چارلېس چەيس (CharlesChase) بولسا بىر نەپەر ئېنژىنىر بولۇپ، لۇكېد مارتىن (Lockheed Martin Space Systems Company) شىركىتىدە بىرىكىش رېئاكسىيىسى تۈرىگە مەسئۇل ئىدى، ئۇ ئۈچ يىل ئىلگىرى گۇگېل شىركىتىنىڭ SolveforX يىغىنىدا ئەزەلدىن كۆرۈپ باقمىغان بىر كىشىنى ئۇچرىتىپ قالغان. قارشى تەرەپ زوڭزىيىپ ئولتۇرغان ھالدا ئۇنىڭ بىلەن 20 نەچچە مىنۇت سۆزلىشىپ ئۈزلۈكسىز يادرو بىرىكىش رىئاكسىيىسى تەتقىق قىلىپ ئېچىش توغرىسىدا، يەنە قۇياشقا تەقلىد قىلىپ پاكىزە ئېنىرگىيە مەنبەسى ئېچىش، بۇ خىل تېخنىكىنى تەتقىق قىلىپ ئېچىشقا قانچىلىك ۋاقىت ھەم مەبلەغ كېتىدىغانلىقى، قانداق تېخنىكلارغا ئېھتىياجلىق بولىدىغانلىقى توغرىسىدا مۇنازىرە ئېلىپ بارغان. ئۇلار مۇنازىرىلىشىپ بولغاندىن كېيىن ئاندىن قارشى تەرەپنىڭ ئىسىم-فامىلىسىنى سوراشنى ئەسكە ئالغان.

        قارشى تەرەپ مۇنداق جاۋاب بەرگەن:«مېنىڭ ئىسىم لاررىي پەج (LarryPage)». ئەنە شۇ چاغدىلا، چارلېس ئىسىملىك بۇ ئېنژىنىر ئۆزىنىڭ باياتىن گۇگېل شىركىتىنىڭ ھەمكارلىشىپ قۇرغۇچىسى، قوشۇمچە باش ئىجرائىيە ئەمەلدارى بىلەن مۇنازىرىلەشكەنلىكىنى بىلىپ يەتكەن.

       لاررىي پەج بولسا ناھايىتى تىپىك شىركەت باش ئىجرائىيە ئەمەلدارى بولۇپ، ئادەتتە نۇرغۇنلىغان شىركەت خوجايىنلىرىنىڭ ۋاقتى مەبلەغ سالغۇچىلار بىلەن يىغىن ئېچىش ياكى مۇنبەردە تۇرۇپ ئۆز شىركىتىنىڭ يېڭى مەھسۇلاتىنى كىشىلەرگە تونۇشتۇرۇش بىلەن ئۆتىدۇ، لېكىن لاررىي پەج  بولسا 2013-يىلىدىن باشلاپلا گۇگېل شىركىتىنىڭ مالىيە دوكلاتى تېلېفون يىغىنىغا قاتنىشىپ باقمىغان بولۇپ، لېكىن ئۇنى گۇگېل شىركىتىنىڭ ھەر يىلى ئۆتكۈزۈلىدىغان يىللىق پىروگراممىرلار يىغىنىدا ئۇچراتقىلى بولاتتى. سىز بۇ خىل يىغىنلاردا ھەرگىزمۇ رەئىس سەھنىسىدىن لاررىي پەجنى ئىزدەپ تاپالمايسىز، بەلكى يىغىن مەيدانىنىڭ قايسى يېرىدە كىشىلەر ئۆرە-تۆپە بولۇشۇپ كەتسە شۇ جايدىن ئۇنى ئىزدىسىڭىز بولىدۇ، چۈنكى لاررىي پەج ھەر قېتىم يىغىن مەيدانىدا پەيدا بولغان ھامان ئۇنىڭ مەستانىلىرى ئۇنى ئىزدەپ ئىمزا قويدۇرماقچى بولىدۇ.

     لېكىن ئاممىۋى سورۇنلاردا كۆپ پەيدا بولماسلىق ھەرگىزمۇ لاررىي پەجنىڭ ئۆزىنى يوشۇرۇپ كەلگەنلىكىنى بىلدۈرمەيدۇ. چۈنكى پەج ھەمىشە ماشىنا ئادەم توغرىسىدا ئۆتكۈزۈلگەن يىغىن ياكى TED قاتارلىق يىغىنلاردا، يەنە جەمئىيەتتىكى قابىللار يىغىلغان يىغىلىشلارغا قاتنىشىدۇ، ئۇ يەنە شىركەتنىڭ ئىلمىي مۇھاكىمە يىغىنلىرىغا قاتنىشىدۇ، شىركەتنىڭ تېخنىكا مەسىلىسى توغرىسىدا مۇنازىرە ئېلىپ بارىدۇ ياكى كارخانىغا قارىتا تەكلىپ پىكىرلەرنى بېرىدۇ، لاررىي پەج ھەرگىزمۇ كىرىمنىيدىكى تۇنجى بولۇپ ئىجتىمائىي مۇناسىۋەتتىن ئۆزىنى قاچۇرغان رەھبەر ئەمەس، باشقا كىشلەر بىلەن سېلىشتۇرغاندا، لاررىي پەجنىڭ كۆپىنچە ۋاقتى ئاساسەن شىركەتنىڭ يادرولۇق كەسپىگە ئەمەس بەلكى ئۆزىنىڭ قىزىقىشىغا سەرپ قىلىنىدۇ.

