ئامېرىكا زۇڭتۇڭى ئوباما شۇ يەر ۋاقتى 2014-يىلى 17-دېكابىر ۋاشىنگتوندا كۇبا مۇناسىۋىتىگە قارىتىلغان باياناتىنى ئېلان قىلدى ، باياناتتا كۇباغا قارىتىلغان ئىقتىسادىي جازالار بىكار قىلىنىدىغانلىقى ئوتتۇرىغا قويۇلدى . ئوباما ئامېرىكىنىڭ ‹‹ ئۆتمۈشتىكى ئۇسۇلى ››نى ئاياغلاشتۇرۇپ ، ئامېرىكا-كۇبا مۇناسىۋىتىنىڭ ‹‹يېڭى سەھىپىسى››نى ئاچىدىغانلىقىنى بىلدۈردى.

خەلقئارا لىنىيەسى خەۋىرى : ئامېرىكا زۇڭتۇڭى ئوباما ئامېرىكا شەرقىي قىسىم ۋاقتى 17-دېكابىر سائەت 12:16 دە سۆز قىلىپ ، كۇباغا قارىتىلغان ئىقتىسادىي جازانى بىكار قىلىدىغانلىقىنى ، پارلامېنت ئەزالىرى بىلەن كۇباغا قارىتىلغان ئىمبارگۇنى بىكار قىلىدىغانلىقى ھەققىدە مۇنازىرىلىشىپ ، ئامېرىكا-كۇبا مۇناسىۋىتىنىڭ ‹‹يېڭى سەھىپىسى ››نى ئاچىدىغانلىقىنى جاكارلىغان . شۇنىڭ بىلەن بىر ۋاقىتتا ، كۇبا رەھبىرى رائۇل كاسترومۇ كۇبا-ئامېرىكا مۇناسىۋىتى توغرىسىدا سۆز قىلغان .

ئامېرىكا بىلەن كۇبا 17-دېكابىر تۇيۇقسىزلا مەھبۇس ئالماشتۇرغان ، كۇبا تەرەپ تۇتقۇن قىلىۋالغىلى بەش يىل بولغان ئامېرىكىلىق قۇتقۇزۇش خادىمى ئالەن گروس بىلەن بىر نەپەر ئالاھىدە خادىمنى قويۇپ بەرگەن ، ئامېرىكا تەرەپ ئۈچ نەپەر كۇبالىق ئالاھىدە خادىمنى قويۇپ بەرگەن.