بىرىمۇ ئېچىلمىدى» دېگەن گەپنى ئاڭلاپ قالىمەن. ئۇنداقتا ھەممە ئادەمنىڭ راستتىنلا ئون گۈلى بولامدۇ؟ قانداق بولسا ئون گۈلى ئېچىلغان بولىدۇ؟ (ئادىل ھاشىمنىڭ سوئالى)
جاۋاب:
 «ئۇيغۇرۇمنىڭ تويلارىغا نېمە يەتسۇن»
گۈلى بولماس ۋىسالىغا يەتمىگەننىڭ.
ئون گۈلىنىڭ بىرىمۇ ھەم نە ئېچىلسۇن،
گۈللەر تېرىپ، جەبىر-جاپا چەكمىگەننىڭ.
ئون گۈلى تەڭ ئېچىلمىسا كەس قۇلاقنى
بەخت قۇچۇپ بۇنداق جاندىن كەچمىگەننىڭ.
- يېڭىشەھەر ناھىيىلىك ئوقۇتقۇچىلار بىلىم ئاشۇرۇش مەكتىپىدىن: ئابلىمىت ئىبراھىم

سوئال: بەزىلەر «تەقدىر ئادەمنى، ئادەم تەقدىرنى ئىزدەپ يۈرىدۇ» دەيدىكەن. مەن خېلى يىللاردىن بېرى تەقدىرنى ئىزدەپ تاپالمىدىم. تەقدىر دېگەن زادى قانداق نەرسە؟ مەن ئۇنى قاچانلىققا تاپالايمەن؟ (ئابدۇقېييۇم سۇلتاننىڭ سوئالى).
(1) جاۋاب:
 تەقدىر ئۇ - مەيدانسىز، يۇمۇلاق تاۋۇز،
بەزىدە مېھرىبان، بەزىدە ياۋۇز.
تەدبىرىڭ بولمىسا تېپىلماس تەقدىر،
گاھ كۈلۈپ، گاھ يىغلاپ يۈرسەڭمۇ يالغۇز.
- يېڭىشەھەر ناھىيىلىك ئوقۇتقۇچىلار بىلىم ئاشۇرۇش مەكتىپىدىن: ئابلىمىت ئىبراھىم
(2) جاۋاب:
 دۇرۇس بولسا نىيىتىڭ ھەمدە باسقان قەدىمىڭ،
تەقدىر ساڭا بەختلىك قۇچىقىنى ئاچىدۇ؛
ئەگەر ئۇنىڭ ئەكسىچە بولسا نىيەت-ئىقبالىڭ -
تەقدىر ئامەت-بەختىڭنى ئېلىپ يىراق قاچىدۇ!
- كەلپىن ناھىيىلىك مەدەنىيەت يۇرتىدىن: سالى ئىبراھىم

ژۇرنىلىمىز 2004.1 - سانىدىن