جاھان ئاگېنتلىقى 24-فېۋرال خەۋىرى؛ لەگلەك تورى تەرجىمىسى: چېك جۇمھۇرىيتىنىڭ بىر بازىرىدا رېستۇرانغا قىلىنغان قۇراللىق ھۇجۇمدا ئەڭ ئاز دىگەندە 8 كىشى ئۆلدى، ئىچكى ئىشلار مىنىستىرى ۋەقەنىڭ تېرور ھۇجۇمى ئەمەسلىكىنى ئېلان قىلدى.

چېك جۇمھۇرىيتى دۆلەتلىك تېلىۋزىيسىنىڭ خەۋىرىدە كۆرسىتىلىشچە، دۆلەتنىڭ شەرقىدىكى ئۇھەرسكي برود بازىرىدا بىر رېستورانغا قۇراللىق ھۇجۇم قىلىندى، بۇ قېتىملىق قۇراللىق ھۇجۇم قىلىش ۋەقەسىدە 8 كىشى ئۆلدى، ھۇجۇم قىلغۇچى ئارقىدىنلا ئۆزىنى ئۆلتۈرۋالدى.

چېك جۇمھۇرىيتى ئىچكى ئىشلار مىنىستىرى مىلان چوۋانىك، ۋەقەنىڭ بىر تېرور ھۇجۇمى ئەمەسلىكىنى تەكىتلىدى، «ھۇجۇمنى ئېلىپ بارغان كىشى بازار خەلقى ئارىسىدىن بولۇپ 60 ياشتىن ئاشقان بىر ئادەم» دېدى. ساقچىلار ھۇجۇمنىڭ سەۋەبىنى تەكشۈرۋاتىدۇ.

بازار باشلىقى پارتىك كۇنجار ھۇجۇم جەريانىدا 20 دىن كۆپ خېرىدار بار بولغان رېستوراندا 25 پاي ئوق ئېتىلغانلىقىنى ئېيتتى، بۇ ھۇجۇمنىڭ بىر قىسىم كىشىلەردە روھىي جەھەتتىن مەسىلە پەيدا قىلىىشى مۇمكىن ئىكەنلىكىنى بىلدۈردى.

بۇ قۇراللىق ھۇجۇم يۈز بەرگەن ئۇھەرسكي برود بازىرىدا 18 مىڭ نۇپۇس بار بولۇپ پەيتەخىت پراگنىڭ تەخمىنەن 300 كىلومىتىر غەرقى جەنۇبىغا جايلاشقان.