جۇڭگو ئۇيغۇرچە رادىيو تورى 11-نويابىر بېيجىڭ خەۋىرى:
ئامېرىكا زوڭتۇڭى ئوباما ئاسىيا تىنچ ئوكيان رايونى ئىقتىسادىي ھەمكارلىق تەشكىلاتىنىڭ 22- قېتىملىق رەھبەرلەر بىرەسمى يىغىنىغا قاتنىشىش ئۈچۈن جۇڭگوغا كەلگەندە ھەمدە جۇڭگودا دۆلەت ئىشلىرى زىيارىتىدە بولۇش ھارپىسىدا شىنخۇا ئاگېنتلىقىنىڭ يازما مەخسۇس زىيارىتىنى قوبۇل قىلغاندا مۇنۇلارنى بىلدۈردى: مەن جۇڭگونىڭ دۆلەت رەئىسى شى جىنپىڭ بىلەن كۆرۈشۈشنى كۈتمەكتىمەن.

چۈنكى بۇ جۇڭگو بىلەن ئامېرىكىنىڭ كۆپلىگەن ساھەلەردىكى شېرىكلىك مۇناسىۋىتىنى چوڭقۇرلاشتۇرۇشتىكى پۇرسەت. ئۇ مۇنۇلارنى قايتا تەكىتلىدى: ئامېرىكا جۇڭگونى چەكلەش ئۈستىدە ئىزدەنمەيدۇ. مۇقىم، گۈللەنگەن،تىنچ جۇڭگونىڭ قەد كۆتۈرۈپ، يەر شارىنىڭ بىخەتەرلىكى ۋە گۈللىنىشى ئۈچۈن تۆھپە قوشۇشىنى قارشى ئالىدۇ.

ئوباما مۇنداق دېدى: ھازىرقى ئامېرىكا بىلەن جۇڭگونىڭ مۇناسىۋىتىنى ۋە ئىككى تەرەپلىك ھەمكارلىقنىڭ سەۋىيىسىنى بۇنىڭدىن 35 يىلى ئىلگىرى تەسەۋۋۇر قىلغىلى بولمايتتى . بۇ ئىككى دۆلەت خەلقىنىڭ تىرىشچانلىق كۆرسەتكەنلىكىنىڭ نەتىجىسى. ئامېرىكا بىلەن جۇڭگونىڭ ھەمكارلىقى ئىككى دۆلەت ۋە دۇنياغا نەپ يەتكۈزىدۇ. ئۇ شۇنىڭ بىلەن بىر ۋاقىتتا مۇنۇلارنى ئوتتۇرىغا قويدى: ئامېرىكا بىلەن جۇڭگو ئارىسىدا قىسمەن مەسىلىلەردە يەنىلا ئىختىلاپ بار، مەن رەئىس شى جىنپىڭ بىلەن بۇ ئىش ئۈستىدە بىۋاسىتە ۋە سەمىمىي سۆھبەتلىشىشنى كۈتمەكتىمەن.

ئوباما مۇنۇلارنى تەكىتلىدى: مەن ئامېرىكا بىلەن جۇڭگونىڭ كونا مۇقامغا توۋلىماي ئالدىنقىلارنىڭ ئىشلىرىغا ۋارىسلىق قىلىپ چوڭ دۆلەتلەر بىلەن يېڭىدىن گۈللەنگەن دۆلەتلەر ئارىسىدا يۈز بېرىدىغان بۇزغۇنچىلىق خاراكتېرىدىكى قارشىلىشىش تارىخىنىڭ كۆرۈلمەيدىغانلىقىغا ئىشىنىمەن ھەمدە ئۆتۈپ كەتكەن نۆل يىغىندىلىق تەپەككۇردىن ۋاز كېچىشىنى ئۈمىد قىلىمەن.