ئامېرىكا «ۋاشىنگىتون كۈندىلىك پوچتا گېزىتى» نىڭ 2-چېسلا خەۋەر قىلىشىچە، تۈركىيە زۇڭتۇڭى ئەردوغان شۇ جاي ۋاقتى 1-چېسلا لېتىن ئامېرىكا زىيارىتىدىكى بىرىنچى بېكەت چىلىغا يىتىپ كەلدى، ئۇ ئارتۇرو مېرىنو بانىتېز خەلقئارا ئايرودرومى (Arturo • Merino • Benitez International Airport) غا يىتىپ كەلگەندە چىلى دىپلوماتىيە مىنىستىرى قاتارلىق كۆپ قىسىم ئەمەلدارلار ئۇنى كۈتىۋالدى. ئەردوغان 2010-يىلى چىلى زېمىنىغا كەلگەن تۇنجى تۈركىيە زۇڭلىسى بولۇپ قالغان ئىدى، ھازىر بولسا زۇڭتۇڭ بولۇش سۈپىتى بىلەن چىلى پايتەختى سانتىياگوغا بارىدۇ.

      ئەردوغان سانتىياگودىكى مەدەنىيەت مەركىزىدە «تۈركىيە ۋە چىلى ئوتتۇرىسىدىكى ئىككى تەرەپ مۇناسىۋىتى 90 يىللىقى» باش تېمىسىدىكى رەسىم كۆرگەزمىسىنى كۆرىدۇ، كېيىن تۈركىيەنىڭ سانتىياگودا تۇرۇشلۇق باش ئەلچىخانىسىغا بېرىپ زىياپەتكە قاتنىشىدۇ، ئۇ يەنە لامونېدا سارىيى (La Moneda Palace) دا چىلى زۇڭتۇڭى بىلەن كۆرۈشىدۇ. سەيشەنبە كۈنى ب د ت ۋەكىللەر ئۆمىكى باشقارمىسىدىكى پائالىيەتكە قاتنىشىدۇ.

         ئەردوغاننىڭ بۇ قېتىمقى زىيارىتىنىڭ مەركىزى نۇقتىسى ئىقتىساد بولۇپ، ئىككى تەرەپنىڭ ئارلىقى گەرچە يىراق بولسىمۇ، بىراق ئىككى تەرەپ كان بايلىقى ۋە دۆلەت مۇداپىئە سانائىتى جەھەتتە يېقىندىن ھەمكارلىشىپ كېلىۋاتىدۇ. تۈركىيە چىلىغا توشۇغۇچى تىراكتور، پولات-تۆمۈر مەھسۇلاتلىرى ۋە گىلەم قاتارلىق ماللارنى ئېكىسپورت قىلىدۇ. شۇنىڭ بىلەن بىر ۋاقىتتا چىلى تۈركىيەگە مىس ۋە مېۋە-چىۋە ئېكىسپورت قىلىدۇ.

تۈركىيە ۋە چىلى ئىككى تەرەپنىڭ ۋىزا كەچۈرۈم قىلىش ۋە ئەركىن سودا كېلىشىمىنى ئۆز ئىچىگە ئالغان توققۇز تۈرلۈك ھەمكارلىق كېلىشىمى ئىمزالىدى. ئەردوغاننىڭ زىيارەت قىلىشىغا ئەگىشىپ، ئىككى دۆلەت سودىسى يېڭى پۇرسەتلەرنى ياراتقۇسى.

ئەردوغانغا ھەمراھ بولۇپ چىلى زىيارىتى قىلغانلاردىن يەنە ئەردوغاننىڭ ئايالى ئامىنە ئەردوغان (Amina • Erdoğan)، مۇئاۋىن زۇڭلى ئېكېدۇئان (Ekeduoan)، سانائەت ۋە پەن-تېخنىكا مىنىستىرى، ئېنېرگىيە مىنىستىرى ۋە بىر قانچە سابىق مىنىستىر قاتارلىقلار بار.