‹‹پايدىلىنىش خەۋىرى تورى›› نىڭ 25-مارتتىكى خەۋىرىگە قارىغاندا، ئىسپانىيە جائەن ئۇنىۋېرسىتېتى تەتقىقات ئەترىتى 4200 يىللىق تارىخقا ئىگە بىر ئايالنىڭ قالدۇق سۆڭىكىنى بايقىغان، مىسىرلىقلار بۇنى پۈتۈن دۇنيا بويىچە ئەڭ قەدىمكى سۈت بېزى راكىغا گىرىپتار بولغۇچى دەپ قارىغان.
تەتقىقات گۇرۇپپىسى بۇ قالدۇق سۆڭەكلەرنى ئاسۋان شەھىرىنىڭ غەربىدىكى كۇببىت قەدىمىي قەبرىستانلىقىدىن بايقىغان بولۇپ، بۇ ئايال مىسىرنىڭ ئالتىنچى خاندانلىقىدا ياشىغان ئېسىلزادىلەردىن ئىكەن. بۇ ئايالنىڭ قالدۇق سۆڭىكى ئېغىر دەرىجىدە زەخمىگە ئۇچرىغان بولۇپ، ئاسار-ئەتىقە مىنىستىرلىقىنىڭ باشلىقى مامدۇخنىڭ ئېيتىشىچە، ئۇنىڭ قالدۇق سۆڭىكى ئۈستىدىن ئېلىپ بارغان تەكشۈرۈشكە قارىغاندا، ئۇنىڭ سۈت بېزى راك ھۈجەيرىسى پۈتۈن بەدەنگە تارقالغان.
خەۋەردە ئېيتىلىشىچە، راك كېسىلى ھازىرقى دەۋردە دۇنيا بويىچە ئۆلۈشكە سەۋەبچى بولىدىغان نەچچە چوڭ سەۋەبنىڭ بىرى بولۇپ، ئارخېئولوگىيە ساھەسىدە بۇ توغرىلىق ھېچقانداق خاتىرە قالدۇرۇلمىغان. شۇ سەۋەبلىك نۇرغۇنلىغان كىشىلەر راك كېسىلىنى ھازىرقى زامانغا تەۋە كېسەل دەپ قارىغان. ئەمما ئەنگلىيەلىك ئالىملار ئالدىنقى يىلى سۇدان دۆلىتىدىكى بىر قەبرىدىن 3000 يىل ئىلگىرىكى يۆتكىلىشچان راك كېسىلىگە گىرىپتار بولغان بىرىنىڭ قالدۇق سۆڭىكىنى بايقىغان، بۈگۈنكى كۈندە ئىسپانىيە جائەن ئۇنىۋېرسىتېتىدىكى تەتقىقاتچىلار 4200 يىل ئىلگىرىكى سۈت بېزى راكىغا گىرىپتار بولغان ئايالنىڭ قالدۇق سۆڭىكىنى بايقىغان. بۇنىڭدىن شۇنى كۆرۈۋالغىلى بولىدۇكى، ئەينى زاماندا نىل دەرياسى ئەتراپىدا ھەقىقەتەن راك كېسلى مەۋجۇت بولغان.