رۇسىيە زۇڭتۇڭى پۇتىن 8-ئاپرېل موسكىۋادا زىيارەتكە كەلگەن گىرىتسىيە زۇڭلىسى سىپراس بىلەن كۆرۈشتى، ئىككى تەرەپ ئىككى دۆلەتنىڭ سودا، مەبلەغ سېلىش، ئېنېرگىيە قاتارلىق ساھەلەردىكى ھەمكارلىقى شۇنداقلا رۇسىيە بىلەن ياۋروپانىڭ مۇناسىۋىتىنى مۇزاكىرەلەشتى. ئىككى دۆلەت باشلىقلىرى سۆھبەتتىن كېيىن 2015-يىلىدىن 2016-يىلىغىچە بولغان بىرلەشمە ھەرىكەت پىلانى شۇنداقلا 2016-يىلى ئۆز ئارا دۆلەت يىلى پائالىيىتى ئۆتكۈزۈشنىڭ ئەسلەتمىسىنى ئىمزالىدى. ئىككى تەرەپ سۆھبەت جەريانىدا ئىككى دۆلەتنىڭ سودا، مەبلەغ سېلىش، ئېنېرگىيە، مەدەنىيەت، قاتناش، يېزا ئىگىلىكى قاتارلىق ساھالەردىكى ھەمكارلىقنى قانداق كۈچەيتىشنى مۇھاكىمەت قىلدى، ھەمدە بىر قىسىم خەلقئارا ۋە رايون مەسىلىلىرى توغرىسىدا پىكىر ئالماشتۇردى. پۇتىن مۇخبىرلار يىغىنىدا مۇنداق دېدى: ئىككى دۆلەتنىڭ ئۆتكەن يىلقى سودا سوممىسى ھەر قايسى تەرەپتىكى سەۋەبلەر تۈپەيلىدىن زور دەرىجىدە ئازلاپ كەتتى، بىراق رۇسىيە گىرىتسىيە بىلەن بولغان ئىقتىساد سودا ھەمكارلىقىنى كۈچەيتىشكە كۈچ چىقىرىدۇ، مەبلەغ سېلىش ھەمكارلىقىغا ئالاھىدە ئېتىبار بېرىدۇ، ئۆتكەن يىلى رۇسىيە بىلەن گىرىتسىيەنىڭ ئىككى تەرەپلىك سودا سوممىسى 4 مىليارد 200 مىليون ئامېرىكا دوللىرى بولدى، بۇ ئوخشاش مەزگىلدىكىدىن %40 چۈشۈپ كەتتى، ئەلۋەتتە، بۇنىڭدا غەرب ئەللىرىنىڭ رۇسىيەنى جازالىشى ۋە ئېنېرگىيە باھاسىنىڭ چۈشۈپ كېتىشى قاتارلىق سەۋەبلەر بار، بىراق، بىز ئورتاق تونۇش ھاسىل قىلدۇق، بىز ئىككى دۆلەتنىڭ سودىسىنى ئاشۇرۇشقا كۈچ چىقىرىمىز. شۇڭا بىز بۈگۈن 2015-يىلىدىن 2016-يىلىغىچە بولغان بىرلەشمە ھەرىكەت پىلانىنى ئىمزالىدۇق، بىز مەبلەغ سېلىش سوممىسى ئانچە كۆپ بولمىسىمۇ ئەمما بۇ ھەمكارلىققا تېخىمۇ ئەھمىيەت بېرىمىز.
بۇندىن ئىلگىرى جامائەتچىلىك: سىپراسنىڭ بۇ قېتىم رۇسىيەدە زىيارەتتە بولۇشى رۇسىيەنىڭ مەبلەغ جەھەتتىكى ياردىمىگە ئېرىشىش ئۈستىدە ئىزدىنىش ئۈچۈن، دەپ ھېسابلىغان ئىدى. بىراق پۇتىن مۇخبىرلار يىغىنىدا: سىپراس سۆھبەتتە ھېچقانداق ياردەم تەلەپ قىلمىدى، پەقەت ئىككى دۆلەتنىڭ ئىقتىساد سودا، مەبلەغ سلېىش قاتارلىق ساھەلەردىكى ھەمكارلىقىنى كۈچەيتىشنى ئۈمىد قىلىدىغانلىقىنى بىلدۈردى، دېدى. سىپراسمۇ بۇ قېتىمقى زىيارىتىنىڭ مەقسىتى ئىككى تەرەپلىك مۇناسىۋەتنى تېخىمۇ تەرەققىي قىلدۇرۇش ئىكەنلىكىنى بىلدۈردى.
