جاھان ئاگېنتلىقى 20-مارت خەۋىرى؛ لەگلەك تورى تەرجىمىسى: سۇرىيە پايتەختى دەمەشىقتىكى بىخەتەرلىك دائىرلىرىنىڭ نەقىل قىلىشىچە، سۇرىيە پرېزىدېنتى بەششار ئەسەدنىڭ، سۇرىيە ئاخبارات ئىدارىسىنىڭ مۇھىم ئىككى خادىمىنى ۋەزىپىسىدىن ئېلىپ تاشلىغانلىقى ئېنىقلاندى. بۇلاردىن بىرى ئادى ھەرىيرى سۇيقەستىگە ئالاقىدار گېنىرال رۇستەم غازالە.
خەۋەردە ئېيتىلىشىچە، بەششار ئەسەد سىياسىي خەۋىپسىزلىك ئىشلىرى باشلىقى رۇستەم غازالە بىلەن بىرلىكتە ھەربىي بىخەتەرلىك ئىشلىرى باشلىقى گېنىرال رەفىق شاھادەنى ۋەزىپىسىدىن ئېلىپ تاشلىدى. بۇ ئىككى كىشى بولسا سۇرىيە ئاخبارات تەشكىلاتىنىڭ ئالدىنقى قاتاردىكى خادىملىرىدۇر.
رۇستەم غازالە، سۇرىيە ئارمىيسى 2005-يىلىدا لىۋاندىن چېكىنىشىدىن بۇرۇن شۇ يەردە ھەربىي ئاخبارات ئورگىنىنىڭ باشلىقلىق ۋەزىپىسىنى ئۆتەيتتى. 62 ياشلىق غازالە، ئۇنىڭدىن كېيىن دەمەشىق رايۇنلۇق ھەربىي ئاخبارات ئىدارىسى باشلىقى بولغان.
گېنىرال غازالە، 2012-يىلى 18-ئىيۇلدا يۈز بەرگەن بىر قېتىملىق ھۇجۇم ۋەقەسىدە 4 نەپەر مۇھىم قۇماندان ئۆلتۈرۈلگەندىن كېيىن سۇرىيە ئارمىيىسى سىياسىي بىخەتەرلىك ئورگىنى باشلىقلىقىغا تەيىنلەنگەن.
غازالە، 2005-يىلى فېۋرال ئېيىدا سۇيقەست بىلەن ئۆلتۈرۈلگەن لىۋان سابىق باش مىنىستىرى رەفىق ھەرىيرى سۇيقەستىگە ئالاقىدار دەپ قارىلىپ تەكشۈرۈلۈپ سوتلانغان بەش نەپەر سۇرىيەلىك قۇمانداننىڭ بىرى.
ئەلجەزىرە تورى ئېرىشكەن بىر قىسىم مەلۇماتلاردا، فېۋرال ئېيى ئاخىرىدا ۋەزىپىسىدىن ئېلىپ تاشلانغان گېنىرال رۇستەم غازالەنىڭ ، ۋەزىپىدىن ئېلىنغان يەنە بىر گېنىرال رەفىق شاھادەگە تەۋە بىر قىسىم گۇرۇپپىلار بىلەن تۇقۇنۇشۇپ دەرئا رايۇنىنىڭ كارفا يېزىسىدا پۇتى ۋە سول كۆزى يارىلانغانلىقى ۋە غازالەنىڭ شۇئاندا دوختۇرخانىدا ئىكەنلىكى، ئەھۋالىنىڭ بارغانسىرى ياخشىلىنىۋاتقانلىقى بىلدۈرۈلدى.
بىر قىسىم ئۆكتىچى دائىرىلەر، فايىسبۇكتا غازالەنىڭ ۋەزىپىدىن ئېلىنغانلىقىغا دائىر ئۇچۇرلار تارقاتقان. ۋە بەششار ئەسەدنىڭ ۋەزىپىسىدىن ئېلىپ تاشلىغان گېنىرال غازالەنىڭ ئورنىغا گېنىرال زۇھەيىر ھامدىنى ئەكەلگەنلىكى ھەققىدە ئۇچۇرلار تارقالغان.
سۇرىيەدە 5-يىلىغا قەدەم قويغان ئىچكى ئۇرۇشتا ھازىرغا قەدەر 220 مىڭدىن كۆپ ئىنسان ھاياتىدىن ئايرىلدى. بەششار ئەسەد ھۆكۈمىتىنىڭ تۈرمىلىرىدە بولسا 215 مىڭ كىشى تۇتۇپ تۇرۇلغان بولۇپ، بۇلاردىن 85 مىڭ كىشىدىن ھېچبىر خەۋەر يوق ئىكەن.