ئوت ئۆچۈرۈش خادىملىرى 3-يانۋار سەھەر سائەت 07:57 ئۆتكەندە ھادىسە نەق مەيدانىدا قۇتقۇزۇش خىزمىتى ئېلىپ بارماقتا

شىنجاڭ تورى خەۋىرى: شىنجاڭ ئىلى ئوبلاستىنىڭ نىلقا ناھىيەسىدىن ئۈرۈمچى شەھىرىگە بىمار ۋە ئۇنىڭ ئائىلىسىدىكىلەرنى ئېلىپ ماڭغان بىر جىددىي قۇتقۇزۇش ئاپتوموبىلى 3-يانۋار سەھەر سائەت 06:30 دا ئۈرۈمچى-كۇيتۇن يۇقىرى سۈرئەتلىك تاشيولىنىڭ تەرەققىيات (تۇدۇڭخابا) رايونى بۆلىكىگە كەلگەندە بىر ئېغىر تىپلىق يۈك ئاپتوموبىلى بىلەن سوقۇلۇپ ، قۇتقۇزۇش ئاپتوموبىلىدىكى بىمار( ئايال) ۋە ئۇنىڭ 28 ياشلىق ئوغلى تۇرسۇنمۇھەممەد روزى نەق مەيداندا قازا قىلغان .

مۇخبىرنىڭ قاتناش ساقچى تارماقلىرىدىن ئىگىلىشىچە، ھادىسىگە ئۇچرىغان جىددىي قۇتقۇزۇش ئاپتوموبىلىنىڭ نومۇر تاختىسى 新F16298 بولۇپ، تۇدۇڭخابا ھەق ئېلىش پونكىتىدىن ئۆتۈپ ئۇزۇن ئۆتمەيلا ئارقىدىن كەلگەن 鲁HR0577 نومۇرلۇق ئېغىر تىپلىق يۈك ئاپتوموبىلى سوقۇۋەتكەن.

ھادىسىدە بىمارنىڭ ئۇرۇق-تۇغقان، دوستلىرىدىن بولۇپ يەنە ئۈچ ئادەم ئوخشىمىغان دەرىجىدە يارىلىنىپ، ئۈرۈمچى شەھىرىدىكى دوختۇرخانىلارغا يەتكۈزۈلگەن.
بىمارنىڭ كۈيۈ ئوغلى ئاۋزەر ئەنۋەرنىڭ ئېيتىشىچە، ئەسلىدە ئۇ ۋە باشقا ئالتە ئۇرۇق-تۇغقان ئۇنىڭ 58 ياشلىق قېينئانىسىنى ئۈرۈمچىگە داۋالاتقىلى ئېلىپ ماڭغان بولۇپ، قۇتقۇزۇش ئاپتوموبىلىغا شوپۇر بىلەن جەمئىي سەككىز ئادەم ئولتۇرغان. قۇتقۇزۇش ئاپتوموبىلى تۇدۇڭخابا ھەق ئېلىش پونكىتىدىن ئۆتۈپ تۇرۇشىغىلا ئاپتوموبىلدىن كاشىلا كۆرۈلگەن، ئاۋزەر ۋە باشقا ئۇرۇق-تۇغقانلار ئاپتوموبىلدىن چۈشۈپ، بىرلىكتە ئاپتوموبىلنى ئىتتىرىۋاتقاندا ئارقا تەرەپتىن كەلگەن بىر يۈك ئاپتوموبىلى ئۇدۇل كەلگەنچە قۇتقۇزۇش ئاپتوموبىلىنى سوقۇۋەتكەن .