گېرىتسىيە ئېنېرگىيە جەھەتتە رۇسىيەگە بەكلا تايىنىدۇ، گىرىتسىيە 32 قسىم تەبىئىي گازنى رۇسىيەدىن ئىمپورت قىلىدۇ. رۇسىيە ھازىر «تۈركىيە ئېقىمى» ناملىق تەبىئىي گاز تۇربىسى قۇرىۋارتىدۇ، تۈركىيە ئارقىلىق تەبىئىي گازنى ياۋروپانىڭ ئوتتۇرا قىسمىغا يەتكۈزىدۇ، پۇتىن مۇنداق دېدى: گىرىتسىيە تەبىئىي گاز يەتكۈزۈش مەركەزلىرىنىڭ بىرى بولۇشى مۇمكىن، ھەمدە بۇنىڭدىن تېخىمۇ كۆپ مەبلەغ سېلىش پۇرسىتى ۋە ئىش ئورنىغا ئېرىشىشى مۇمكىن، ھازىر يولغا قويۇلىۋاتقان چوڭ تىپتىكى تەبىئىي گاز تۇربىسى تۈرى «تۈركىيە ئېقىمى» تۈركىيەدىن ئۆتۈپ بالقان رايونىغا ئۇلىشىدۇ، بۇندىن باشقا ئىتالىيەدىن ئۆتۈپ ياۋروپانىڭ ئوتتۇرا قىسمىغا ئۇلىشىشىمۇ مۇمكىن. بۇ يېڭى لىنىيە ياۋروپانىڭ تەبىئىي گاز ئېھتىياجىنى قاندۇرىدۇ، گىرىتسىيە ئاساسلىق يەتكۈزۈش مەركىزى بولۇشى مۇمكىن، بۇ گىرىتسىيەنىڭ مەبلەغ جەلىپ قىلىشىغا پايدىلىق ھەمدە گىرىتسىيەدە نۇرغۇن ئىش ئورنى يارىتىدۇ.
ئىقتىساد سودا، ئېنېرگىيە قاتارلىق ساھەلەردىكى ھەمكارلىقتىن باشقا، پۇتىن ئىككى دۆلەتنىڭ مەدەنىيەت، ساياھەت قاتارلىق ساھەلەردىكى ھەمكارلىقىنى تىلغا ئېلىپ مۇنداق دېدى: رۇسىيە بىلەن گىرىتسىيە مۇناسىۋىتىدىكى مۇھىم ساھە ساياھەتچىلىك، رۇسىيەلىكلەر گىرىتسىيەگە ساياھەت قىلىشنى ياخشى كۆرىدۇ. ئۆتكەن يىلى 9 مىليوندىن كۆپرەك رۇسىيەلىك گىرىتسىيەگە ساياھەتكە باردى. مەدەنىيەت ساھەسىدە، ئىككى دۆلەت 2016-يىلىنى رۇسىيە بىلەن گىرىتسىيەنىڭ دۆلەت يىلى قىلىپ بېكىتتى، ئىككى دۆلەت مائارىپ، ئەدەبىيات-سەنئەت ۋە مەدەنىيەت ساھەسىدىكى بىر قاتار ھەمكارلىقلارنى ئىلگىرى سۈرىدۇ.
مۇخبىرلار يىغىنىدا، پۇتىن رۇسىيە بىلەن ياۋروپا ئەللىرىنىڭ ھازىرقى جىددىي مۇناسىۋىتىنى تىلغا ئېلىپ مۇنداق دېدى: ئەلۋەتتە، بىز رۇسىيە بىلەن ياۋروپا ئەللىرى ئىتتىپاقىنىڭ مۇناسىۋىتى توغرىسىدا پىكىر ئالماشتۇردۇق، مەن گىرىتسىيەلىك دوستلۇرۇمغا ئۇكرائىنىڭ شەرقىي قىسمىنىڭ ۋەزىيىتىنى تونۇشتۇردۇم، بىز مىنسكى كېلىشىمىدىكى بارلىق مەزمۇنلارنىڭ ئەمەلىيلىشىشىگە ئالاھىيە كۆڭۈل بۆلىمىز.
بۇندىن باشقا، پۇتىن بىلەن سىپراس سۆھبەتتىن كېيىن بىرلەشمە بايانات ئېلان قىلىپ، رۇسىيە بىلەن گىرىتسىيە بۇ يىلقى ئىككىنچى دۇنيا ئۇرۇش غەلبىسىنىڭ 70 يىللىقىنى خاتىرىلەش پائالىيىتىگە ئالاھىدە ئەھمىيەت بېرىمىز، دېدى. ئىككى دۆلەت باشلىقلىرى باياناتتا ئىنسانلارنىڭ ئەركىنلىكىنى ۋە كىشىلىك ھوقۇقىنى قوغداشقا تۆھپە قوشىۋاتقان بارلىق كىشىلەرگە ھۆرمەت بىلدۈردى ھەمدە ئىككىنچى دۇنيا ئۇرۇشىنىڭ تارىخىنى ئۆزگەرتمەكچى بولغانلارنى ئەيىبلىدى.