جاڭ شىنيۈنىڭ ئۈرۈمچى شەھەرلىك ئادەم كۈچى بايلىقى ۋە ئىجتىمائىي كاپالەت ئىدارىسىدىن ئىگىلىشىچە، يېقىندا ئۈرۈمچى شەھىرىنىڭ كارخانىلاردىكى ئىشچى – خىزمەتچىلەرنىڭ 2015 – يىللىق مائاشىنى ئۆستۈرۈش يېتەكچى سىزىقى ئېلان قىلىنغان. ئىشچى – خىزمەتچىلەر مائاشىنىڭ ئوتتۇرىچە ئۆسۈش نىسبىتى %13بولغان.
ئىگىلىنىشىچە، ئۈرۈمچى شەھىرى يېقىندا ئۈرۈمچى شەھىرىنىڭ ئىقتىسادىي تەرەققىيات سەۋىيەسى، شەھەر، بازار ئاھالىلىرىنىڭ ئىستېمال باھا كۆرسەتكۈچى، ئەمگەكچىلەرنىڭ ئىشقا ئورۇنلىشىش ئەھۋالى ھەم ئەمگەك كۈچى تەننەرخى قاتارلىق ئۇنىۋېرسال ئامىللارغا بىرلەشتۈرۈپ، ‹‹ئۈرۈمچى شەھىرىنىڭ 2015 – يىللىق كارخانا ئىشچى – خىزمەتچىلىرىنىڭ مائاشىنى ئۆستۈرۈش يېتەكچى سىزىقى››نى ئېلان قىلغان. بۇ كارخانا ئىشچى – خىزمەتچىلىرى مائاشىنى ئۆستۈرۈش يېتەكچى سىزىقى ئۈرۈمچى شەھىرى ۋە ھەر قايسى رايون (ناھىيە) لاردىكى دۆلەت ئىلكىدىكى، كوللېكتىپ ئىگىلىكىدىكى، پاي تۈزۈمىدىكى، چەت ئەل مەبلىغىدىكى، پۇقراۋى ئىگىلىكتىكى ۋە خۇسۇسىي ئىگىلىكتىكى كارخانىلارغا ماس كېلىدىكەن. ئۈرۈمچىدىكى ھەر قايسى رايون(ناھىيە)لارنىڭ ئادەم كۈچى بايلىقى ۋە ئىجتىمائىي كاپالەت ئىدارىلىرى 2015 – يىللىق كارخانا ئىشچى – خىزمەتچىلىرى مائاشىنى ئۆستۈرۈش يېتەكچى سىزىقىنى ‹‹ئاپتونوم رايوننىڭ كارخانا ئىشچى – خىزمەتچىلىرى مائاشىنى كوللېكتىپ كېڭىشىش نىزامى››غا تەتبىقلىغان ھالدا، كارخانىلار مائاشىنى تەڭشەش خىزمىتىنى كۈچەيتىپ، كارخانىلارنىڭ ئۇنىۋېرسال ئىشلەپچىقىرىش، تىجارەت ۋە ئىقتىسادىي ئۈنۈم ئەھۋالىغا يېتەكچىلىك قىلىش، مائاشنى كوللېكتىپ كېڭىشىش قاتارلىق ئۈسۇللار ئارقىلىق، ئىشچى – خىزمەتچىلەرنىڭ مائاشىنى مۇۋاپىق بېكىتىپ، ئىشچى – خىزمەتچىلەر مائاشىنىڭ ئۆسۈشىنى تېزلىتىدىكەن.