ئامېرىكا Re/code تور بېتىنىڭ 19-مارتتىكى خەۋىرى، باغداش تورىدىن ئەكبەر تەرجىمىسى:

خاككېرلار تەشكىلاتى Anonymous تەشكىلاتى ئامېرىكا پرېزىدېنت نامزاتى دونالد ترۇمپقا سالغان تەھدىتىنى ئىجرا قىلماقتا. Anonymousبۇ قېتىم ترۇمپنىڭ زور مىقداردىكى شەخسىي ئۇچۇرلىرىنى ئاشكارىلىدى.

بۇ ئۇچۇرلار Pastebin تور بېتىدە ئېلان قىلىندى. ئىلگىرى سونىي كىنوچىلىقى خاككېر ھۇجۇمىغا ئۇچرىغاندا، ئاشكارىلىنىپ كەتكەن ئۇچۇرلارمۇ بۇ تور بەتتە ئېلان قىلىنغان ئىدى. بۇ ئۇچۇرلار خاككېرلار تەشكىلاتى ئېيتقان ترۇمپنىڭ ئائىلە ئادرېسى، ئىجتىمائىي بىخەتەرلىك نومۇرى، تۇغۇلۇش ئىسپاتى ۋە يانفون نومۇرى قاتارلىقلارنى ئۆز ئىچىگە ئالىدۇ. بەزىلەر بۇ ئۇچۇرلارنى Twitter مىكروبلوگىدا ئېلان قىلدى ھەمدە #OpTrump خەتكۈچى قويۇلغان.

ترۇمپنىڭ باياناتچىسى بىلدۈرۈشىچە، ھۆكۈمەت ۋە ئەدلىيە تارماقلىرى ترۇمپنىڭ ھېساباتىغا قانۇنسىز ھۇجۇم قىلماقچى بولغان ئادەمنى قولغا ئالىدىكەن. ئۇ تېخىمۇ كۆپ ئۇچۇرنى ئاشكارىلاشنى رەت قىلدى.

3-ئاينىڭ 17-كۈنى، ترۇمپنىڭ ئوغلى ئېرىك مانخاتتوندىكى داچىسىدا تەھدىت خېتى تاپشۇرۇۋالدى، خەتتە ئەگەر ترۇمپ سايلامغا داۋاملىق قاتنىشىدىغان بولسا، ئۇنىڭ ئىككى ئوغلى زىيانكەشلىككە ئۇچرايدىغانلىقى دېيىلگەن. نۆۋەتتە Anonymousنىڭ ھەرىكىتى بۇ تەھدىت خېتى بىلەن مۇناسىۋىتى بار يوقلىقى ئېنىق ئەمەس.