ئاۋمېن جىنليەنخۇا مەيدانىدىكى پورەكلىگەن نېلۇپەر ھەيكىلى 20-دېكابىر سەھەردە قىش قۇياشىدا تاۋلىنىپ بەك چىرايلىق تۈسكە كىرگەن ئىدى. ھەيۋەتلىك دۆلەت شېئىرى ساداسى ئىچىدە، كىشىلەر شامالدا لەپىلدەپ تۇرغان بەش يۇلتۇزلۇق قىزىل بايراق ۋە ئاۋمېن ئالاھىدە مەمۇرىي رايون بايرىقىغا قاراپ، ئاۋمېن ۋەتەن قوينىغا قايتىپ كەلگەنلىكىنىڭ 15 يىللىقىنى تەبرىكلىدى.

شۇ كۈنى سەھەردە، ھەر ساھە ئەربابلىرى تۆت تەرەپتىن جىنليەنخۇا مەيدانىغا يىغىلىپ، ئالتۇندەك پارقىراپ تۇرغان بۇ چىرايلىق ھەيكەل ئالدىدا تۇرۇپ، دۆلەت بايرىقى ۋە رايون بايرىقى چىقىرىلغان تەنتەنىلىك پەيتتە، ئاۋمېن ئالاھىدە مەمۇرىي رايونىنىڭ 15 ياشقا كىرگەن كۈنىدىكى خۇشاللىق ۋە شەرەپتىن تەڭ بەھرىمەن بولۇشنى كۈتتى.

شياڭگاڭ ئالاھىدە مەمۇرىي رايونىنىڭ باش مەمۇرى سۈي شىئەن سائەت يەتتىدىن 53 مىنۇت ئۆتكەندە مەيدانغا كىرىپ كەلگەندە، ھۆرمەت قاراۋۇلى سالام بەردى ھەم ئۇ ئەزىز مېھمانلار بىلەن قول ئېلىشىپ كۆرۈشتى. دەل سائەت سەككىزدە، «پىدائىيلار مارشى»نىڭ ياڭراق ساداسى ئىچىدە، بەش يۇلتۇزلۇق قىزىل بايراق ۋە ئالاھىدە مەمۇرىي رايون بايرىقى ئاستا-ئاستا كۆتۈرۈلدى. مەيداندىكى ئەزىز مېھمانلار ھەم شەھەر ئاھالىلىرى دۆلەت بايرىقى ۋە رايون بايرىقىنىڭ كۆتۈرۈلۈشىگە دىققەت بىلەن قاراپ تۇردى. بايراق خادىنىڭ ئەڭ ئۇچىغا چىقىرىلغاندا، شەھەر ئاھالىلىرى بەس-بەستە رەسىم ئاپپاراتى، يانفونلىرىنى ئېلىپ، بۇ ئەھمىيەتلىك پەيتنى سۈرەتكە تارتىۋالدى.

بايراق چىقىرىش مۇراسىمىنىڭ ئاياغلىشىشىغا ئەگىشىپ، شەھەر ئاھالىلىرى ۋە ساياھەتچىلەر بەس-بەستە مەيدانغا كېلىپ خاتىرە سۈرەتكە چۈشتى. ئالىي مەكتەپ ئوقۇغۇچىلىرى بىر يەرگە يىغىلىپ، يانفون بىلەن ئۆزلىرىنى سۈرەتكە تارتتى، ئاتا-ئانىلار بالىلىرى بىلەن ئوينىغاچ خۇشاللىققا چۆمدى، پۈتكۈل مەيداندا شادلىق سادالىرى ياڭرىدى.