دۇنيا خەۋەرلىرى تورى 4-ئاپرېل تېلىگراممىسى؛ لەگلەك تورى تەرجىمىسى: سەئۇدى ئەرەبىستان رەھبەرلىكىدىكى بىرلەشمە ئىتتىپاق ئايرۇپىلانلىرى، يەمەندە ھۇسىيلەرگە قارشى باشلىغان «كەسكىن قارار بورىنى» ھەرىكىتىدە پايتەخىت سەنئا، ئەدەن ۋە شىمالدىكى سادا رايۇنلىرىدىكى ھۇسىيلەرنىڭ نىشانلىرىغا زەربە بەردى. بىخەتەرلىك تارماقلرىىدىن ئېرىشكەن ئۇچۇرلارغا ئاساسلانغاندا، بىرلەشمە ئىتتىپاق ئايرۇپىلانلىرى سەنئادىكى ھەربىي نىشانلار ۋە سادا ۋىلايىتىگە قاراشلىق شەدا رايۇنىدىكى ھەربى قورال-ياراغ ئامبىرى، ۋە ھۇسىي ئەنسارۇللاھ ھەرىكتى قۇراللىقلىرى جايلاشقان نوقتىلارغا ھاۋا ھۇجۇمى قوزغىدى. بىرلەشمە ئىتتىپاق قىسىملىرىنىڭ ئەدەندىكى ئەس سولبان، بەدىر ۋە ھورماكسار رايۇنلىرىدىكى ھۇسىيلەرنىڭ نىشانلىرىغا ھاۋادىن ۋە دېڭىزدىن زەربە بەرگەنلىكى بىلدۈرۈلدى.
يەنە بىر تەرەپتىن، ھەزەرمەۋت قەبىلىلەر بىرلىكىنىڭ تىنچلىق ۋە مۇقىملىقنى قوغداش ئۈچۈن، ئەلقائىدە تەشكىلاتى قۇراللىقلىرىنىڭ كونتروللىقىدىكى ئەل مۇكەللا ناھىيەسىگە قاراپ يۈرۈش قىلغانلىقى بىلدۈرۈلدى. قەبىلىلەر بىرلىكى تەرىپىدىن ئېلان قىلىنغان يازما باياناتتا، ھەزەرمەۋت ۋىلايىتىنىڭ مەركىزى مۇكەللا رايۇنى ئەلقائىدە «بازا» تەشكىلاتى قۇراللىقلىرىنىڭ كونتروللىقىدا ئىكەنلىكى بىلدۈرۈلگەن.
يەمەندە ھۇسىيلەرنىڭ پايتەخىت سەنئا قاتارلىق بىر قانچە رايۇنلارنى كونترول قىلىۋېلىشىدىن كېيىن پرېزىدېنت ئابدۇرەببۇ مەنسۇر ھادى ئەدەننى ۋاقىتلىق مەركەز دەپ ئېلان قىلغان ئىدى، بىر قىسىم دۆلەتلەر دىپلوماتىيە ۋەكىللىرىنىڭ پائالىيەتلىرىنى ئەدەندە داۋاملاشتۇرىدىغانلىقىنى بىلدۈرگەن ئىدى.
بۇ ئۆزگىرىشلەردىن كېيىن ھۇسىيلەر ئەدەنگە قاراپ يۈرۈش قىلىپ رايۇندىكى بىر قىسىم ئىستراتىگيەلىك نوقتىلارنى كونترول قىلىۋالغان ئىدى، شۇنىڭ بىلەن ھادى ھۆكۈمىتى، ئەرەب ئەللىرى ئىتتىپاقى ۋە خەلقئارا جەمئىيەتنى يەمەنگە جىددى ھەربىي مۇداخىلە قىلىشقا چاقىرىق قىلغان، سەئۇدى ئەرەبىستان باشچىلىقىدىكى بىرلەشمە ئىتتىپاق قىسىملىرى 26-مارتتا يەمەندىكى ھۇسىي قۇراللىقلىرىغا ھاۋا ھۇجۇمى قوزغاشنى باشلىغان.