جۇڭگو ئاخبارات تورى 28-يانۋار تېلېگراممىسى : چەت ئەل تاراتقۇلىرىنىڭ خەۋەر قىلىشىچە، ياپونىيە خوككايدو مائارىپ كومىتېتى ياخشى بولغان توردىن پايدىلىنىش ئادىتىنى يېتىلدۈرۈش ئۈچۈن، ھەر ئاينىڭ بىرىنچى ۋە ئۈچىنچى يەكشەنبە كۈنىنى ‹‹ ئويۇنسىز كۈن ›› قىلىپ بېكىتكەن بولۇپ، چوڭ -كىچىك ، قېرى - ياش بۇ كۈنلىرى تور ئويۇنى ئوينىمايدىكەن ھەمدە ئىمكانقەدەر ئېلېكتىرونلۇق ئۈسكۈنىلەردىن يىراق تۇرىدىكەن.

خوككايدو مائارىپ كومىتېتىنىڭ 2014-يىلى 3-ئايدىن 5-ئايغىچە بولغان ئوتتۇرا مەكتەپ ئوقۇغۇچىلىرىنىڭ توردىن پايدىلىنىش ئادىتىنى تەكشۈرۈش نەتىجىسىدىن مەلۇم بولۇشىچە، تولۇق ئوتتۇرا ۋە تولۇقسىز ئوتتۇرا مەكتەپ ئوقۇغۇچىلىرىنىڭ ئېلېكتىرونلۇق ئۈسكۈنىلەرگە ئىگە بولۇش نىسبىتى ئايرىم-ئايرىم % 95.6 ۋە % 77 بولغان، توردىن پايدىلىنىش نىسبىتى ئايرىم-ئايرىم ھالدا 74.5% ۋە % 56 بولغان.

بۇ قېتىم تەسىس قىلىنغان ‹‹ ئويۇنسىز كۈن ›› خوككايدو مائارىپ كومىتېتىنىڭ ئوقۇغۇچىلارغا ياخشى بولغان ئۆگىنىش مۇھىتى يارىتىش پىلانىدىكى بىر تۈر بولۇپ، بۇ پىلان ‹‹خوككايدو كىشىلىرىنىڭ سىرتتا كۆڭۈل ئېچىش پىلانى ›› دەپ ئاتالغان. ئىسمىدىنلا مەلۇمكى، ‹‹ خوككايدو كىشىلىرىنىڭ سىرتتا كۆڭۈل ئېچىش پىلانى ›› دەپ ئاتالغان بۇ پىلان كىشىلەرنىڭ تۇرمۇشتا تېلېۋىزور، DVD، ئېلېكتىرونلۇق ئويۇنچۇق، تور قاتارلىق ئېلېكتىرون ئۈسكۈنىلىرى بىلەن ئۇچراشماي، كۆپرەك ۋاقتىنى ئائىلە يىغىلىشى، دوستلار يىغىلىشى، كىتاب ئوقۇش ۋە باشقا ئىجتىمائىي ئالاقىلەرگە ئاجرىتىشىنى ، بۇ ئارقىلىق تېخىمۇ ساغلام بولغان جەمئىيەت بەرپا قىلىشنى مەقسەت قىلغان.