چەتئەل تاراتقۇلىرىنىڭ خەۋىرىگە قارىغاندا، ئىسرائىلىيە زۇڭلىسى نىتانىياخۇ 24-ئاۋغۇست: ئىسرائىلىيە ئارمىيەسى ئىسرائىلىيەنىڭ جەنۇبىدا تىنچلىق ئەسلىگە كەلگەنگە قەدەر غەززەدىكى قوراللىقلارغا داۋاملىق زەربە بېرىدۇ دېگەن. ئىسرائىلىيە 8-ئىيۇل غەززەگە چېگرانى قوغداش ھەربىي ھەرىكىتى ئېلىپ بارغاندىن بۇيان ھازىرغىچە غەززە رايونىدا ئىككى مىڭدىن ئارتۇق پەلەستىنلىك قازا قىلغان، ئون مىڭغا يېقىن ئادەم يارىلانغان.

پەلەستىن زۇڭتۇڭى ئابباس شۇ يەر ۋاقتى 23-ئاۋغۇست مىسىرنىڭ پايتەختى قاھىرەدە پەلەستىن بىلەن ئىسرائىلىيە ئارىسىدىكى سۆھبەتنى دەرھال قايتىدىن باشلاپ، قانلىق توقۇنۇشنى بالدۇرراق ئاياغلاشتۇرۇش ھەمدە پەلەستىن مەسىلىسىنى ھەل قىلىش لايىھەسىنى تېپىپ چىقىش ئۈستىدە ئىزدىنىشنى مۇراجىئەت قىلغان.