       لاررىي پەج يەنە Alphabet ئارقىلىق تېخىمۇ زور دەرىجىدە ئىلگىرىلىمەكچى بولغان. Alphabet بولسا پاي چېكى كونتىرول قىلىنىدىغان شىركەت بولۇپ، بۇ شىركەت گۇگېلنىڭ ئەڭ كۆپ پۇل تاپالايدىغان ئېلان كەسپى بىلەن سانى كۆپ، لېكىن پايدا يارىتالمايدىغان كەسىپلىرى (مەسىلەن شوپۇرسىز ھەيدىلىدىغان ماشىنا كەسپى) نى ئايرىۋېتىپ، گۇگېل شىركىتنىڭ تۇغى ئاستىدىكى شىركەت ۋە كەسىپلەرنى ئاساسلىقى بىئو تېخنىكىسى، ئېنىرگىيە ئىشلەپچىقىرىشى، ئالەم بوشلۇق ساياھىتى، سۈنئىي ئەقلىي ئىقتىدار شۇنداقلا شەھەر پىلانلاش قاتارلىق كۆپ خىل ساھەلەرگە يىغىنچاقلىغان. بۇ يىل 2-ئاينىڭ 1-كۈنى، يۇقارقى يېڭى قۇرۇلغان شىركەت (Alphabet شىركىتىنى دېمەكچى) ئۆزىنىڭ 4-پەسىللىك مالىيە دوكلاتىنى ئېلان قىلىدىغان بولۇپ، تۇنجى قېتىم گۇگېل شىركىتىنىڭ يادرولۇق كەسىپلىرىدىن باشقا تۈرلەرنىڭ سېلىنمىسى ۋە كىرىمىنى ئاشكارىلايدۇ.

     Alphabet شىركىتىنىڭ باش ئىجرائىيە ئەمەلدارى بولۇش سۈپىتى بىلەن، لاررىي پەجنىڭ ئاساسلىق ۋەزىپىسى بولسا شىركەتنىڭ نەچچە ئون مىليارد دوللارلىق ئېلان كىرىمىنى قانداق قىلىپ يېڭى شىركەت ۋە يېڭى ساھەلەرگە نەپ يەتكۈزىدىغان قىلىش ئىدى. ئۆتكەن يىلى گۇگېل شىركىتىنى قايتا تەشكىللەش ئوتتۇرىغا قويۇلغاندا، لاررىي پەج گۇگېلنىڭ يەنە بىر نەپەر ھەمكارلىشىپ قۇرغۇچىسى-سېرگىي بىرىن (SergeyBrin) بىلەن بىرلىشىپ مەبلەغ سېلىشقا ئەرزىيدىغان ئادەم ۋە تېخنىكىلارنى ئىزدەش، شۇنداقلا گۇگېل شىركىتىنىڭ كۆلىمىنى كىچىكلىتىپ، ھەر قايسى تارماق شىركەتلەرنىڭ رەھبەرلىرىگە مۇستەقىل ھوقۇق بېرىشنى ئويلىشىۋاتقانلىقىنى بىلدۈرگەن.

       لاررىي پەجنىڭ قىزىقىش دائىرىسى ناھايىتى كەڭ. ئۇ مېچىگان ئۇنۋېرسىتىتىدا ئوقۇۋاتقان چېغىدا قۇياش ئېنىرگىيىلىك ماشىنا تەتقىق قىلىپ چىققان، شۇنداقلا مۇزىكا بىرىكتۈرگۈچمۇ ئىشلەپ باققان شۇنداقلا مەكتەپكە ئۇنۋېرسىتىت ئىچىدە ئىشلىتىلىدىغان تىرامۋاي تەسىس قىلىش تەكلىپىنى بەرگەن. لاررىي پەج 1995-يىلى سىتانفورد ئۇنۋېرسىتىتىغا كېلىپ دوكتورلۇق ئوقۇۋاتقاندا بىر تالاي تەتقىقات پىلانىنى تۈزۈپ چىققان بولۇپ، بۇنىڭ ئىچىدە شوپۇرسىز ھەيدىلىدىغان ماشىنا تېخنىكىسى شۇنداقلا ئۇلىنىشتىن ھالقىغان دەرىجىدىكى تور ئىزدەش سۈرئىتىنى تېزلىتىش قاتارلىقلار بار ئىدى.