دۇنيا ئاگېنتلىقى 13-مارت خەۋىرى؛ لەگلەك تورى تەرجىمىسى: دۇنيانىڭ ئەڭ قەدىمى جايلىرىدىن بىرى بولغان ھەلەب شەھىرى ، ئەمدىلىكتە بولسا ئۇرۇش بىلەن تىلغا ئېلىنماقتا. سۇرىيەدىكى ئىچكى ئۇرۇشنىڭ مەزكۇر رايۇندا 4 يىلدىن بېرى پەيدا قىلغان ۋەيرانچىلىقى ئېنىق. سۇرىيەدىكى ئىچكى ئۇرۇش 5-يىلىغا قەدەم قويىۋاتقان مەزگىلدە، ھازىرغا قەدەر ھاياتىدىن ئايرىلغانلارنىڭ سانى بىرلەشكەن دۆلەتلەر تەشكىلاتىنىڭ دوكلاتىغا ئاساسلانغاندا 220 مىڭدىن ئارتۇق. دۇنيانىڭ ئەڭ قەدىمى شەھەرلىرىدىن بىرى بولغان ھەلەب شەھىرىدە بولسا ئاز دىگەندە 31 مىڭ كىشى ھاياتىدىن ئايرىلدى.
ھەلەب قەدىمدىن بېرى سۇرىيەنىڭ تىجارەت مەركىزى بولغان بولۇپ، ئەمدىلىكتە بىر جەڭ مەيدانىغا ئايلانماقتا. دۆلەتتىكى خەلق قوزغىلىڭىدىن بىر يىل كېيىن باشلانغان تۇقۇنۇشلار نەتىجىسىدە ھەلەبتە ئون مىڭلارچە كىشى ئۆيلىرىدىن ئايرىلىشقا مەجبۇر بولۇپ قالدى.
ھەلەب رايۇنى، ئەسەد ھۆكۈمىتى ۋە ئۆكتىچىلەرنىڭ كونتروللىقىدىكى رايۇنلاردىن ئايرىم ھالەتتە. رايۇننىڭ شەرق تەرىپى ئۆكتىچىلەرنىڭ، غەرب تەرىپى ئەسەد ھۆكۈمىتىنىڭ كونتروللىقى ئاستىدا تۇرماقتا. بۇ ھەر ئىككى قىسىمدا زور دەرىجىدە ئۇرۇش ۋە بومباردىمان قىلىش مەۋجۇت. بىرلەشكەن دۆلەتلەر تەشكىلاتنىڭ ئىككى تەرەپ ئارىسىدىكى جىدەلنى تۈگىتىش ئۈچۈن كۆرسەتكەن كۈچى ھازىرغىچە بىرەر ئىلگىرلەش پەيدا قىلالمىدى.
رايۇندا بىرەر تال نان سېتىۋېلىش ئۈچۈنمۇ سائەتلەپ ۋاقىت كېتىدىغان بولۇپ ، تونۇرلار ئالدىدا ئۇزۇن قۇيرۇقتەك سوزۇلغان كىشىلەر توپى دائىم ئەسەدنىڭ بومباردىمان قىلىشى تەھدىتى ئاستىدا تۇرماقتا.
رايۇندا سەھىيە خىزمىتى تامامەن پالەچ ئەھۋالدا. ھەلەبلىكلەر ئۇرۇش باشلانغان ۋاقىتتىلا بومباردىمان قىلىنغان سەھىيە ئورۇنلىرىنىڭ ئورنىغا ۋاقىتلىق كىچىك دوختۇرخانا قۇردى. ئەمما دوختۇرخانىلار ئېھتىياجلىق بولغان ئۆلچەمگە ئىگە ئەمەس. ئوپراتىسيە قىلىدىغان دوختۇرلارمۇ يوق دىيەرلىك. دىئابىتقا ئوخشاش بىر قانچە ئېغىر كىسەللىكلەر ئۈچۈن دورىلار يىتەرسىز. ئامېرىكىدىكى ئىنسان ھەقلىرى قوغدىغۇچى دوختۇرلار  (PHR) ئۇيۇشمىسىنىڭ دوكلاتىغا قارىغاندا، 5 يىل ئىچىدە ئەڭ ئاز دىگەندە 610 نەپەر سەھىيە خادىمى ۋە دوختۇرلار ئۆلتۈرۈلدى. نۇرغۇنلىغان دوختۇر ۋە خىزمەتچىلەر دۆلەتتىن ئايرىلدى.
سۇرىيە ئۇرۇشىدىكى ھەر قايسى تەرەپلەر ئۈچۈن ئىستىراتىگىيەلىك نوقتا بولغان ھەلەبتە مەيلى شەرق ياكى غەرب قىسىم بولسۇن ، 5-يىلىغا قەدەم قويغان بۇ ئىچكى ئۇرۇش بارلىق ھايات ئىنسانلارنىڭ ھاياتىغا تەھدىت سېلىۋاتماقتا.