يېقىندا مەلۇم شەھەر ئاھالىسى پايتەخت خەلقئارا ئايرودرومىدا مەلۇم ھۆججەتنى نۇسخلىغاندا، ھەربىر ۋارىقى ئۈچۈن 10 يۈەن ھەق ئالغانلىقىنى مەلۇم قىلغان، بۇ ئالىي مەكتەپتىكى نۇسخىلاش ھەققىنىڭ 100 ھەسسىگە باراۋەر ئىكەن. مۇخبىر نەق مەيدانغا بېرىپ زىيارەت قىلىش ئارقىلىق، پايتەخت خەلقئارا ئايرودرومىنىڭ ئىككى يېرىدە نۇسخىلاش ئورنى بارلىقىنى، ھەق ئېلىش ئۆلچىمىنىڭ A4 قەغىزىنىڭ بىر ۋارىقىنىڭ 10 يۈەن ئىكەنلىكىنى بايقىدى. نۇسخىلاش ئورنىدىكى خىزمەتچى خادىمنىڭ دېيىشىچە، بۇ ھەق ئېلىش ئۆلچىمىنى ئايرودروم بىردەك بېكىتكەنىكەن. ئايرودرومنىڭ تېلېفوندا پاش قىلىش مۇلازىمەتچىسىنىڭ دېيىشىچە، نۇسخىلاش ئورنى ئىجارىگە بېرىلگەن بولۇپ، مۇناسىۋەتلىك ئورۇنلارغا بۇ ئەھۋالنى مەلۇم قىلىدىكەن.

      شەھەر ئاھالىسى ياڭ خانىمنىڭ ئېيتىشىچە، ئالدىنقى كۈنى چۈشتىن كېيىن بەشلەر ئەتراپىدا، ئۇ پايتەخت خەلقئارا ئايرودرومى 3-ئاۋىياتسىيە پونكىتى بىناسى بېيجىڭ ساياھەتچىلىك مەسلىھەت سوراش مەركىزىدە ئىككى ۋاراق ھۆججەتنى نۇسخىلىغاندا، 20 يۈەن ھەق ئالغان، بۇ مەكتەپ ھەق ئېلىش ئۆلچىمىنىڭ 100 ھەسسىسىگە باراۋەر ئىكەن. ياڭ خانىم مۇنداق دېدى: «مەن تېخى ھەقسىز ئوخشايدۇ دەپ نۇسخىلاپ بولۇپلا ماڭماقچى بولۇپ تۇرسام، خىزمەتچى خادىم بىر ۋارىقىغا 10 يۈەندىن ئىككى ۋاراققا 20 يۈەن تاپشۇرىدىغانلىقىمنى ئېيتتى. ئەينى ۋاقىتتا جىددىي بىجىرىدىغان ئىشىم بولغاچقا، پۇلنى تۆلىۋەتتىم. ئىشىمنى تۈگىتىپ ئۇلاردىن پۇل تاپشۇرۋالغانلىق ھۆججىتى ئالغىلى بارسام، ئۇلار بۇ يەردە ھۆججەت نۇسخىلىغانلىقىمنى ئىنكار قىلىپ تۇرۇۋالدى ھەمدە پۇل ئالغانلىق ھۆججىتى بەرمىدى. مەن نۇسخىلىغان ماتېرىيال ئۇلارنىڭ كومپىيۇتېرىدا بار».

    پايتەخت خەلقئارا ئايرودرومىنىڭ 3-ئاۋىياتسىيە پونكىتىنىڭ ئىككى يېرىدە نۇسخىلاش ئورنى بولۇپ، مۇخبىر تۈنۈگۈن چۈشتىن كېيىن 2-قەۋەتكە جايلاشقان بېيجىڭ ساياھەتچىلىك مەسلىھەت سوراش مەركىزىدە A4 قەغەزدىكى ئىككى ۋاراق ماتېرىيالنى نۇسخىلىغاندا، قارشى تەرەپ 20 يۈەن ھەق ئالدى. ئۇنىڭ دېيىشىچە، بۇنى ئايرودروم بىردەك بېكىتكەن باھا ئىكەن. قارشى تەرەپ تەمىنلىگەن پۇل تاپشۇرۋالغانلىق ھۆججىتىدىكى پۇل تاپشۇرۋالغۇچى ئورۇن «بېيجىڭ پايتەخت ئايرودرومى ئاۋىياتسىيە مۇلازىمىتى چەكلىك شىركىتى» بولۇپ، ھۆججەتكە بۇ ئورۇننىڭ تامغىسى بېسىلغانىكەن.

يەنە بىر نۇسخىلاش ئورنى 4-قەۋەتتىكى سودا مەركىزىدە بولۇپ، سودا مەركىزىنىڭ تاختىسىغا بۇ ئورۇننىڭ مۇلازىمەت دائىرىسىنىڭ « نۇسخىلاش، كۆپەيتىش، فاكىس، رەسىمگە تارتىش» نىڭ ئىكەنلىكى يېزىلغانىكەن. سودا مەركىزىدىكى خىزمەت خادىملارنىڭ دېيىشىچە، نۇسخىلاش ھەققى بىر ۋارىقى 10 يۈەن ئىكەن. باھا جەدۋىلىدە ئېنىق قىلىپ مۇنداق يېزىلغانىكەن:

كۆپەيتىش:  بىر ۋاراق بىر يۈەن

نۇسخىلاش (سىكاننىرلاش): بىر ۋاراق 10 يۈەن

رەسىمگە تارتىش: بىر پارچە 20 يۈەن

فاكىس: بىر ۋاراق 10 يۈەندىن 25 يۈەنگىچە

ئىگىلىنىشىچە، ئايرودروم سىرتىدىكى نۇسخىلاش ئورۇنلىرىدا A4 قەغىزىنىڭ بىر ۋارىقىنىڭ نۇسخىلاش ھەققى بازار باھاسى بويىچە ئىككى مودىن بەش موغىچە ئىكەن. ئالىي مەكتەپنىڭ ئىچىدە بولسا تېخىمۇ ئەرزان بولۇپ، بىر ۋارىقى بىر موچەن ئىكەن.

بۇ ئىشقا قارىتا، ئايرودروم تېلېفون مۇلازىمەتچىسىنىڭ دېيىشىچە، ساياھەت مەسلىھەت بېرىش مەركىزى ۋە سودا مەركىزى سىرتقا ئىجارىگە بېرىلگەن بولۇپ، باشقىلارغا ھۆددىگە بەرگەنگە ئوخشىشىپ كېتىدىكەن. نورمال ئەھۋالدا نۇسخىلاش ھەققىنى ئۇلار ئۆزلىرى بېكىتىدىغان بولۇپ، بۇ ئىشنى مۇناسىۋەتلىك ئورۇنلارغا ئىنكاس قىلىدىكەن.