جاھان ئاگېنتلىقى 18-ئاپرېل خەۋىرى؛ لەگلەك تورى تەرجىمىسى: ئىران تاشقى ئىشلار مىنىستىرى جەۋاد زەرىف، بىرلەشكەن دۆلەتلەر تەشكىلاتى باش كاتىبى بان كىمونغا ، يەمەن مەسىلىسى ئۈچۈن 4 ماددىلىق بىر پىلان مەكتۇبى سۇندى. زەرىف مەكتۇبىدا، سەئۇدى ئەرەبىستان باشچىلىقىدىكى بىرلەشمە ئارمىيە قىسىملىرىنىڭ ھاۋا ھۇجۇمىنىڭ يەمەندىكى ۋەزىيەتنى تېخىمۇ ناچار ھالەتكە ئاپىرىدىغانلىقىنى تەكىتلەپ، «بۇ ھەرىكەت خەلقئارا ھەق-ھۇقۇققا قارشى ھەرىكەتتۇر» دېدى.
زەرىف، بۇ ھۇجۇملارنىڭ ئولتۇراق رايۇنلار، مەكتەپ، دوختۇرخانا، يول ۋە زاۋۇتلارنى نىشان قىلغانلىقىنى ئېيتىپ، بۇ ھۇجۇملار سەۋەبىدىن نۇرغۇن كىشىنىڭ ھاياتىدىن ئايرىلغانلىقىنى بىلدۈردى.
زەرىف، يەمەندىكى قالايمىقانچلىقتىن تېرورچى تەشكىلاتلارنىڭ پايدىلنىۋاتقانلىقىنى ۋە بىر قىسىم رايۇنلارنى كونترول قىلىۋالغانلىقىنى تىلغا ئېلىپ، خەلقئارا جەمئىيەتنىڭ يەمەن مەسىلىسىنى ھەل قىلىش ئۈچۈن تېخىمۇ ئاكتىپ بولۇشى كىرەكلىكىنى تەكىتلىدى.
زەرىف بان كىمونغا سۇنغان 4 ماددىلىق پىلان بولسا:
1.يەمەندە ئۇرۇش توختىتىشنىڭ ئېلان قىلىنىشى ۋە چەتئەل ھەربىي ھەرىكەتلىرىنىڭ توختىتىلىشى.
2.يەمەن خەلقىگە جىددىي ئىنسانىي ياردەم چەكلىمىسىز شەكىلدە يەتكۈزۈلۈشى
3.بارلىق تەرەپلەر قاتناشقان مۇزاكىرە خىزمىتنىڭ يېڭىدىن باشلىنىشى
4.بارلىق تەرەپلەر قاتنىشىدىغان مىللىي بىرلىك ھۆكۈمىتىنىڭ قۇرۇلۇشى.

ب د ت باش كاتىبى بان كىمۇن تۈنۈگۈن ۋاشىنگتوندا سۆز قىلىپ، يەمەندە بارلىق تەرەپلەردىن «دەرھال ئۇرۇش توختىتىش» ئېلان قىلىشقا چاقىرىق قىلغان.