جۇڭگو ئاخبارات تورى 21-يانۋار تېلېگراممىسى: چەت ئەل تاراتقۇلىرى خەۋىرىگە قارىغاندا، يېقىندا كانادانىڭ ئايال ۋاسكىتبول تەنھەرىكەتچىسى شانىك كلارك ئامېرىكا كالىفورنىيە ئۇنىۋېرسىتېتىدىكى ياتىقىدا ھاياتىدىن ئايرىلغان . ساقچى تەرەپنىڭ دەسلەپكى ئانالىزىغا قارىغاندا، ئۇ ئۇخلاشتىن بۇرۇن ئېغىزىدا سېغىز كەمپۈت چايناپ ياتقان، كېيىن سېغىز كەمپۈت گېلىغا تۇرۇپ قېلىپ، تىنالماي قازا قىلغان.
كلارك بۇ يىل 21 ياش، ئامېرىكا كالىفورنىيە ئۇنىۋېرسىتىتىدا ئوقۇۋاتقان بولۇپ، تورونتودا خېلى داڭقى چىقىپ قالغان ۋاسكىتبول ماھىرى ئىكەن .

شۇ يەرلىك ساقچى تەرەپ يېقىندا جەسەت تەكشۈرۈش دوكلاتىنى ئېلان قىلغان بولۇپ، دوكلاتتا كۆرسىتىلىشىچە، كلارك ئېغىزىدا سېغىز كەمپۈت چاينىغان پېتى ئۇيقۇغا كەتكەن، كېيىن گېلىغا سېغىز چاپلىشىپ قېلىپ، تىنالماي تۇنجۇقۇپ قېلىپ قازا قىلغان بولۇشى مۇمكىن ئىكەن.

ئىگىلىنىشىچە، ئۇنىڭ ۋاپاتى مەزكۇر مەكتەپتىكى نۇرغۇن ئوقۇتقۇچى، ئوقۇغۇچىلارنى چۆچۈتۈۋەتكەن، نۇرغۇن كىشىلەر ئۆزلۈكىدىن تەشكىللىنىپ، ئۇنىڭغا تەزىيە بىلدۈرۈش ھەرىكەتلىرىنى ئېلىپ بارغان. مەكتەپ تەرەپمۇ بايانات ئېلان قىلىپ، بۇ ئىشتىن قاتتىق ئەپسۇسلانغانلىقىنى بىلدۈرگەن.